Serikali kutoa muongozo was utoaji tiba kwa hospitali nchini

Wizara ya Afya,Maendeleo ya Jamii,Jinsia,Wazee na watoto inatarajia kutoa mwongozo wa utoaji tiba kwenye hospitali zote nchini ili kuwe na mfumo mzuri wa dawa muhimu ili kuepusha madaktari kuagiza dawa ambazo zipo nje ya mfumo wa dawa muhimu.

Hayo yamesemwa na Naibu Waziri wa Afya Dkt.Faustine Ndugulile wakati wa ziara yake ya kuangalia hali ya upatikanaji wa dawa kwenye vituo vya kutolea huduma za afya vya Serikali .

“Kabla ya mwisho wa mwaka tunataka kutoa muongozo huo(Standard Treatment Guidline) kwa sababu imekua changamoto kwani wale wauzaji wakubwa wa dawa wamekua wakizitembelea hospitali kubwa na kuwarubuni wanunue dawa zao ambazo zipo nje ya dawa zetu muhimu”

Kwahiyo muongozo huo itakua kila ugonjwa dawa ya kwanza itakua ipi na kama itashindika dawa itakayofuata dawa ipo na hizo dawa zitaagizwa na kutunzwa na Bohari ya Dawa(MSD).

Hata hivyo Dkt.Ndugulile amewataka watendaji wa hospitali hiyo kuweka utaratibu na mpangilio mzuri na unaohitajikwa wa utunzaji wa dawa kwenye stoo ya madawa iliyopo hospitalini hapo,baada ya kukuta hakuna upangaji mzuri wa dawa na vifaa tiba “mmenithibitishia kwamba dawa zote mnazipata kwa asilimia 90 hivyo ni vyema Mfamasia wa Wilaya kuzipanga dawa hizo vizuri na kuweka kiyoyozi ambacho kitasaidia kutunza dawa kwa muda bila kuharibika”

Alisema hivi sasa nchi haina tatizo la upatikanaji wa dawa kwani bajeti ya dawa hivi sasa imeongezeka kutoka shilingi bilioni 30 mpaka zaidi ya bilioni 260 kwa mwaka huu wa fedha “bajeti hii imekua ikitolewa na Mhe.Rais amekua akizitoa fedha zote,hivyo hatuna shida ya fedha hivyo nasi hatutarajii kuwa na shida ya dawa na dawa tunazokuwa tunazipata zitunzwe vizuri”.

Aidha,amezitaka kamati za afya katika ngazi za zahanati,vituo vya afya na hospitali zinafanya kazi ipasavyo kwa kusimamia matumizi mazuri ya dawa.

Kwa upande wa ubora wa huduma za afya kwa vituo vya kutolea huduma za afya vya serikali hivyo kumekua na mkakati wa kuwa na ubora wa vituo vya serikali kwa kuwapatia nyota kulingana na ubora uliopo kwenye vituo kwa kuangalia utoaji wa huduma,maabara na sehemu zingine za kutolea huduma.

Kwa upande wa Mfuko wa afya wa jamii(CHF) Dkt.Ndugulile amewapongeza wilaya hiyo kwa kusajili kaya 13,788 kutoka 978 mwaka 2016/2017,ambapo wamewapatia vitambulishovya matibabu wazee 4,000.“hivi sasa Serikali inataka kuwa na bima kwa wote kwani gharama ya matibabu kwa sasa ni kubwa sana hasa na kumekua na ongezeko la magonjwa yasiyo ya kuambukizwa,hivyo tunataka kuwasaidia wananchi ambao hawawezi kumudu gharama hizo ili anavyokwenda kwenye vituo vyetu asiwaze masuala ya kutoa fedha”alisema Dkt.Ndugulile.

Akisoma ripoti ya Wilaya hiyo Kaimu Mganga Mkuu wa Wilaya hiyo Dkt. Ernest Ntahuka Alisema Halmashauri hiyo imeweza kuboresha hali ya upatikanaji wa dawa kwa asilimia 85 kutoka asilimia 60 ya mwaka 2015/2016.Hata hivyo alisema Halmshauri ya Ruangwa kwa mwaka 2017/2017 imetenga shilingi milioni 650 kwa ajili ya ujenzi wa hospitali mpya ya wilaya na tayari imeshatenga eneo la ujenzi lenye ukubwa wa hekari 60 ambapo ramani ya ujenzi huo tayari imeandaliwa

RAIS MAGUFULI MGENI RASMI UZINDUZI WA HOSPITALI YA TAALUMA MUHAS KAMPASI YA MLOGANZILA

Kaimu Mkuu wa Chuo Kikuu cha Afya na Sayansi Shirikishi Muhimbili (MUHAS) Prof. Appolinary Kamuhabwa akizungumza na Waandishi wa Habari kuhusu uzinduzi wa Hospitali ya Taaluma na Tiba ya Chuo Kikuu cha Afya na Sayansi Shirikishi Muhimbili – MUHAS Kampasi ya Mloganzila leo Jijini Dar es Salaam. Kutoka kushoto ni Naibu Makamu Mkuu wa Chuo Huduma za Hospitali Prof. Said Abood. Uzinduzi huo utafanyika tarehe 25 Novemba 2017 ambapo mgeni rasmi anatarajiwa kuwa Rais Dkt. John Pombe Magufuli.

