Shonza asema ‘Mwanaume mashine’ haujafungiwa

• Mchana Zungu alihoji kufungiwa kwa wimbo huo wakati unamtaja mchezaji mahiri wa Simba.

Dodoma. Naibu Waziri wa Habari, Utamaduni, Sanaa na Michezo, Juliana Shonza amesema wimbo wa Mwanaume Mashine haujafungiwa.

Ametoa kauli hiyo leo jioni Aprili 27, 2018 baada ya leo mchana Mwenyekiti wa Bunge, Mussa Azzan Zungu kuhoji sababu za kufungiwa kwa wimbo huo.

Shonza ametoa kauli hiyo wakati Bunge lilipokaa kama kamati kupitisha bajeti ya wizara hiyo mwaka 2018/19 baada ya Zungu kutaka kupewa jibu kuhusu ‘Mwanaume Mashine’ kutokana na maelezo ya Shonza na Waziri wa wizara hiyo, Dk Harrison Mwakyembe wakati wanajibu hoja za wabunge kuhusu bajeti hiyo kutoeleza sababu za kufungiwa kwa wimbo huo.

Mchana Zungu alihoji kufungiwa kwa wimbo huo wakati unamtaja mchezaji mahiri wa Simba.

Bunge limepitisha Bajeti ya Wizara ya Habari, Utamaduni, Sanaa na Michezo mwaka 2018/19

     

Lema aachiwa huru, ashtakiwa upya

Mbunge wa Arusha Mjini, Godbless Lema (katikati) akitoka katika Mahakama ya Hakimu Mkazi Mkoa wa Arusha akiwa na Meya wa jiji hilo, Calist Lazaro baada ya kuachiwa kwa dhamana, jana. Picha Mussa Juma 

Arusha/Mikoani. Mahakama ya Wilaya Arusha jana ilimwachia huru mbunge wa Arusha Mjini (Chadema), Godbless Lema katika kesi ya uchochezi baada ya upande wa Jamhuri kushindwa kuwasilisha ushahidi, lakini alipandishwa tena kizimbani na kusomewa mashtaka mapya.

Hakimu Mkazi, Devotha Msofe alitoa uamuzi huo baada ya Wakili wa Serikali, Agness Hyera kuiomba Mahakama kuahirisha kesi kutokana na shahidi wa saba aliyetakiwa kutoa ushahidi jana kuwa mgonjwa.

Msofe alisema kesi ni ya muda mrefu, hivyo alimwachia Lema chini ya kifungu cha 225(5) cha Sheria ya Mwenendo wa Makosa ya Jinai. Lema aliyekuwapo mahakamani anawakilishwa na wakili Sheck Mfinanga. Katika kesi hiyo namba 440 ya mwaka 2016, mbunge huyo anadaiwa katika mkutano wa hadhara uliofanyika Oktoba 22, 2016 eneo la Kambi ya Fisi alitoa kauli za uchochezi dhidi ya Rais John Magufuli.

Kabla ya Januari 23, kesi hiyo ilisikilizwa kwa upande wa Jamhuri kuwasilisha mashahidi, lakini siku hiyo ushahidi wa video haukuwasilishwa kutokana na mawakili wa utetezi kuwasilisha pingamizi.

Baada ya Mahakama kumfutia mashtaka Lema, alipigiwa simu na Mkuu wa Upelelezi mkoani Arusha, George Katabazi akimtaka afike kituo kikuu cha polisi au Mahakama ya Hakimu Mkazi Arusha na wadhamini wawili na mawakili wake.

Lema alikwenda mahakamani alikosomewa shitaka moja la kuamsha hisia kwa njia isiyo halali kinyume cha sheria mbele ya Hakimu Mkazi, Nestory Barro.

Wakili wa Serikali, Elianinenyi Njiro alidai Lema alitenda kosa hilo wakati akihutubia mkutano wa hadhara uliofanyika Oktoba 22, 2016 katika eneo la Kambi ya Fisi.

Anadaiwa kutamka, “Rais Magufuli akiendelea na tabia ya kudhalilisha demokrasia na uongozi wa upinzani iko siku Taifa litaingia kwenye umwagaji wa damu,….

“Rais yeyote ambaye haheshimu mipaka ya sheria, mipaka ya Katiba, Rais huyo ataliingiza Taifa katika majanga ya umwagaji damu, watu watajaa vifua, wakiamua kulipuka polisi hawa wala jeshi halitaweza kudhibiti uhalifu utakaojitokeza.”

Wakili huyo alidai maneno hayo yalichochea hisia hasi kwa watu wa ngazi tofauti katika jamii. Alidai upelelezi haujakamilika.

Hakimu Barro aliahirisha kesi hadi Mei 30 na Lema alidhaminiwa na mdhamini mmoja aliyesaini hati ya Sh5 milioni.

Mbowe polisi

Mkoani Dar es Salaam, viongozi waandamizi wa Chadema waliripoti kituo kikuu cha polisi wakiongozwa na mwenyekiti wao Freeman Mbowe. Hata hivyo, Naibu Katibu Mkuu (Zanzibar), Salum Mwalimu na Mwenyekiti wa Kanda ya Serengeti, John Heche hawakufika.

Mbali na Mbowe, wengine sita walioripoti ni Katibu Mkuu Dk Vincent Mashinji; Naibu Katibu Mkuu (Bara), John Mnyika; Mhazini wa Bawacha, Esther Matiko; Mwenyekiti wa Bawacha, Halima Mdee; Mbunge wa Bunda Mjini, Ester Bulaya na Mbunge wa Iringa Mjini, Peter Msigwa.

Ofisa habari wa chama hicho, Tumaini Makene alisema Mwalimu yuko Dodoma kwa majukumu ya kazi huku Heche akisema yupo msibani. Viongozi hao wanaripoti polisi kila Ijumaa kutekeleza amri ya Mahakama ya Hakimu Mkazi Kisutu iliyotolewa Machi 27 walipopatiwa dhamana katika kesi ya uchochezi inayowakabili.

Watatu washikiliwa Mbeya

Mwenyekiti wa Baraza la Vijana Chadema (Bavicha) Mbeya, George Titho; Katibu wa Bavicha Wilaya ya Rungwe, Michael Kilaiti na Katibu wa Bavicha Kata ya Ibighi-Rundwe, Furaha Benson hadi jana mchana walikuwa wanaendelea kusota mahabusu ya kituo cha polisi Tukuyu baada ya kukamatwa usiku wa kuamkia juzi.

Kaimu Kamanda wa Polisi mkoani Mbeya, Mussa Taibu alipoulizwa alisema hawezi kuzungumzia suala hilo hadi timu ya upelelezi iliyotumwa kwenda Rungwe itakapomaliza kuwahoji.

Imeandikwa na Mussa Juma (Arusha), Pamela Chilongola na Fortune Francis (Dar) na Godfrey Kahango (Mbeya).

