Rais wa Misri awasili Rwanda kwa mazungumzo ya kibiashara

Image captionRais Al Sisi alifika Rwanda baada ya ziara ya kikazi nchi jirani ya Tanzania

Rais wa Misri Abdel Fatah Al Sisi ameanza ziara ya siku mbili nchini Rwanda.

Mbali na masuala ya siasa, kiongozi huyo na mwenyeji wake Paul Kagame wanatarajiwa kuzungumzia ushirikiano baina ya nchi hizo mbili na kutia saini mikataba ya kibiashara na uwekezaji.

Ziara ya Rais Al Sisi hapa nchini imeanzia eneo la Gisozi kwenye jumba la kumbukumbu ya mauaji ya kimbari ya mwaka 1994 ambako ameweka shada la maua kutoa heshima zake kwa masalio ya miili ya watu waliouawa katika mauaji hayo kabla ya kuwa na mazungumzo na Rais Kagame.

Hakuna mengi yaliyotangazwa kuhusu ratiba nyingine ya ziara ya rais Al Sisi nchini Rwanda.

Misri na Rwanda zina uhusiano wa muda mrefu wa kidiplomasia.

Mbali na siasa, ziara hii inataraji kujikita zaidi kuhusu ushirikiano kibiashara na uwekezaji.

Misri ni miongoni mwa nchi za kwanza barani Afrika kuwekeza katika nchi za kigeni kitita cha bilioni 6.8 dola za Marekani.

Upande wa Rwanda, nchi hiyo tayari imekwishawekeza katika miradi ya usambazaji wa maji ikizingatiwa kwamba asilimia 85 ya maji inayotumia ni ya Mto Nile ambao una baadhi ya vyanzo vyake nchini Rwanda.

Mwaka jana Rwanda ilichota kitita cha dola milioni 26 za Marekani kwa biashara ya kahawa, chai na maua inayofanya na Misri huku Misri ikiingiza dola milioni 54 kwa bidhaa inazouza Rwanda hususanivifaa vya ujenzi.

Katika ziara hii mikataba zaidi hasa ya uwekezaji inataraji kutiwa saini, miongoni mwake ni kuifungulia milango kampuni ya ndege ya Egyptair kufanya safari zake Rwanda kufuatia mwafaka ulioafikiwa mwaka 2015 lakini ukawa haujatekelezwa.

Ziara ya Rais Al Sisi aliyoanzia nchini Tanzania itampeleka pia katika nchi za Chad na Gabon.

Haki miliki ya pichaIKULU, TANZANIA

Image captionAl Sisi akiagana na Rais wa Tanzania John Magufuli mapema leo

Kisiasa inaangaliwa kama nchi hiyo ya kiarabu inataka ufungamano zaidi na nchi za maeneo ya Afrika ya kusini mwa jangwa la Sahara na hasa kuwa na sauti katika Umoja wa Afrika ambao kuanzia mwakani utaongozwa na Rais Kagame.

Nchini Tanzania, Rais al-Sisi alikubali kujenga kiwanda kikubwa cha nyama ili kuwawezesha wafugaji kupata soko la uhakika la mifugo yao.

Aidha, alikubali kujenga kiwanda cha dawa za binadamu. Tanzania huagiza kutoka nje ya nchi dawa za binadamu kwa asilimia 100.

RAIS DKT. MAGUFULI AAGANA NA MGENI WAKE RAIS WA MISRI PIA AKUTANA NA WAZIRI WA ZAMANI WA MAMBO YA NJE WA JAPAN

 Rais wa Jamhuri ya Muungano wa Tanzania Dkt. John Pombe Magufuli akiwa amesimama pamoja na mgeni wake Rais wa Misri Abdel Fattah Al Sisi wakati wa nyimbo za mataifa mawili zikipigwa katika uwanja wa ndege wa Kimataifa wa Julius Nyerere(JNIA). Rais huyo wa Misri ameondoka mara baada ya kumaliza ziara yake ya siku mbili hapa nchini.

 Rais wa Jamhuri ya Muungano wa Tanzania Dkt. John Pombe Magufuli akimsindikiza mgeni wake Rais wa Misri Abdel Fattah Al Sisi wakati akielekea kupanda ndege mara baada ya kumaliza ziara yake ya siku mbili hapa nchini

 Rais wa Jamhuri ya Muungano wa Tanzania Dkt. John Pombe Magufuli akiagana na Rais wa Misri Abdel Fattah Al Sisi mara baada ya kumaliza ziara yake ya siku mbili nchini.