Kaimu Mkuu wa Chuo Kikuu cha Afya na Sayansi Shirikishi Muhimbili (MUHAS) Prof. Appolinary Kamuhabwa akizungumza na Waandishi wa Habari kuhusu uzinduzi wa Hospitali ya Taaluma na Tiba ya Chuo Kikuu cha Afya na Sayansi Shirikishi Muhimbili – MUHAS Kampasi ya Mloganzila leo Jijini Dar es Salaam. Kutoka kushoto ni Naibu Makamu Mkuu wa Chuo Huduma za Hospitali Prof. Said Abood na Afisa Habari wa Idara ya Habari (MAELEZO) Jonas Kamaleki. Uzinduzi huo utafanyika tarehe 25 Novemba 2017 ambapo mgeni rasmi anatarajiwa kuwa Rais Dkt. John Pombe Magufuli.

Naibu Makamu Mkuu wa Chuo Kikuu cha Afya na Sayansi Shirikishi Muhimbili (MUHAS) anayeshughulikia Huduma za Hospitali Prof. Said Abood akifafanua jambo mbele ya Waandishi wa Habari kuhusu uzinduzi wa Hospitali ya Taaluma na Tiba ya Chuo Kikuu cha Afya na Sayansi Shirikishi Muhimbili – MUHAS Kampasi ya Mloganzila leo Jijini Dar es Salaam. Kutoka kushoto ni Kaimu Mkuu wa Chuo Kikuu cha Sayansi na Tiba Muhimbili (MUHAS) Prof. Appolinary Kamuhabwa na Daktari Bingwa wa Magonjwa ya dharura Dk. Hendry Sawe. Uzinduzi huo utafanyika tarehe 25 Novemba 2017 ambapo mgeni rasmi anatarajiwa kuwa Rais Dkt. John Pombe Magufuli.

Daktari Bingwa wa Magonjwa ya dharura wa Chuo Kikuu cha Afya na Sayansi Shirikishi Muhimbili (MUHAS) Dk. Hendry Sawe akielezea jambo mbele ya Waandishi wa Habari kuhusu uzinduzi wa Hospitali ya Taaluma na Tiba ya Chuo Kikuu cha Afya na Sayansi Shirikishi Muhimbili – MUHAS Kampasi ya Mloganzila leo Jijini Dar es Salaam. Kutoka kulia ni Afisa Habari wa Idara ya Habari (MAELEZO) Jonas Kamaleki, Kaimu Mkuu wa Chuo Kikuu cha Sayansi na Tiba Muhimbili (MUHAS) Prof. Appolinary Kamuhabwa na Naibu Makamu Mkuu wa Chuo Kikuu cha Afya na Sayansi Shirikishi Muhimbili (MUHAS) anayeshughulikia Huduma za Hospitali Prof. Said Abood. Uzinduzi huo utafanyika tarehe 25 Novemba 2017 ambapo mgeni rasmi anatarajiwa kuwa Rais Dkt. John Pombe Magufuli.Picha na: Frank Shija – MAELEZO

HAYA NDIYO MAAJABU YA KIMONDO CHA MBOZI KILICHOPO MKOANI SONGWE

Naibu Waziri wa Maliasili na Utalii, Mhe. Japhet Hasunga (wa pili kulia) akiwa ameshikilia kivutio cha utalii cha Kimondo leo wakati wa ziara yake ya kikazi katika kijiji cha Ndolezi wilaya ya Mbozi Mkoani Songwe.

Kimondo hicho kinachokadiriwa kuwa na tani 12 kiligunduliwa wilayani Mbozi mwaka 1930 na kimeundwa kwa madini ya Chuma 90%, Nickel 8.69%, Copper 0.66%, Sulphur 0.01% na Phosphorus 0.11.

Aidha, kimondo hiki ni cha pili kwa ukubwa kati ya 35 vilivyopo barani Afrika na cha nane kati ya 578 vilivyopo duniani kote ambavyo vimeundwa kwa chuma. Sifa kuu ya kimondo hiki ni kuwa na ubaridi wakati wote hata mchana wa jua kali.

Pamoja na mambo mengine katika ziara hiyo, amekagua ujenzi unaoendelea wa jengo la kituo cha taarifa (Information Centre) katika kivutio hicho ambalo linagharimu Shilingi milioni 400. 

Alisema Serikali kupitia wizara yake ina mpango thabiti wa kuendeleza kivutio hicho pamoja na vivutio vya ukanda wa kusini ambapo kupitia Benki ya Dunia imepata mkopo nafuu wa Dola za Kimarekani milioni 150 sawa na shilingi bilioni 340 kwa ajili ya kuendeleza vivutio vya ukanda wa kusini ikiwemo kuimarisha miundombinu.

Vivutio vingine vya utalii vinavyopatikana Mkoani Songwe ni pamoja na chemchem ya maji moto, vitalu vya uwindaji vyenye wanyamapori mbalimbali, mifupa ya shingopana songwensis, unyayo wa mtu wa kale, mapango ya popo, maporomoko ya maji, mbega weupe, kituo cha kwanza cha polisi Tanzania, mabaki ya nyumba za kufua chuma,  na ziwa Rukwa

Naibu Waziri wa Maliasili na Utalii, Mhe. Japhet Hasunga (kulia) akisikiliza maelezo kutoka kwa Muhifadhi wa Mambo ya Kale, Winnie Msacky kuhusu kivutio cha utalii cha Kimondo wakati wa ziara yake ya kikazi katika kijiji cha Ndolezi wilaya ya Mbozi Mkoani wa Songwe jana. 