Wizara yaunda kamati kufuatilia kampuni

• Dk Mwakyembe amesema mbali na Majuto nyingine zitakazopitiwa ni zile zilizoingia mikataba na msanii Steven Kanumba (marehemu).

Dodoma. Waziri wa Habari, Utamaduni, Sanaa na Michezo, Dk Harrison Mwakyembe amesema wizara hiyo imeunda kamati kufuatilia kampuni mbalimbali zinazoingia mikataba na wasanii nchini, ili kuona wananufaika vipi, zikiwemo zilizoingia mikataba na mchekezaji maarufu nchini, Mzee Majuto.

Akizungumza bungeni leo Aprili 27, 2018 wakati akijibu hoja za wabunge walizozitoa wakati wa mjadala wa bajeti ya wizara hiyo mwaka 2018/19, Dk Mwakyembe amesema; “Kampuni zote zilizoingia mkataba na Majuto tutapitia mikataba yao maana wasanii wetu wengi ni maarufu lakini hawana fedha.”

“Mimi ninatoa fedha zangu mfukoni kumsaidia Majuto. Majuto kwa sasa anaumwa yuko hospitali lakini hana fedha watu wanamchangia.”ameongeza

Amesema mbali na Majuto nyingine zitakazopitiwa ni zile zilizoingia mikataba na msanii Steven Kanumba (marehemu).

SIO MIMI Mourinho ajivua lawama za kumuuza Salah

Kocha wa zamani wa Chelsea, Jose Mourinho ambaye alikuwepo wakati Salah akinunuliwa Chelsea kisha kuuzwa, amejivua gamba rasmi baada ya kuendelea kutupiwa lawama na mashabiki mbalimbali ndani na nje ya Chelsea kwa kumruhusu Salah kuondoka Stamford Bridge.

LONDON, ENGLAND

NANI alimuuza Mo Salah? Wameanza kutupiana mpira. Ni pale Stamford Bridge baada ya staa wa Liverpool, Mohamed Salah ambaye alikuwa ni mchezaji wao kuonyesha makali yasiyomithilika msimu huu katika michuano mbalimbali.

Kocha wa zamani wa Chelsea, Jose Mourinho ambaye alikuwepo wakati Salah akinunuliwa Chelsea kisha kuuzwa, amejivua gamba rasmi baada ya kuendelea kutupiwa lawama na mashabiki mbalimbali ndani na nje ya Chelsea kwa kumruhusu Salah kuondoka Stamford Bridge.

Salah amefunga mabao 43 msimu huu akiwa anaongoza katika ligi kubwa tano za Ulaya, huku pia akiwa anatarajiwa kuchukua Kiatu cha Dhahabu Ligi Kuu ya England akiwa amefunga mabao 31 mpaka sasa huku zikiwa zimebakia mechi nne ligi kumalizika.

Staa huyo wa kimataifa wa Misri wiki iliyopita alichaguliwa kuwa mchezaji bora wa msimu huu mbele ya staa wa Manchester City, Kevin De Bruyne ambaye naye aliwahi kukipiga Chelsea kabla ya kuonyeshwa mlango wa kutokea na Mourinho.

Kelele za lawama zimekuwa nyingi zikielekeza kwa Mourinho kwa kumuuza Salah kwenda AS Roma katika dirisha kubwa la mwaka 2016 baada ya kwanza kumpeleka kwa mkopo Fiorentina kuanzia mwaka 2015.

Na sasa Mourinho amevunja ukimya na kurusha lawama zake kwa mabosi wengine wa Chelsea huku akidai yeye hausiki na kumuuza Salah badala yake apongezwe kwa kumleta Farao huyo England akitokea Basel ya Uswisi.

“Watu wanasema mimi ndiye niliyemuuza Salah lakini kumbe ni kinyume chake. Mimi ndiye niliyemleta. Mimi ndiye ambaye niliwaambia Chelsea wamnunue Salah. Ni wakati wa utawala wangu ndipo Salah alikuja Chelsea,” alijitetea Mourinho.

“Lakini alikuja akiwa kijana mdogo, kwa matumizi ya nguvu hakuwa tayari, kiakili hakuwa tayari, kwa suala la jamii na utamaduni alikuwa kama amepotea vile na kila kitu kilikuwa kigumu sana kwake,” aliongeza kocha huyo wa Manchester United.

“Tuliamua kumpeleka kwa mkopo na hata yeye mwenyewe aliomba hivyo hivyo. Alitaka kucheza dakika nyingi, kupata uzoefu, kiukweli alitaka kwenda na tulimpeleka Fiorentina, na alipofika kule alianza kukomaa,” alisema Mourinho.

Pamoja na sasa kuwa tishio huku baadhi ya wataalamu wakidai anastahili kuingizwa katika kundi la mastaa kama Cristino Ronaldo na Lionel Messi katika kugombea tuzo ya mwanasoka bora wa dunia mwakani bado Mourinho anaamini hakukuwa na kosa katika kumuruhusu Salah aondoke.

“Chelsea iliamua kumuuza. Sawa? Na wanaposema ni mimi ndiye niliyemuuza huo ni uongo. Mimi ndiye niliyemnunua. Nilikubali kumpeleka kwa mkopo kwa sababu niliona umuhimu. Chelsea ilikuwa na mawinga wengi wazuri. Wengine bado wapo pale kama vile Willian, Hazard na wachezaji wengine ambao walikuwa katika viwango vya juu.”

“Lakini kwa faida nilimnunua Salah na sikumuuza Salah. Hata hivyo haijalishi. Kitu cha msingi ni bonge la mchezaji na nina furaha kwa kila kinachomtokea kwa sasa na hasa ukizingatia hajatufunga katika mechi mbili ambazo amecheza na sisi msimu huu.”

Mourinho amekuwa akilaumiwa kwa kushindwa kuishi vizuri na wachezaji wenye vipaji huku kwa sasa akiwa katika matatizo na kiungo staa wa timu yake, Paul Pogba kwa kile kinachodaiwa staa huyo amekuwa hafuati maelekezo uwanjani.

Mourinho pia ana matatizo na beki wa kushoto wa timu hiyo, Luke Shaw ambaye naye kama ilivyo kwa Pogba wote wanahusishwa kuondoka katika dirisha kubwa lijalo la majira ya joto.

Ethiopia kuweka mihula ya uongozi kwa waziri mkuu

• Katiba ya sasa inasema kwamba muhula wa uongozi kwa waziri mkuu hauna ukomo.

Addis Ababa, Ethiopia. Waziri Mkuu, Dk Abiy Ahmed ametangaza kusudio lake la kuifanyia marekebisho katiba ili iingizwe ibara inayozungumzia ukomo wa uongozi kwa ofisi hiyo kuwa vipindi viwili.

Dk Ahmed aliwaambia maelfu ya watu waliompokea katika mji mkuu wa jimbo la Kusini, Hawassa, akisema amedhamiria kuhakikisha anaimarisha misingi ya demokrasia katika mageuzi anayofanya.