Jengo la kituo cha taarifa katika eneo la kivutio hicho (Information Center) ambacho ujenzi wake unaendelea. Ujenzi wa kituo hiki unagharimu Shilingi Milioni 400.

 Naibu Waziri wa Maliasili na Utalii, Mhe. Japhet Hasunga (kulia) akizungumza na baadhi ya watumishi wa kituo hicho na wananchi wa vijiji jirani.

 Naibu Waziri wa Maliasili na Utalii, Mhe. Japhet Hasunga akizungumza na watumishi pamoja na wananchi hao. 

Naibu Waziri wa Maliasili na Utalii, Mhe. Japhet Hasunga (kulia) akipata maelezo kutoka Kaimu Mkurugenzi wa Idara ya Mambo ya Kale, Bi. Digna Tilya kuhusu jengo la kituo hicho cha taarifa katika kivutio hicho. (Picha na Hamza Temba-Wizara ya Maliasili na Utalii)

MKURUGENZI WA IDARA YA USHIRIKIANO WA KIMATAIFA AKUTANA NA MSAJILI WA UN-MICT

Mkurugenzi wa Idara ya Ushirikiano wa Kimataifa katika Wizara ya Mambo ya Nje na Ushirikiano wa Afrika Mashariki, Balozi Celestine Mushy akizungumza na Msajili wa Mfumo wa Kimataifa wa kumalizia mashauri masalia ya iliyokuwa Mahakama ya Kimataifa ya Jinai ya Rwanda (MICT), Dkt. Olufemi Elias alipotembelea katika ofisi za Wizara Jijini Dar es Salaam tarehe 24 Novemba 2017. 

Kutoka kushoto ni Kaimu Mkurugenzi wa Kitengo cha Sheria katika Wizara ya Mambo ya Nje na Ushirikiano wa Afrika Mashariki, Bi. Caroline Chipeta na Maafisa mambo ya nje wakifuatilia mazungumzo. 

Maafisa walioambatana na Msajili wa UN-MICT wakifuatilia mazungumzo. 

KIJANA ANAYEDAIWA KUUA MTU ASIYEJULIKANA AFIKISHWA MAHAKAMANI

Kijana wa miaka 22, anayeishi Ipililo Maswa mkoani Shinyanga leo Novemba 24, 2017 amefikishwa katika Mahakama ya Hakimu Mkazi Kisutu kujibu tuhuma za kumuua mtu asiyejulikana.

 Kwa mujibu wa chanzo cha Habari cha uhakika kijàna huyo ambaye alikamatiwa katika kituo cha mabasi cha Ubungo jijini Dar es Salaam na alikutwa akiwa na viungo vya binadamu ambavyo ni sehemu za mbalimbali za siri za mwanamke na nyara za serikali.

Mshtakiwa Nkonja amesomewa mashtaka yake mbele ya Hakimu Mkazi Mfawidhi, Cyprian Mkeha.

Wakili wa serikali Nassoro Katuga akisoma hati ya mashtaka amedai kati ya Oktoba Mosi na 30 mwaka huu katika eneo la Kahama Shinyanga na Kituo cha Mabasi cha Ubungo jijini Dar es Salaam, alimuua mtu ambaye bado hajafahamika.

Hata hivyo, mshtakiwa hakutakiwa kujibu kitu chochote mahakamani hapo kwa kuwa Mahakama ya Hakimu Mkazi Kisutu haina mamlaka ya kusikiliza kesi za mauaji.

Kesi hiyo imeahirishwa hadi Decemba 8, mwaka huu. Upelelezi bado haujakamilika

Tanroads yataja sababu ubomoaji tofauti Barabara ya Morogoro

Tanroads imesema sheria hiyo inataja umbali tofauti wa hifadhi ya barabara katika baadhi ya maeneo na imeendelea kuwa mwongozo kwa Barabara ya Morogoro.

Dar es Salaam. Wakala wa Barabara Tanzania (Tanroads) umesema kutofautiana kwa mita zinazotumika katika ubomoaji nyumba zilizoko kuanzia eneo la Ubungo na Kiluvya, kunatokana na Sheria ya Hifadhi ya Barabara ta Mwaka 1932 na mipango ya Serikali.

Tanroads imesema sheria hiyo inataja umbali tofauti wa hifadhi ya barabara katika baadhi ya maeneo na imeendelea kuwa mwongozo kwa Barabara ya Morogoro.

Nyumba zinazobomolewa kati ya Ubungo na Kimara ziko ndani ya mita 90 kutoka katikati ya barabara, wakati zilizobomolewa kutoka Kimara Stop Over hadi Kiluvya ziko ndani ya mita 121.9.

Akizungumza na Mwananchi jana, kaimu mkuu wa Idara ya Mipango Tanroads, mhandisi Elson Mwelanzi alisema tofauti hiyo inatokana na mipango ya Serikali.

“Katika sheria hii iliyoanza eneo la Faya hadi Ubungo ni mita 22.5, kutoka Ubungo hadi Kimara Mwisho ni mita 91.7 na kutoka Kimara Stop Over hadi Kiluvya ni mita 121.9 hayo ndiyo maeneo ya hifadhi ya barabara,” alisema Mwelanzi.

Alisema sababu ya Kimara Stop Over hadi Kiluvya kuwa na umbali wa mita 121.9 ni kutokana na mpango wa Serikali wa kuwa na hifadhi kubwa ya barabara.

“Hii sheria ilibadilishwa katika maeneo mengine mwaka 1967 na baadaye mwaka 2000, lakini katika hifadhi ya Barabara ya Morogoro haijawahi kubadilishwa. Sababu mojawapo ni kwamba hii ni barabara kuu hapa nchini,” alisema.

Alisema sheria hiyo ni nzuri kwa sababu inapunguza gharama za malipo kwa wakazi waliojenga ndani ya hifadhi.

“Ujenzi ndani ya hifadhi ya barabara unasababisha miradi kuwa na gharama nyingi si tu kwa ajili ya ujenzi, bali pia kulipa wakazi waliovamia maeneo,” alisema.

“Nakumbuka watu walilalamika na wakashauri sheria hii ibadilishwe, lakini mimi sishauri hii ibadilishwe ibaki kwa sababu watu hawatajenga ndani ya hifadhi ya barabara na miundombinu itapangwa vizuri,” alisema.     

Ujenzi Bandari ya Bagamoyo kuanza Januari, Serikali yataja wabia

Waziri wa Viwanda, Biashara na Uwekezaji, Charles Mwijage akiaga baada ya kufungua kongamano la fursa za uwekezaji kati ya Tanzania na China lililoandaliwa na taasisi ya Confucius kutoka Chuo Kikuu cha Dar es Salaam. Nyuma yake ni naibu makamu wa Chuo Kikuu cha Dar es Salaam anayeshughulikia Utafiti, Profesa Cuthbert Kimambo. Picha na Ericky Boniphace 

Hilo limebainishwa jana na waziri wa Viwanda, Biashara na Uwekezaji, Charles Mwijage wakati wa ufunguzi wa kongamano la kuzungumzia ushirikiano wa Tanzania na China.

Dar es Salaam. Baada ya mchakato wa muda mrefu wa kukamilisha taratibu, Serikali imesema ujenzi wa Bandari ya Bagamoyo unatarajiwa kuanza Januari mwakani.

Hilo limebainishwa jana na waziri wa Viwanda, Biashara na Uwekezaji, Charles Mwijage wakati wa ufunguzi wa kongamano la kuzungumzia ushirikiano wa Tanzania na China.

Mwijage alisema kwamba mazungumzo ya ujenzi wake yanaonyesha dalili za kufikia muafaka.

“Katika ujenzi huo, Serikali itashirikiana na Oman na China na tayari wawakilishi kutoka nchi hizo wameshafika kwa ajili ya majadiliano,” alisema Mwijage.

Licha ya upanuzi wa bandari hiyo inayotarajiwa kuwa kubwa zaidi Afrika Mashariki, alisema kwenye eneo la eka 3,000 kutajengwa viwanda 190 kabla ya mwaka 2020 na kuiwezesha Serikali kufikia uchumi wa kati ifikapo mwaka 2025.

“Lengo ni kutaka wananchi washiriki katika uchumi kupitia viwanda hivi vya kuchakata malighafi zinazozalishwa nchini. Kujenga uchumi wa viwanda, lazima nchi iwe na miundombinu wezeshi ikiwamo ya maji, barabara, reli,” alisema Mwijage.

Alisema Serikali itajenga reli ya kisasa itakayokuwa inakusanya bidhaa zilizozalishwa na wakulima na wajasiriamali kutoka maeneo mbalimbali nchini.

Wabia kwenye mradi huo utakaokamilika mwaka 2022 na kugharimu Dola 10 bilioni za Marekani (zaidi ya Sh22.3 trilioni) ni kampuni ya China Merchants Holdings International (CMHI) kutoka nchini China na State General Reserve Fund ya Oman.

Utakapokamilika, mradi huo uliopo kilomita 75 kutoka jijini Dar es Salaam utakuwa na viwanda 700 na kuufanya kuwa eneo la kimkakati kwa uwekezaji katika ukanda wa Afrika Mashariki na kuchanguia kuinua uchumi wa Taifa.

Katika awamu ya kwanza ya uboreshaji wa Bandari ya Bagamoyo, taarifa zinaonyesha itaruhusu meli kubwa zinazobeba hadi makontena 8,000 ya futi 20 hivyo kupunguza foleni ya meli za mzigo huku kukiwa na uwezekano wa kuitanua zaidi.

Taarifa ya CMHI inayotarajiwa kutekeleza sehemu kubwa ya ujenzi huo inaonyesha Dola 120 milioni (zaidi ya Sh264 bilioni) zitatumika kujenga eneo la viwanda, Dola 70 milioni (zaidi ya Sh154 bilioni) eneo la utalii wakati Dola 90 milioni (zaidi ya Sh198 bilioni) zikijenga miundombinu ya bandari.

Pia, kutakuwapo na eneo la biashara huria litakalojengwa kwa Dola 70 milioni (zaidi ya Sh154 bilioni) na kiasi kingine kama hicho kwa ajili ya biashara za kimataifa huku Dola 50 milioni (zaidi ya Sh110 bilioni) zikijenga vituo vya sayansi na teknolojia na Dola 20 milioni (zaidi ya Sh44 bilioni).