Safari katika mji huo ni sehemu ya ziara anazofanya nchi nzima tangu alipochaguliwa kuwa waziri mkuu, Aprili 2.

“Kiongozi yeyote katika nchi hii hataruhusiwa kutumikia ofisi hii kupindukia vipindi viwili baada ya kufanya marekebisho katika katiba,” alisema Abiy.

Katiba ya sasa inasema kwamba muhula wa uongozi kwa waziri mkuu hauna ukomo.

Ethiopia inatumia mfumo wa kibunge ambapo chama kinachokuwa na wabunge wengi ndani ya bunge ndicho kinamteua waziri mkuu.

Abiy alimpongeza mtangulizi wake, Hailemariam Desalegn, kwa kukataa vishawishi vya kumtaka ang’ang’anie madaraka.
Desalegn alijiuzulu wadhifa wake wa waziri mkuu na mwenyekiti wa muungano unaotawala wa EPRDF Februari mwaka huu.

“Hailemariam alijiuzulu wakati ambao alikuwa na uwezo wa kuendelea kuchangia pa kubwa nchini, hata hivyo, kuna viongozi ambao huwa wanakataa kung’atuka madarakani ingawa wanatakiwa kustaafu,” alisema.

Maaskofu wanamtaka Rais Buhari ajiuzulu

• Maaskofu wa Kikatoliki wanamshutumu rais kwa kupuuza wito wa mara kwa mara wa kumtaka kutupia macho tatizo la usalama wenye upogo na mbinu dhaifu za kudhibiti mapigano kati ya Wakristo ambao ni wakulima na Waislamu ambao ni wafugaji.

Abuja, Nigeria. Baraza la Maaskofu wa Kanisa Katoliki Nigeria wamemtolea wito Rais Muhammadu Buhari kujiuzulu baada ya makasisi wawili na wafanyakazi wengine kuuawa Jumanne alfajiri.

Buhari ameitwa na wabunge ili waweze kujadili hali ya usalama katika Jimbo la Benue. Pia wabunge hao Jumatano walipitisha kura ya kutokuwa na imani na wakuu wa masuala ya usalama.

Maaskofu wa Kikatoliki wanamshutumu rais kwa kupuuza wito wa mara kwa mara wa kumtaka kutupia macho tatizo la usalama wenye upogo na mbinu dhaifu za kudhibiti mapigano kati ya Wakristo ambao ni wakulima na Waislamu ambao ni wafugaji.

Hali hii ya kushindwa iwe ni kutokana na utendaji dhaifu au ukosefu wa utashi wa kisiasa, ni wakati wake sasa kuchagua njia ya heshima na kufikiria kujiuzulu kuliokoa taifa hilo ili lisididimie kabisa.

“Kwa kuwa rais ambaye anawateua wakuu wa usalama amekataa kuwaita na kuwapa amri, tunachoweza ni kuhitimisha kwamba wanatekeleza majukumu yaliyoandikwa ambayo yeye ameridhia,” imesomeka taarifa ya maaskofu hao.

Taarifa hiyo imekwenda mbali hadi kusema kwamba rais amepoteza kuaminika kwake kwa wananchi kutokana na kushindwa kwake kuiweka nchi kuwa salama.

“Kushindwa huku kuwa ni kutokana na uwezo wake mdogo kiutendaji au ukosefu wa utashi wa kisiasa, wakati umefika kwa yeye kuamua njia ya heshima na kufikiria kukaa kando ili kuliokoa taifa lisiangamie kabisa”.

Wanafunzi watoroka wakidai kukwepa viboko

Uongozi wa shule ulitoa taarifa kwa Jeshi la Polisi, kituo cha Kamachumu kisha wakapatikana Bukoba Mjini

Muleba. Wanafunzi wanne kati ya watano wa Shule ya Msingi Ndolage, Kata ya Kamachumu, Kagera wamekamatwa wakidaiwa kutoroka shule na kwenda kutafuta kazi za ndani mjini Bukoba.

Wanafunzi hao wenye miaka 11 hadi 14 walitoroka Aprili 25 wakiwa na sare za shule.

Mwalimu Mkuu wa Shule ya Msingi Ndolage, Frederick Byarugaba alisema wanafunzi hao (majina tunayahifadhi) walitoka nyumbani kwao Kitongoji cha Buganda B, Kamachumu na walipata usafiri wa kuelekea Bukoba Mjini.

“Baada ya taarifa hizo kusambaa kuwa wanafunzi wametoroka, uongozi wa shule ulitoa taarifa kwa Jeshi la Polisi, Kituo cha Kamachumu, Muleba,” alisema Byarugaba.

Alisema watoto hao walionekana kwa mara ya kwanza, Manispaa ya Bukoba wakitembea pamoja na baadhi ya watu wakiwamo abiria waliwakamata na kutoa taarifa polisi na kwa uongozi wa shule.

“Walikuwa na utoro wa rejareja na mara kadhaa wamekuwa wakikanywa kuhusu tabia mbaya ya utoro, hivyo baada ya wazazi kutoa taarifa ya kutoonekana nyumbani tulianza kusambaza ujumbe wa kuwatafuta,” alisema Byarugaba.

Mmoja wa walezi wa watoto hao, Christopher Kalumuna alisema kuwa baada ya mwalimu wa zamu kudai hawakuonekana shuleni hapo alisambaza taarifa kwenye miji midogo ya Kemondo, Kyetema na Bukoba Mjini hadi kwenye vituo vya magari ili kubaini kama wanaweza kusafiri.

“Huyu ni mtoto wa marehemu kaka yangu (jina tunalihifadhi) na mama yake naye ni marehemu, alikuwa akinifanyia kazi za nyumbani baada ya kutoka shule,” alisema Kalumuna.

Akizungumza kuhusu kilichowafanya kutoroka, mtoto huyo alisema walirubuniwa na mwenzao, ambaye aliiwambia kuwa shuleni kumeandaliwa adhabu ya watoto watoro hivyo watoroke kuepuka viboko au nyaya za umeme.

“Tuliogopa adhabu na ni kweli tumekuwa watoro kila mara na tunachelewa shule. Tulipoondoka tulilala kichakani bila kula huko Kemondo na tulitembea kwa miguu.

“Baada ya kufika Bukoba mjini kiongozi wetu (mwanafunzi mwenzao) alitutoroka na tuliokotwa baada ya kuanza kulia, ndipo tukamweleza aliyetuokota akatupandisha kwenye gari hadi Kamachumu,” alisema mtoto huyo.

Kamanda wa Polisi mkoani Kagera, Agustino Olomi alithibitisha kupokea taarifa za watoto hao.

Rais Magufuli akataa kuingilia mzozo

Rais John Magufuli 

Kondoa. Rais John Magufuli jana aliendelea kukataa maombi ya kumtaka afanye uamuzi wa papo kwa papo baada ya kuombwa amalize mgogoro wa eneo baina ya Halmashauri ya Mji wa Babati na CCM.