Takwimu za Kituo cha Uwekezaji Tanzania (TIC) mpaka Juni 2016, zinaonyesha uwekezaji wa China nchini ulifika Dola 6.62 bilioni (zaidi ya Sh14.7 trilioni) kutokana kampuni takriban 600 zilizowekeza kwenye kilimo, utalii, ujenzi na teknolojia ya habari na mawasiliano.     

Nyota wa Real Madrid wapewa bure magari ya kifahari

Kampuni ya Audi ya Ujerumani hukabidhi magari hayo ya kifahari kwa kila mchezaji kila mwaka, ikiwa ni kusherehekea udhamini kwa mabingwa hao wa Hispania 

Nyota wa klabu ya Real Madrid jana Alhamisi walisherehekea siku ya udhamini wa kampuni ya Audi kwa kushindana katika mbio zisizo halisi za magari aina ya Formula E kabla ya kila mmoja kukabidhiwa gari la kifahari aina ya Audi.

Hafla kwa timu hiyo ambayo ni maarufu kwa jina la Los Blancos, ilifanyika kwenye uwanja wa mpira wa kikapu uliopo Real Madrid City na iliandaliwa na kampuni ya kutengeneza magari ya Ujerumani ya Audi kusherehekea udhamini kwa mabingwa hao wa soka wa Hispania, kwa mujibu wa gazeti la Mirror la Uingereza.

Wakiwa wamevalia suti za michezo, vijana wa Zinedine Zidane walionyeshana ukali wao katika kuendesha magari katika mashindano yasiyo halisi katika kutaka kujua mbabe miongoni mwao.

Dani Carvajal aliibuka kuwa mshindi, akimuacha Sergio Ramos, ambaye alishika nafasi ya pili, na Marco Asensio aliyekuwa wa tatu.

Baada ya mbio hizo, Audi ilimzawadia kila mchezaji gari mpya kabisa, zawadi ambayo kila mchezaji hupewa kila mwaka.

"Audi imekabidhi magari rasmi kwa wachezaji wa kikosi cha kwanza cha Real Madrid kwenye Uwanja wa Mpira wa Kikapu uliopoReal Madrid City," imeandika tovuti ya klabu hiyo.

"Florentino Pérez na Guillermo Fadda, mkurugenzi wa Audi nchini Hispania, walihudhuria hafla hiyo. Wakiwa wamevalia suti za michezo, wachezaji walifurahia mbio za magari ziszo halisi za Formula E ambazo ziliandaliwa na kampuni hiyo ya magari ya Ujerumani."

Tovuti hiyo inasema baada ya kupiga picha ya pamoja ya washindi na ile ya kila mwaka ya wachezaji wote, viongozi wa Real Madrid na Audi walipeana zawadi.

"Florentino Pérez alimpa Francisco Pérez Botello, rais wa Volkswagen Hispania, na Guillermo Fadda mashati maalum kwa ajili yao, na akapokea usukani kutoka Audi ABT Formula E," inasema tovuti ya Real Madrid.

"Baadaye wacheaji wa kikosi cha kwanza na Zinedine Zidane walikabidhiwa magari mapya kila mmoja kwa ajili ya msimu wa mwaka 2017-2018."

Unapaswa kulinda wasifu wako katika ushindani wa sasa wa ajira

Je umewahi kufikiria wasifu wako una uhusiano gani katika mwelekeo wa kufanikisha malengo, ndoto au mahitaji yako kwa hapo baadaye? Au umekuwa ni mwaathirika wa tamaa ya kuishi maisha ya watu wengine!

Dunia imetekwa na vita ya ushindani katika kila jambo hivi sasa. Hivyo, ni muhimu kwa kila mtu kutambua kila jambo unalofanya kuwa limezungukwa na mamilioni ya watu wenye uwezo wa kulifanya pengine kuliko ulionao.

Je umewahi kufikiria wasifu wako una uhusiano gani katika mwelekeo wa kufanikisha malengo, ndoto au mahitaji yako kwa hapo baadaye? Au umekuwa ni mwaathirika wa tamaa ya kuishi maisha ya watu wengine!

Wataalamu wa kazi wanasema kila mfanyakazi anabebwa na wasifu wake katika ajira yake.

Hata hivyo, uzoefu unaonyesha kuna makosa mengi yanayofanyika katika mbio za kusaka au kulinda ajira, pengine kwa kutokujua au kwa tamaa ya kujaribu kuishi wasifu wa wafanyakazi wengine.

Inawezekana wasifu wako haujatimiza ndoto zako licha ya juhudi za kujituma, uwezo na uchapakazi kwa miaka zaidi ya 20.

lakini kuna watu wengine wanafanya vizuri licha ya kuwa pamoja katika taaluma hiyo unayofanyia kazi.

Hatua hiyo inatokana na jinsi watu wanavyokufikiria, wanavyokuona na kukutafsiri katika utendaji wako wa kazi bila kujali unakubaliana nao au la.

Suala la utambulisho wa wasifu limeathiri maelfu ya wafanyakazi na wafanyabiashara.

Dosari hizo ni rahisi kuziepuka na kubadili mazingira yote yanayohusisha kuanzia mtazamo wa watu katika maisha yako, mazungumzo na vitendo au vinginevyo.

Katika makala haya, tutaangalia njia tatu zitakazosaidia kulinda au kutengeneza wasifu wako utakaosaidia kukutambulisha wewe ni nani, unaamini katika nini na unataka nini.

Watu watataka kufahamu kutoka kwako ili kujenga mtazamo chanya utakaokusaidia kufikia ndoto zako.

Kuwa wa kipekee

Hatua ya kwanza katika kutengeneza wasifu ni kuishi maisha yako. Kuna mabilioni ya watu duniani wanaoshindana kuitafuta ajira moja tu uliyonayo au mteja mmoja unayemtegemea katika bidhaa yako unayoiuza.

Lakini changamoto huja pale unapohitaji kujua ni kwa jinsi gani unahitaji kuwa wa tofauti katikati ya mabilioni ya hao.

Hata hivyo, tunaambiwa kutumia mbinu na ubunifu unaofanywa na wengi hauwezi kukufanya uonekane.

Kumekuwa na tatizo kwa mfano, kampuni X imekuwa bora katika ubunifu wa mavazi ya asili, lakini miezi kadhaa imehamia kwenye vazi linaloandaliwa na mbunifu mwingine eti kwa sababu limeteka soko kwa wakati huo.

Mfano mwingine ni mtangazaji Y wa vipindi vya Luninga ambaye leo ataonekana akitangaza kipindi cha ujasiriamali na kesho ataonekana akitangaza kipindi cha mitindo na urembo. Hii inaathiri kwa sehemu kubwa juhudi za kujenga wasifu.

Huu ni wakati wa kuanza kujitambulisha kwa upekee wako katikati ya ushindani wa maelfu ya wateja au wafanyakazi wenzako.

Hii pia inaweza kuwa muhimu katika jambo linalohusu ukuaji wako kibiashara au mahali pa kazi.

Hatua nyingine ni kuanza kuainisha vitu unavyodhani vinaweza kukufanya uwe wa tofauti kwa wengine.

Kwa mfano, unaweza kujitambulisha mbele ya umma kwa ukarimu, uaminifu, uchapakazi, ubunifu au uwazi.

Hakikisha njia hizo unazitumia katika kufanikisha malengo ya kukuza wasifu wako.

Kumbuka hatua hiyo ni sehemu ya kukutenganisha na wasifu wa wafanyakazi wengine ambao ni washindani wako.

Tafuta maarifa kwa njia mbalimbali yatakayokusaidia uwe wa tofauti kibiashara au mahali pa kazi.

Kuwa mbobezi wa jambo moja tu

Jambo hili ni muhimu unapojitambulisha kwa washindani au wafanyakazi wenzako kwamba, wategemee nini kutoka kwako.

Hauwezi kuwa bora kwa kila kitu, kwa hiyo, chagua eneo moja unaloamini kuwa bora zaidi na uanze kujisomea kila kinachohusika katika kuongeza thamani yako.

Kujitambulisha kama mtaalamu pekee haitoshi kukuza wasifu wako, lakini unahitaji kuthibitisha utalaamu huo kwa kushiriki maarifa hayo kwa wafanyakazi wenzako.

Kwa mfano, wewe ni mwandishi wa habari, umesoma taaluma ya habari lakini umechagua kuandika habari za biashara pekee.

Hakikisha unajitambulisha nafasi hiyo kwa wafanyakazi wenzako, rafiki, familia na jamaa wanaokuzunguka.

Utakapokuwa na utayari wa kufanya jambo hilo mahali pa kazi, ndiyo inavyokujengea ubobezi na wasifu wako.

Hautakosa washindani lakini ni muhimu kutafuta maarifa zaidi yanayohusiana na eneo hilo.

Kama ni fundi, hakikisha ni ufundi wa bidhaa gani. Hakikisha unakua mbunifu katika kila kitu unachotaka kukitengeneza.

Pia, hakikisha unapata taarifa za kutosha na mpya zinazoendana na mahitaji ya soko la kiatu chako. Kuna vyanzo mbalimbali vinavyosaidia kupata taarifa zinazokuhusu.

Unaweza kutumia tovuti au mitandao ya kijamii kujiunga na wafanyakazi wanaohusiana na kazi unayoifanya.Unaweza kujiunga na mitandao ya wawezeshaji, mitandao ya mashirika, wadau na ushiriki wa majukwaa mbalimbali yanayohusu eneo ulilochagua kufanyia kazi.

Mwisho katika kubobea kwenye eneo hilo, ni muhimu kutenga muda wa kutosha kwa ajili ya kupata taarifa za wakati husika.

Hatua hiyo inahitaji kujitoa na kutenga muda ili uwe bora katika eneo unalohitaji kujenga wasifu wako.

Ishi katika jambo unalofanya

Hatua ya tatu ni mwendelezo wa kuuishi wasifu huo. Hatua hiyo imekuwa ni changamoto, kulinda wasifu usiporomoke au usiingie doa mahali pa kazi.

Kwa mfano, kumekuwa na makosa ya kujisahau au kutokutambua pale tunapokuwa tunajenga wasifu kupitia mitandao ya kijamii kama vile Twitter, Facebook, LinkedIn na tovuti.

Kwa bahati mbaya au kwa kutotambua, mfanyakazi au mfanyabiashara anayeweza kuweka picha nne zenye ujumbe na mitazamo tofauti katika mitandao ya kijamii.

Hii ni hatari kwa mtu anayetaka kulinda wasifu wake.