Rais pia aliepuka kutumia shughuli za kiserikali ya kufungua Barabara ya Dodoma-Babati, kuwapokea wanachama wa CCM baada ya kuombwa na uongozi wa chama hicho mjini Dodoma jana.

Hii ni mara ya pili mfululizo kwa Rais kukataa kufanya uamuzi ya papo kwa papo kwenye mkutano wa hadhara baada ya kukaa ombi la kufuta hati ya balozi na wizara moja ya viwanja vilivyo karibu na jengo jipya la PSPF wakati akizindua tawi la benki ya NMB la Kambarage mjini Dodoma siku nne zilizopita.

Alitoa msimamo huo baada ya mwenyekiti wa bodi ya PSPF, Mussa Iyombe kumuomba afute hati ya kiwanja cha ubalozi wa Zimbabwe na Wizara ya Kazi na Ajira ili kitumiwe kama maegesho kwa mfuko huo, akisema hilo lingefanya eneo hilo kuwa na mandhari nzuri.

Jana, Rais alikataa ombi la kuingilia mgogoro huo baina ya Halmashauri ya Mji wa Babati, inayoongozwa na Chadema na CCM kuhusu eneo la stendi ambayo ilikuwa chanzo cha mapato cha halmashauri hiyo.

Mbunge wa Babati (Chadema), Paulina Gekul aliwasilisha ombi hilo kabla ya Rais kuzindua barabara hiyo ya urefu wa kilomita 251 katika eneo la Bicha wilayani Kondoa.

“Natumaini watu wako wamekufikishia. Maendeleo hayana vyama. Tungeomba Rais, ni ombi la wazee wa Babati bila kujali itikadi, stendi yetu ya Babati turudishiwe,” alisema Gekul.

“Sisi hatuna ugomvi na CCM, tutawapatia eneo jingine ili halmashauri yetu iendelee kukusanya ushuru pale. Kwa sababu ya muda, Rais ninajua hili lipo mezani kwako. Utusaidie ili wananchi wa Babati waweze kufanya maendeleo kupitia ushuru wa mabasi.”

Awali, kituo hicho cha mabasi kilikuwa chini ya halmashauri, lakini CCM walichukua na hivyo kuukosesha mapato mji huo.

Lakini jana, Rais Magufuli alisema hawezi kuhangaika kutafuta fedha za miradi ya maendeleo na kisha atatue migogoro ya kugombea stendi.

“Viongozi ni ninyi na wa kuamua ni ninyi. Nyie ndio mnajuana vizuri. Kwa hiyo kakaeni huko mkamalize migogoro yenu. Sio kila mgogoro kwa Rais, nitamaliza mingapi?” alihoji Magufuli.

“Viongozi waliopo washughulikie migogoro ya saizi yao, mimi nihangaike na kutafuta fedha, huku tena nihangaike na kutatua migogoro. Kama mna eneo la kuwapa CCM sasa, si mligeuze liwe stendi?”

Rais pia alikataa kutumia shughuli hiyo kisiasa baada ya kuombwa na mbunge wa Kondoa, Edwin Sanga.

Akizungumza kabla ya Rais kuhutubia, Sanga alisema kutokana na utekelezaji mzuri wa Ilani ya Uchaguzi ya CCM, wanachama zaidi 800 kutoka vyama vya upinzani wamejiunga na chama hicho tawala.

Pia alisema jimbo lake lilikuwa na mitaa minne inayoongozwa na Chadema na CUF, lakini diwani mmoja wa Chadema alijiunga na CCM.

“Kama hutajali na kwa idhini yako ukiwapa mkono hapa itakuwa jambo jema sana, jamani karibu sana. Moja ya zawadi kubwa tunayokupa ni hawa viongozi, karibuni wale viongozi,” alisema Sanga.

Hata hivyo, Magufuli alikataa kufanya kazi hiyo kabla ya kuzindua barabara akisema ni kuchanganya shughuli za Serikali na siasa na kuahidi kufanya hivyo baada ya uzinduzi.

Akemea migogoro

Akihutubia katika hafla hiyo, Rais Magufuli aliwataka viongozi wa Wilaya ya Kondoa kuacha ugomvi akisema umekuwa ukichelewesha baadhi ya shughuli za maendeleo.

“Nimeona niwape message (ujumbe) hii live hapahapa.mjirekebishe wote, niliowateua mimi nitawafukuza mimi. Haiwezekani Wilaya ya Kondoa kila siku ni migogoro, mara mbunge, mara nani,” alisema.

“Unakuta huyu anasema hivi, huyu anasema hivi. Acheni. Nafahamu viongozi huwa hampendi kuzungumzwa hadharani, lakini mimi huwa nazungumza tu, ndio tatizo langu. Naomba mniombee labda nibadilike lakini mimi ninapenda kuzungumza wazi ili tuelewane.”

Alisema kila mmoja amekuwa akitumia madaraka yake na kwamba wakishaelewana yeye atafahamu.

Ufisadi wa mradi wa maji

Rais Magufuli pia aliiagiza Wizara ya Maji na Umwagiliaji pamoja na vyombo vya dola kuwatafuta na kuwashughulikia watu wote waliohusika na ufisadi wa mradi wa maji wa Ntomoko.

“Hatuwezi tukawa tunaimba wakati wamechukua Sh2 bilioni na maji hakuna. Waziri Maji mkashughulikie, vyombo vya dola mpo hapa mkawashughulikie warudishe pesa zetu ama wahakikishe mradi wa maji umekamilika. Mkuu wa mkoa shughulikieni hawa,” alisema.

Kauli hiyo ilikuja baada ya mkuu wa Mkoa wa Dodoma, Dk Binilith Mahenge kusema kuwa mradi huo ulitengewa Sh2.8 bilioni mwaka 2014 na kwamba kazi hazikufanyika vizuri.

Alisema mradi huo umegubikwa na ubadhilifu wa zaidi ya Sh1.5 bilioni na Serikali kupitia vyombo vyake vya uchunguzi imeanza kulifanyia kazi.

Rais Magufuli pia alisema Serikali haitatoa chakula kwa watu watakaolalamika njaa na kuwataka watumie vizuri mvua zinazoendelea kwa kulima.

“Mvua inanyesha halafu nije nikugawie chakula? Imenyesha miezi yote halafu itokee mwezi wa ngapi mseme hamna chakula tutakufa? Kufa,” alisema

Sokwe mvuta sigara awasili Kenya

Haki miliki ya pichaAFP/GETTY

Image captionManno amekuwa akiishi nchini Iraq ambapo amekuwa akivuta sigara alizokuwa akipewa na wageni

Baada ya kutengenishwa na mamake muda mfupi baada ya kuzaliwa, sokwe Manno alisafirishwa hadi nchini Iraq ambapo aliishi akivuta sigara alizokuwa akipewa na wageni huku akipigwa picha na wageni waliokuwa wakimtembelea.