Kwani taarifa zozote utakazosambaza mitandaoni, lazima ziwe katika uhusiano na kazi au ajira unayoifanya.

Kwa maana ya kwamba, wasifu wako uakisi maisha yako halisi mitandaoni katika kila picha na ujumbe unaouweka.

Nyota wa zamani Brazil afungwa miaka tisa

Mchezaji huyo wa zamani wa timu ya taifa ya Brazil, ambaye hakuwepo mahakamani, amehukumiwa kifungo cha miaka tisa jela baada ya kupatikana na hatia ya kuchangia kumbaka msichana wakati akiichezea AC Milan ya Italia.  

Dae es Salaam.Mshambuliaji wa zamani wa AC Milan na Real Madrid, Robinho amefungwa miaka tisa jela nchini Italia kwa kosa la kushiriki kubaka msichana kutoka Albania.

Shirika la habari la AFP limeripoti kuwa Robinho alishiriki katika ubakaji huo Januari mwaka 2013 wakati akiichezea klabu ya AC Milan inayoshiriki Ligi Kuu ya Italia, maarufu kwa jina la Serie A.

Robinho, ambaye ameichezea timu ya taifa ya Brazil michezo 100, alipatikana na hatia ya kubaka msichana mwenye umri wa miaka 22 ambaye ni raia wa Albania. Hata hivyo, nyota huyo wa zamani hakuwepo kortini.

Watu wengine watano pia walishtakiwa kwa kosa hilo, lakini hukumu yao bado haijajulikana.

AFP imekariri gazeti la kila siku la jijini Milan, Corriere della Sera, likisema kuwa Robinho na marafiki zake watano walimlewesha msichana huyo "kiasi cha kutojitambua na hivyo kutoweza kuwakatalia".

Baadaye walichangia kufanya naye ngono kwa kuachiana.

Kenyatta amwalika Odinga

Katika orodha ya wageni waalikwa wamo Cyrus Jirongo (Joseph Momanyi); Michael Wainaina (Miriam Mutua) na Odinga na mgombea mwenza wake Kalonzo Musyoka.

Nairobi, Kenya. Rais Uhuru Kenyatta amemwalika “kaka” yake na mshindani wake mkuu Raila Odinga kuhudhuria katika sherehe za kuapishwa kwake Jumanne ya Novemba 28 zilizopangwa kufanyika kwenye Uwanja wa Michezo wa Kimataifa wa Moi, Kasarani.

Wengine walioalikwa ni wagombea sita wa urais walioshindana na Rais Kenyatta kwanza katika uchaguzi uliobatilishwa na Mahakama ya Juu na pili wa marudio uliofanyika Oktoba 26.

“Wagombea wengine saba wa urais na wagombea wenza wao katika uchaguzi wa mwisho wa urais wamepewa mwaliko kuhudhuria sherehe hizo,” mwenyekiti wa timu ya watu 22 ya maandalizi ya sherehe, Joseph Kinyua amewaambia waandishi wa habari Ijumaa.

Wagombea wengine na wagombea wenzao wao kwenye mabano ni Joseph Nyagah (Moses Marango); Abduba Dida (Titus Ngetuny);  Ekuru Aukot (Emmanuel Nzai) na Japheth Kaluyu ( Muthiora Kariara).

Katika orodha ya wageni waalikwa wamo Cyrus Jirongo (Joseph Momanyi); Michael Wainaina (Miriam Mutua) na Odinga na mgombea mwenza wake Kalonzo Musyoka.

“Kwa kuwa tukio hili la kitaifa lina umuhimu mkubwa, serikali ya Kenya katika ngazi zote mbili na matawi yake matatu itawakilishwa kikamilifu,” alisema.

Odinga alijiondoa kwenye uchaguzi wa marudio wa Oktoba 26 akilalamikia kutofanyika marekebisho muhimu katika tume ya uchaguzi na akatoa wito ufanyike uchaguzi mkuu katika muda wa siku 90 chini ya tume mpya ya uchaguzi.

Dk Shika ataka asifuatiliwe kutimiza ahadi

Dk Shika ametoa ahadi ya fedha kwa chuo lakini akataka asifuatiliwe.

Kahama. Dk Louis Shika, ‘bilionea’ aliyejizolea umaarufu baada ya kuibuka mshindi katika mnada wa nyumba za mfanyabiashara maarufu, Said Lugumi, bado anaendeleza vituko; safari hii amesema hataki kufuatiliwa.

Dk Shika alijizolea umaarufu baada ya kuibuka kwenye mnada huo na kutaja viwango vya juu vya fedha kuwapiku watu wengine waliojaribu kununua nyumba hizo.

Lakini akashangaza baada ya kushindwa kulipia hata asilimia 25 ya takriban Sh3 bilioni ya nyumba tatu alizoshinda mnada licha ya kuahidi kuwa angefanya hivyo ndani ya muda mfupi kwa sababu fedha zake ziko nchini Urusi.

Kauli zake katika mnada huo, hasa ya "900 itapendeza", ndizo zilizompa umaarufu kiasi cha kupata udhamini wa kampuni tofauti, lakini bado hajaisha vituko.

Akiwa mjini Kahama mkoani Shinyanga jana Alhamisi (Novemba 23,2017) kuhudhuria mahafali ya Chuo cha Afya, msomi huyo wa Urusi aliahidi kukifadhili chuo hicho Sh2.2 bilioni kila mwaka.