Sokwe huyo mwenye umri wa miaka minne pia angevalishwa nguo kama mtoto na kupewa vinjwaji na peremende

Kisha ukakuja msaada kutoka kwa makundi kadha ya kutunza wanyama, na sasa siku za Manno kama mvutaji sigara zimwekwisha baada ya kuwasili katika kituo cha kuwatunza sokwe kilicho nchini Kenya wiki moja iliyopita.

Haki miliki ya pichaAFP/GETTY

Image captionManno aliwasili katima kituo cha Ol Pejeta nchini Kenya mnamo Novemba 30

Wakati wa safari kati ya Dohuk na Erbil nchini Iraq watu waliokuwa wakimsafirisha walikuwa umbali wa kilomita 20 kutoka mji wa Mosul ambapo kuna mapigano makali kati ya jeshi la Iraq na kundi la Islamic State.

Baada ya siku kadha za safari akiwa amefungiwa kwenye kisanduku kidogo, Manno aliwasili katima kituo cha Ol Pejeta mnamo Novemba 30 ambacho kimekuwa kikiwatuza sokwe walio kwemye hatari wa kuangamia tangu mwaka 1993.

Manno ambaye anaaminiwa kuzaliwa mjini Damascus nchini Syria hajaishi maisha ya kawaida tangu auzwe kinyume cha sheria mwaka 2030 kwa dola 15,000.

Ujio wa ndege ya Emirates ulivyosisimua biashara Dar

Dar es Salaam. Neema zilizoachwa na ujio wa ndege kubwa aina ya Airbus A380-800 inayomilikiwa na Shirika la Ndege la Emirates jijini Dar es Salaam zimeendelea kutajwa.

Aprili 25, ndege hiyo ya abiria ambayo ni kubwa zaidi miongoni mwa zilizowahi kutua hapa nchini, ilitua katika Uwanja wa Ndege wa Kimataifa wa Julius Nyerere (JNIA) kwa dharura na ghafla biashara katika uwanja huo na sekta ya hoteli ikaongekeza.

Imeelezwa kuwa, ujio wa ndege hiyo haukuacha neema kwa hoteli za kitalii ambazo abiria wake waliokuwa wakielekea Mauritius pekee walilala, bali hata Serikali kupitia baadhi ya taasisi zake zilinufaika.

Ndege hiyo iliyokuwa na abiria 475 na wahudumu 27, ilishindwa kutua nchini Mauritius kutokana na hali mbaya ya hewa na kumlazimu rubani wake kuchagua uwanja wa Dar es Salaam kutua kwa dharura.

Ndege hiyo iliyotua Aprili 25 saa saba mchana, iliondoka siku iliyofuata saa 2:15 asubuhi kuendelea na safari yake.

Mkurugenzi Mkuu wa Mamlaka ya Usafiri wa Anga Tanzania (TCAA), Hamza Johari alisema jana kuwa, japokuwa ndege hiyo ilikuja wakati mgumu ambao ndege nyingine zilikuwa zimetua, ilihudumiwa sambamba na abiria wa ndege zingine.

Licha ya kuziingizia fedha hoteli walizolala wasafiri liliokuwa nao, Johari alisema pia Emirates iliingizia Serikali mapato kutokana na mafuta iliyowekewa ndege hiyo.

Alisema ndege hiyo yenye uwezo wa kubeba lita 320,000 za mafuta, ilinunua lita 98,000 katika uwanja huo.

“Ilikuja kwenye peak time (muda mgumu) kwa sababu kulikuwa na ndege nyingine zinakuja kama Emirates (nyingine), Qatar, Ethiopia na nyinginezo ambazo kwa pamoja kulikuwa na abiria zaidi ya 2,000 lakini tuliwasimamia vizuri. Kwenye hilo tukawa tumefanya biashara,” alisema Johari. “Baada ya kuondoka asubuhi walitaka kujaza mafuta, ndege ile inakunywa lita 320,000 lakini pale ilikunywa lita 98,000.”

Hata hivyo, meneja wa operesheni wa kampuni ya Puma Energy, Raymond Tungaraza alikataa kutaja bei ya mafuta hayo akisema sera za ushindani wa biashara haziruhusu. Serikali ni mmiliki mwenza wa Puma Energy.

“Tuna taratibu zetu za ushindani wa kibiashara zinazotuzuia kutaja bei ya mafuta, lakini kwa kawaida bei yake inakuwa chini ya mafuta ya taa kwa sababu hayana kodi ya ongezeko la thamani. Lakini hayo ni mafuta mengi japo ni kama theluthi moja tu ya uwezo wa ndege hiyo,” alisema Tungaraza.

Johari alitaja huduma muhimu zilizotumiwa na ndege hiyo kuwa ni pamoja na mashine za ardhini za kusukuma ndege nyuma kabla haijaruka (push back) na ngazi za kushuka na kupandia abiria ambazo hutolewa kwa tozo maalumu, huku akitaja tozo ya kutua na kupaa kuwa ni Dola 620 (zaidi ya Sh1.53 milioni).

Kuhusu malazi ya abiria pamoja na wahudumu, alisema walitumia hoteli za nyota tano na nne ambazo ni Serena, Golden Tulip, Southern Sun na New Africa.

Baadhi ya wenye hoteli hizo walipoulizwa kwa simu jana hawakutaka kuzungumzia wateja wao, wala biashara hiyo ya ghafla.

Kaimu meneja wa Mamlaka ya Viwanja vya Ndege Tanzania (Taa), Joseph Nyahade alisema japo bado hawajapiga hesabu kamili, lakini ni wazi ujio wa ndege hiyo uliongeza mapato yao. “Ile ni ndege kubwa na ilikuwa na abiria 475, kwa hiyo walikuwa wakihitaji huduma kubwa. Kama ni ngazi tuliwapatia, huduma ya usafi ilifanyika vizuri na zote hizo zinalipiwa. Sisi wenyewe kama mamlaka tulilipwa ada kubwa kulingana na ndege yenyewe, japo kwa sasa bado hatujapiga hesabu za mwisho,” alisema Nyahade.

Alisema mamlaka zote ikiwamo Idara ya Uhamiaji, Mamlaka ya Mapato Tanzania (TRA) na hoteli zilizopata wageni, ziliingiza mapato ya ghafla.

Kuhusu vigezo vilivyozingatiwa hadi ndege hiyo kutua Dar es Salaam, Johari alisema ni ubora wa uwanja kwani ndege hiyo inahitaji njia ya kutua yenye urefu wa kilomita tatu na upana wa mita kati ya 60 hadi 75.

“Kulingana na ndege aliyonayo, rubani ataangalia ‘running way capacity’, uwanja wa JNIA una urefu wa kilometa 3.1 umezidi kidogo na upana wa mita 60,” alisema.

Alitaja pia ubora wa mitambo ya uongozaji ndege inayomwezesha rubani kutua kwenye mistari maalumu bila kukosea na mifumo ya mawasiliano.

Vilevile, alisema huduma ya udhibiti wa moto ni kigezo kingine ambacho kwa JNIA ni ya kiwango kinachotakiwa ambacho ni namba tisa na ndicho kilichopo.

“Rubani pia anazingatia mitambo ya kutoa huduma za ardhini ikiwa pamoja na ngazi za kushukia abiria. Je, kuna mtambo wa kuwashia? (air starting unit) kwa sababu si muda wote ndege inakuwa ‘on’ (imewashwa). Wakati wa kuondoka kuna mtambo wa kuisukuma nyuma? Anataka kujiridhisha na mtoaji wa mafuta (fuel farm),” alisema.

Alitaja pia kiwango cha usalama (safety maturity level) akisema kwa sasa kimepanda kutoka asilimia 37.8 ya mwaka 2013 katika ukaguzi waliofanyiwa na Shirika la Usafiri wa Anga Duniani hadi asilimia 64.35 mwaka 2017.

“Aviation security level’ tulipokaguliwa tulipata asilimia 83, kwa hiyo tuko vizuri katika masuala ya usalama,” alisema Johari na kuongeza,“Hata kwenye operesheni wakiwamo marubani wa ziada pia wanapatikana.”

Hata hivyo, alitaja changamoto za kutokuwapo kwa mapokezi ya ghorofa katika uwanja huo, hivyo abiria waliokuwa ghorofani kushindwa kupokewa moja kwa moja kutoka kwenye ndege kuingia kwenye jengo la abiria.

“Somo kubwa tulilojifunza, tumepata kujiamini zaidi kwamba tunaweza kuhudumia ndege kubwa,” alisema.

Kutokana na kupanda hadhi hiyo, Johari alisema Rais wa Shirika la Usafiri wa Anga Duniani, Dk Bernard Alio atakuja Tanzania kutoa tuzo kwa Rais John Magufuli atakapoalikwa.

Pia, Johari alithibitisha kuteuliwa kwake kuwa mwenyekiti wa Afrika wa Shirika la Kimataifa la Huduma za Anga na Uongozaji wa Ndege, (Cano).

Kikwete aungana na Mkapa kuhusu janga la elimu, aliangalia kwa Afrika

Rais mstaafu Jakaya Kikwete akizungumza katika mkutano wa viongozi wastaafu wa Afrika uliofanyika nchini Marekani. Katikati ni Waziri Mkuu mstaafu wa Cape Verde, Carlos Veiga na kulia ni Rais mstaafu wa Nigeria, Olusegun Obasanjo. Picha ya mtandao 

Dar es Salaam. Rais wa Serikali ya Awamu ya Nne, Jakaya Kikwete ameingia kwenye mjadala kuhusu hali mbaya ya elimu, lakini akijikita zaidi kwa kuangalia Bara la Afrika.

Suala la hali mbaya ya elimu limeibua mjadala tangu Rais wa Serikali ya Awamu ya Tatu, Benjamin Mkapa kupendekeza kuanzishwa kwa mjadala wa kitaifa kuhusu sekta ya elimu kutokana na matokeo mabaya ya shule za Serikali.

Lakini Kikwete aliangazia suala hilo katika wigo mpana zaidi wakati alipokuwa akizungumza kwenye kongamano lililopewa jina la “Mageuzi ya Afrika Katika Karne ya 21” lililoandaliwa na Taasisi ya Masomo ya Afrika ya Chuo Kikuu cha Harvard nchini Marekani.

Kikwete, ambaye alikuwa mmoja wa wasemaji wakuu wanne kwenye kongamano hilo, alisema Afrika inaweza kuwa inapiga hatua katika kuendeleza elimu, lakini inahitaji kuongeza juhudi hasa kutoka elimu ya msingi hadi sekondari.

“Kwa kuangalia takwimu, Afrika ni bara la wahitimu wa elimu ya msingi,” alisema Kikwete katika mada yake kwenye kongamano hilo na kukaririwa na tovuti ya africanews.com.

“Ni asilimia 20 ya vijana wanaweza kwenda shule za sekondari. Kibaya zaidi, hata hao wachache wanaofanikiwa kwenda sekondari hawafanyi vizuri.

“Kwa wastani katika nchi nyingine duniani, karibu asilimia 30 ya wanafunzi wa elimu ya juu ya sekondari, wanakwenda vyuo vya ufundi stadi; barani Afrika ni chini ya asilimia 20.”

Wazungumzaji wengine katika kongamano hilo walikuwa John Agyekum Kuffor ambaye alikuwa Rais wa Ghana, Olesegun Obasanjo (Rais wa mstaafu wa Nigeria) na Carlos Verga (Waziri Mkuu mstaafu wa Cape Verde).

Kikwete pia alisisitiza haja ya kuweka mkazo katika kuwapa elimu wasichana wadogo, akisema, “Wakati wasichana wadogo wanapoolewa, wananyimwa fursa sawa ya kupata elimu.”

Rais huyo mstaafu alisema kuna haja ya kuweka mkazo katika teknolojia kwa ajili ya kuboresha maendeleo ya Afrika kwa kuwekeza zaidi katika masomo ya teknolojia ya sayansi, uhandisi na hisabati (Stem).

Mkapa pia ameliona

Kikwete aliangazia zaidi matatizo ya elimu barani Afrika, lakini hoja kwamba hata hao wachache wanaovuka elimu ya msingi kwenda sekondari hawafanyi vizuri inalingana na kauli ya Rais mstaafu Mkapa na mkuu wa zamani wa Chuo Kikuu cha Dodoma (Udom), Profesa Casmir Rubagumya ambao wanaona janga hilo la elimu kwa kuangalia ubora wa wanafunzi wanaojiunga na vyuo vikuu na matokeo ya shule za Serikali.

Mkapa ambaye ni mkuu wa Udom, alisema kuna janga katika elimu nchini na kushauri kuitishwa kwa mdahalo wa wazi wa kitaifa utakaoshirikisha makundi yote ya jamii.

Mkapa alikuwa akizungumzia suala hilo kwa mara ya pili baada ya Novemba 11, 2017 kuwaambia washiriki wa kongamano la wanataaluma Udom, kwamba Tanzania haijaweka msukumo katika kutafakari upya mfumo wa elimu.

“Tunahitaji kufanya mapinduzi kwenye elimu,” alisema Mkapa.

“Ninaamini kabisa kwamba tuna crisis (janga). Ninasoma katika magazeti, ninaletewa presentation (mawasilisho) kutoka sekta binafsi, walimu, private university (vyuo binafsi). Napata pia minong’ono kutoka vyuo vya umma kwamba kuna crisis katika elimu.”

Mkapa alisema njia moja ya kujua mwenendo wa mambo ni kusoma barua za wasomaji, akitumia uzoefu wake wa uhariri katika magazeti ya Uhuru, Mzalendo, Daily News na Sunday News.