Hata hivyo, mtaalamu huyo wa utabibu wa binadamu ameutahadharisha uongozi wa chuo hicho, akiutaka kutomfuatilia kudai kutimiza ahadi yake kwa kuwa anataka kuepuke mambo ya mnada wa nyumba kujirudia.

“Inapendeza tu mkiamini kwamba mtakuwa mnapokea kiasi hicho cha fedha (dola milioni moja), kila mwaka,” alisema Dk Shika.

Dk Shika pia aliwatahadharisha waandishi wa habari kutomuuliza kuhusu kutimiza ahadi hiyo ya dola milioni moja kwa chuo ndani ya kipindi cha wiki mbili kuanzia sasa kwa sababu hana fedha taslimu hadi mchakato aliosema wa kuhamisha fedha kutoka Urusi utakapokamilika.

Akizungumza na jumuiya ya chuo na wageni waalikwa, Dk Shika ametaja sababu ya kuahidi msaada huo kuwa ni kukiwezesha kutoa elimu bora ya utabibu na masuala ya afya ambayo ni muhimu kwa jamii na maendeleo ya Taifa.

Dk Shika aliwasili Kahama kwa ndege iliyotua uwanja wa ndege wa Buzwagi na kupokewa na mkuu wa chuo hicho, Yona Bakungile, huku msafara wake ukiwa na magari zaidi ya 50 yaliyopita mitaa mbalimbali kabla ya kufika chuoni.

Chuo hicho kipo Kata ya Mwendakulima umbali wa takriban kilomita tatu kutoka mji wa Kahama.

Dk Shika, mbele ya mkuu wa Wilaya ya Kahama, Fadhil Nkurlu aliyekuwa mgeni rasmi katika mahafali hayo ya kwanza, alitoa ahadi hiyo baada ya Bakungile kuzungumzia changamoto ya baadhi ya wanafunzi kukatisha masomo kutokana na wazazi na walezi kushindwa kuwalipia ada.

“Baadhi ya wanafunzi pia wamekatisha masomo kwa kukosa ada baada ya wazazi au walezi wao kufariki dunia,” alisema Bakungile.

Akizungumzia ahadi ya Sh2.2 bilioni kwa chuo chake kila mwaka, Bakungile alisema anaamini na "itapendeza akizipokea" kwa sababu zitasaidia kuinua kiwango cha taaluma na ubora wa miundombinu chuoni.

Netanyahu kushuhudia Kenyatta akiapishwa

Msemaji wa serikali Eric Kiraithe jana alishindwa kutaja orodha ya wakuu wa nchi waliothibitisha kuhudhuria na akaishia kuahidi kutoa ufafanuzi zaidi Ijumaa.

Nairobi, Kenya. Waziri Mkuu wa Israel, Benjamin Netanyahu atakuwa miongoni mwa wakuu wa nchi 20 wanaotarajiwa kuhudhuria sherehe za kuapishwa Rais Uhuru Kenyatta Jumanne ijayo ambayo imetangazwa na Gazeti la Serikali kuwa ya mapumziko.

Kwa mujibu wa gazeti la The Times Of Israel, Netanyahu atawasili kwa sherehe hizo mapema Jumanne na ataondoka saa chache baadaye baada ya sherehe hizo.

Hata hivyo, msemaji wa serikali Eric Kiraithe jana alishindwa kutaja orodha ya wakuu wa nchi waliothibitisha kuhudhuria na akaishia kuahidi kutoa ufafanuzi zaidi Ijumaa.

Julai 2016, Netanyahu alikuwa waziri mkuu wa kwanza wa Israeli aliyeko madarakani kufanya ziara nchini Kenya. Katika ziara ile Kenyatta aliahidi kuisaidia Israel kupata hadhi ya kuwa mwangalizi katika Umoja wa Afrika (AU).

Bei yawa kikwazo nyumba za Lugumi

Mnada wa nyumba za Mfanyabiashara mwingine Said  Lugumi sasa kurudiwa kwa mara nyingine

Dar es Salaam. Nyumba nyingine ya  mfanyabiashara, Said Lugumi iliyopo mtaa wa Mazengo Upanga imeshindwa kupata wa kuinunua baada ya bei iliyofikiwa kuwa chini ya iliyopangwa na Serikali.

 Kukwama kwa nyumba hiyo imefikisha idadi ya nyumba mbili kati ya tatu zilizokwama katika mnada ulioendeshwa  na Kampuni ya Udalali ya Yono.

Nyumba hizo zinauzwa kwa  amri ya Mamlaka ya Mapato Tanzania (TRA) ili kufidia kodi anayodaiwa Lugumi Sh14 bilioni.

Mkurugenzi wa Yono, Scholastika Kevela amesema bei ya mwisho imefikia Sh650 milioni ambayo iko chini ya bei elekezi iliyopendekezwa  na Serikali.

Katika mnada uliomalizika leo asubuhi Novemba 24 Mbweni JKT, nyumba ya Lugumi ilikosa mteja kwani walishindwa kufikia bei elekezi.

Mmoja wa wateja waliojitokeza Upanga  Idd Kibula amesema "Mimi nilifikia Sh650 milioni lakini nimeambiwa iko chini hivyo hakuna jinsi. Tutaangalia tena ukitangazwa kama nitakuja.