“Nimeendelea kusoma magazeti sana mpaka mke wangu ananilalamikia. Lakini (barua za wasomaji) nyingi zinalalamika zinasema hivyohivyo. Zinasema elimu yetu ina mushkeli,” alisema.

Alisema wapo watu wanaolalamika kuhusu lugha, ratiba, ushirikiano, lakini pia kuhusu ushirikishwaji wa wahitimu, wanaofanya kazi na wazazi ili kuamua Taifa linakwendaje katika elimu siku zijazo.

“Katika (shule) kumi za kwanza (katika matokeo ya mitihani ya kitaifa), ukiangalia unaweza kuwa na uhakika kuwa nane si za Serikali ni za watu binafsi. Kama Serikali ndio mhimili mkuu wa elimu, kuna kasoro gani?” alihoji.

Alishauri kuitishwa kwa mdahalo wa kitaifa ambao utashirikisha makundi yote na kusikia maoni yao badala ya kuwaachia wanataaluma pekee ambao alisema wanaegemea kwenye ujuzi wao.

Msomi atumia mtandao

Maoni kama hayo kuhusu hali mbaya ya kielimu pia yalitolewa na Profesa Rubagumya.

Katika habari iliyotumwa kwenye mtandao wa kijamii wa Facebook, Profesa Rubagumya anasema uzoefu wake wakati akiwa mkuu wa Udom ulimfungua macho kuhusu hali ya elimu nchini.

“Kipindi changu nikiwa mkuu wa Chuo Kikuu cha Dodoma kilinifungua macho kujua hali ya elimu nchini inavyozidi kuwa mbaya. Kiwango cha wanafunzi tunaowapokea kutoka shule za sekondari kilikuwa kibaya zaidi ya nilichokiona Chuo Kikuu cha Dar es Salaam,” anasema Profesa Rubagumya katika ukurasa huo wa Facebook.

“Kila mwaka tulipokea mazao mabaya zaidi ya mwaka uliotangulia. Wanafunzi walikuwa hawawezi kuwasiliana vizuri ama kwa Kiswahili au Kiingereza. Tatizo halikuwa lugha pekee, bali kutokuwa na uwezo wa kufikiria vizuri kwa kutumia lugha yoyote.

“Wanafunzi pia walikuwa hawana ufahamu wa mambo ya kawaida ya msingi kuhusu dunia na hata kuhusu Tanzania. Siku moja nilistushwa baada ya kujua kwamba mwanafunzi wa mwaka wa pili wa chuo kikuu hakuwa akijua hata jina la Makamu wa Rais, kitu ambacho mtoto hata wa darasa la pili angetegemewa kuwa anakifahamu.”

Profesa anasema katika tukio jingine, mwanafunzi wa mwaka wa mwisho wa chuo kikuu ambaye masomo yake yalijikita katika Kiswahili, aliandika barua ambayo haikuwa inaeleweka.

“Hiki ni kitu ambacho mtu hawezi kukitatua chuo kikuu. Ni dalili za tatizo kubwa zaidi na la kimsingi zaidi katika mfumo mzima wa elimu nchini,” anasema.

“Na si tatizo linalokikabili Chuo Kikuu cha Dodoma pekee. Katika jukumu langu kama msimamizi wa mtihani wa nje, nilibaini tatizo hilohilo katika vyuo vikuu vingine.”

Anasema wanafunzi wa sasa ni wa kizazi tofauti ambao hawapendi maisha ya kisomi na wengi wao wanataka njia za mkato kupata vyeti.

“Mtindo huo unahusisha kuhonga wakati wa kutoka daraja moja kwenda jingine kuanzia elimu ya msingi hadi chuo kikuu. Kwa bahati mbaya, baadhi ya walimu na wazazi ni sehemu ya mchezo huu mchafu, ambao unaonyesha sababu za kuwa na vyeti vingi vya kughushi katika madaraja tofauti,” anasema.

“Pia tuna wanafunzi ambao wanawalipa watu wawaandikie tasnifu (dissertations). Hayo yote ni dalili zinazotia wasiwasi kuwa mfumo wa elimu haufanyi kazi vizuri.”

Wabunge wahoji kufungiwa magazeti, nyimbo za wasanii

Naibu Waziri wa Habari, Utamaduni, Sanaa na Michezo, Juliana Shonza 

Dodoma. Wakati wabunge wakihoji sababu za Serikali kufungia magazeti, kutoweka kwa mwandishi wa habari na kufungia nyimbo za wasanii, Kamati ya Bunge ya Huduma na Maendeleo ya Jamii imeitaka kueleza lini itakamilisha kutunga kanuni za Sheria ya Huduma za Habari ya mwaka 2016 ili itekelezwe kikamilifu.

Walisema hayo jana bungeni mjini Dodoma wakichangia mjadala wa bajeti ya Wizara ya Habari, Utamaduni, Sanaa na Michezo kwa mwaka 2018/19 ambapo wizara imeomba kuidhinishiwa Sh33.3 bilioni.

Mbunge wa viti maalumu (Chadema), Devotha Minja alisema kufungiwa kwa magazeti na Serikali kuanza utaratibu wa kusajili magazeti kila mwaka, si jambo sahihi na linalenga kudhoofisha vyombo vya habari nchini. “Katiba ya nchi inasema ni haki ya kila Mtanzania kupata taarifa, sasa kwa nini mnakuja na vigezo kuwa kila mwaka gazeti lisajiliwe upya. Hili ni makusudi tu kwamba yale ambayo yatakuwa hayaimbi mapambio ya Serikali mwaka unaofuata hayatapewa usajili. Rwanda ndio wenye utaratibu huu,” alisema Devotha ambaye kitaaluma ni mwandishi wa habari.

Alisema wakati magazeti hayo yakifungiwa, Bunge limekuwa likichagua picha za video za vikao vya Bunge kwa ajili ya vyombo vya habari na kubainisha kuwa video hizo zinakatwa katika maeneo ambayo wabunge wameikosoa Serikali.

Kuhusu Mamlaka ya Mawasiliano Tanzania (TCRA) kuanza kuzibana televisheni, ikiwa ni pamoja na kuzitoza faini alisema ni mwendelezo kama wa kufungia magazeti na hilo litasababisha wawekezaji kukimbia nchini.

Devotha pia alizungumzia matukio ya waandishi wa habari kupotea, kutekwa na kutishiwa maisha akihoji sababu za Serikali kutotoa matamko ya kulaani vitendo hivyo. Mbunge wa Geita Vijijini (CCM), Joseph Kasheku maarufu Musukuma alisema wasanii wa muziki wa kizazi kipya nchini wanaitangaza nchi lakini mwenendo wa kufungia nyimbo zao, huenda ukashusha juhudi zao.

“Kipindi cha hivi karibuni kumeibuka fungiafungia. Msanii anafanya kazi yake nzuri ikitokea akakosea kidogo kwa kuonyesha mpasuo anafungiwa. Mnafungia nyimbo kwa sababu ya mpasuo wakati mnakaa na kutazama nyimbo za akina Rihanna kwenye Youtube,” alisema Musukuma.

“Mnataka wasanii wetu wavae madera? Waziri ukiangalia wasanii wanafanya kazi nzuri, wanatumia gharama kubwa na wakikosea tu mpasuo wanafungiwa, lakini ukienda kule Samora mbona kuna wanawake wanavaa nguo zenye mipasuo na hawafungiwi,” alisema.

“Mngetafuta muda wa kuwapatia semina badala ya kuwaacha wanafanya kazi nzuri wanatumia gharama kubwa na wakikosea mnawafungia,” alisema Musukuma.

Majibu ya mawaziri

Akijibu hoja za wabunge kuhusu kufungiwa kwa baadhi ya nyimbo za wasanii, Naibu Waziri wa Habari, Utamaduni, Sanaa na Michezo, Juliana Shonza alisema baadhi ya wahusika hawazipeleki Basata kukaguliwa licha ya kuwapo kwa kanuni zinazowataka kupeleka kazi zao kabla ya kuzitoa. “Serikali haina ugomvi na wasanii, ina ugomvi na mmomonyoko wa maadili uliopo katika nyimbo zao,” alisema Shonza.

Aliwataka wasanii kuzingatia jambo hilo, akiwataka kuhakikisha wanapeleka nyimbo zao Basata kabla ya kuziachia katika vyombo mbalimbali vya habari.

Akijibu hoja za wabunge walizozitoa katika mjadala wa bajeti hiyo, Dk Mwakyembe alisema kuwa kanuni za sheria mpya ya habari zimeshatungwa na tayari zimeanza kutumika.

Kuhusu kuanzisha Bodi ya Ithibati na Baraza Huru la Habari alisema uanzishwaji wake unategemea zaidi vyombo vya habari na kubainisha kuwa Serikali haiwezi kuanzisha kwa kuepuka watu kusema kuwa ni vya Serikali. “Lengo ni kutaka vyombo vya habari kujiendesha vyenyewe,” alisema.

Akizungumzia magazeti kusajiliwa kila mwaka, alisema husajiliwa mara moja tu na kwamba kila mwaka huwa zinatolewa leseni kwa kuwa yako mengi lakini mengine hayafanyi kazi.

Akijibu swali kuhusu vyombo vya habari kufungiwa, hasa magazeti, Dk Mwakyembe alisema Sheria ya Huduma za Habari inaeleza makosa ambayo vyombo vya habari vinaweza kufungiwa vikikiuka na vinapomaliza adhabu wahusika hujifunza na kutii sheria hiyo.

Wizara ya Habari kutekeleza mambo 10 bajeti ya 2018/19

Waziri wa Habari, Utamaduni, Sanaa na Michezo, Dk Harrison Mwakyembe 

Dodoma. Wizara ya Habari, Utamaduni, Sanaa na Michezo imeomba kuidhinishiwa Sh33.2 bilioni katika bajeti ya mwaka 2018/19, huku ikieleza mambo 10 itakayoyatekeleza kupitia taasisi zilizo chini ya wizara hiyo katika mwaka huo wa fedha unaoanza Julai mosi.

Miongoni mwa mambo hayo ni kuendelea kutoa elimu juu ya kanuni mpya za maudhui kwenye redio na televisheni zilizotungwa chini ya Sheria ya Mawasiliano ya Kielektroniki na Posta ya mwaka 2010, inayowabana wanaotumia vibaya mitandao ya kijamii.

Akiwasilisha bajeti hiyo bungeni mjini Dodoma jana, waziri wa wizara hiyo, Dk Harrison Mwakyembe alisema katika mwaka huo wizara hiyo kupitia Idara ya Habari (Maelezo) pamoja na mambo mengine itaratibu kuanzishwa kwa vyombo vipya vya usimamizi wa masuala ya habari kama dawati la matangazo ya Serikali. “Pia Bodi ya Ithibati na Baraza Huru la Habari vilivyoanzishwa chini ya sheria namba 12 ya Huduma za Habari ya mwaka 2016,” alisema.

Kuhusu Shirika la Utangazaji (TBC), alisema litaanzisha chaneli ya utalii itakayorusha na kutangaza vipindi vinavyohusiana na maliasili zilipo nchini na kukuza utalii wa ndani na nje ya nchi.

Akizungumzia kanuni mpya za maudhui ambazo zinasimamiwa na Mamlaka ya Mawasiliano (TCRA), Dk Mwakyembe alisema msingi wake ni kuhakikisha teknolojia inatumika badala ya kututumikisha na kuvuruga mustakabali wa maadili ya Taifa.

Alisema moja ya malengo ya kanuni hizo ni wahusika kuingia katika mfumo rasmi wa kutambulika kisheria na kuwajibika kulipa kodi watoa huduma wa picha jongevu za habari na burudani, na kutoa matangazo kwa njia ya mtandao (bloggers). “Zinamtaka kila mtumiaji wa mtandao awe na namba yake ya siri ili wajanja wasitumie kiurahisi chombo chake cha mawasiliano kutenda matendo hasi kinyume na sheria,” alisema.

“Zinazuia usambazaji wa kauli chafu, matusi, picha mgando na jongevu za utupu na zenye maudhui yasiyofaa kwa watoto.”

Alisema kanuni hizo pia zinataka redio na runinga kutoa kipaumbele kwa muziki wa Kitanzania kati ya saa 11:30 alfajiri hadi saa 3:00 usiku na kwamba, muziki wa Kitanzania uchukue asilimia 80 ya muda huo.

Kuhusu Baraza la Kiswahili la Taifa (Bakita), alisema litakuwa na jukumu la kukitangaza, ikiwa ni pamoja na kuchapisha kamusi na kusajili wataalamu 500 wa lugha hiyo.

Mambo mengine yatakayofanywa na wizara hiyo ni kusimamia majukumu yanayofanywa na Bodi ya Filamu Tanzania, Baraza la Sanaa la Taifa (Basata), Taasisi ya Sanaa na Utamaduni Bagamoyo na Baraza la Michezo la Taifa (BMT).

Dk Mwakyembe aliliomba Bunge kuiidhinishia wizara hiyo bajeti ya Sh33.3 bilioni, kati ya fedha hizo Sh15.2 bilioni ni kwa ajili ya mishahara, Sh9.3 bilioni kwa ajili ya matumizi mengineyo na Sh8.7 bilioni za miradi ya maendeleo.

Waziri huyo pia aligusia utekelezaji wa bajeti ya mwaka 2017/18 inayoishia Juni mwaka huu, kwamba mpaka kufikia Machi mwaka huu, wizara hiyo ilikuwa imepokea kiasi cha Sh18.1 bilioni ambayo ni sawa na asilimia 64 ya bajeti yote ya Sh28.2 bilioni.