 Rais wa Jamhuri ya Muungano wa Tanzania Dkt. John Pombe Magufuli akicheza nyimbo za kikundi cha matarumbeta kilichokuwa kikitumbuiza katika uwanja wa ndege wa Kimataifa wa Julius Nyerere mara baada ya kumsindikiza mgeni wake Rais wa Misri Abdel Fattah Al Sisi ambaye ameondoka mara baada ya kumaliza ziara yake ya siku mbili nchini.

 Rais wa Jamhuri ya Muungano wa Tanzania Dkt. John Pombe Magufuli akisalimiana na Mbunge na Waziri wa zamani wa Mambo ya nje wa Japan Ichiro Aisawa aliyefika Ikulu kwa ajili ya mazungumzo.

 Rais wa Jamhuri ya Muungano wa Tanzania Dkt. John Pombe Magufuli akiwa katika mazungumzo na Mbunge na Waziri wa zamani wa Mambo ya nje wa Japan Ichiro Aisawa Ikulu jijini Dar es Salaam.

 Rais wa Jamhuri ya Muungano wa Tanzania Dkt. John Pombe Magufuli akiagana na Mbunge na Waziri wa zamani wa Mambo ya nje wa Japan Ichiro Aisawa mara baada ya kumaliza mazungumzo Ikulu jijini Dar es Salaam. PICHA NA IKULU.

Mke wa Mugabe akamatwa Afrika Kusini

Grace Mugabe 

• Mama Mugabe alikamatwa jana na alikuwa anatarajiwa kufikishwa mahakamani leo kwa kosa la kumshambulia mrembo huyo anayedaiwa kuwa ni mpenzi wa mtoto wake.

Johannesburg, Afrika Kusini. Grace Mugabe, ambaye ni mke wa Rais Robert Mugabe aweza awe amewafanyia ubabe watu kadhaa nchini kwake lakini kitendo cha kumshambulia, kwa waya wa umeme, mrembo mwenye umri wa miaka 20 kimemweka matatani.

Mama Mugabe alikamatwa jana na alikuwa anatarajiwa kufikishwa mahakamani leo kwa kosa la kumshambulia mrembo huyo anayedaiwa kuwa ni mpenzi wa mtoto wake.

“Imeandikwa katika mitandao mingi ya kijamii kwamba mrembo wa Afrika Kusini mwenye umri wa miaka 20 inadaiwa alishambuliwa na mwanamke mmoja maarufu katika Hoteli ya Sandton mjini Johannesburg,” msemaji wa polisi Vish Naidoo alijibu vyombo vya habari kwa baruapepe. Mrembo huyo jana Jumatatu, “alileta malalamiko ya kushambuliwa kwa lengo baya la kudhuriwa mwili.”

Naidoo alikataa kutaja jina la mtuhumiwa kwa sababu alikuwa hajafikishwa mahakamani

Lakini Waziri wa Mambo ya Ndani, Fikile Mbalula amemtaja mwanamke huyo kuwa ni Grace Mugabe na kwamba alijisalimisha polisi.

"Anashikiliwa na polisi kwa sababu alitoa ushirikiano, na akajisalimisha yeye mwenyewe,” Waziri wa Mambo ya Ndani, Fikile Mbalula aliliambia jana shirika la habari la eNCA.  Fikile alisema Grace anatarajiwa kufikishwa kortini Jumanne

Waziri huyo alisema Grace lazima ajibu mashtaka dhidi yake maana yeye waziri hawezi kwenda Zimbabwe, akampiga mtu na akatarajia suala hilo litafunikwa chini ya zulia.

Chama tawala cha Zimbabwe, Zanu-PF kilisema kwa ujumbe wa Twitter kwamba Grace “alishambuliwa” lakini wanashukuru kwamba “ni mzima na yuko salama”. Hakukuwa na maelezo ya kina.

Zanu PF walituma ujumbe mwingine tena wakisema Mama Mugabe anaendelea vizuri baada ya kwenda Afrika Kusini kutibiwa kifundo cha mguu

Kizimbani kwa kukutwa na sare za JWTZ

• Akisoma hati ya mashtaka, Wakili wa Serikali, Wankyo Simon  kwa Hakimu Mkazi Mkuu,Thomas Simba  alidai kuwa Ngogo ambaye ni mkazi wa Tabata Segerea, Juni 15, 2017 alikutwa na vifaa hivyo katika maeneo ya bandari kavu ya Galco Inland Container (ICD) iliyopo Sokota Chang'ombe.

Dar es Salaam. Mfanyabiashara wa Kariakoo, Casto Onyomolile Ngogo (35) amepandishwa kizimbani katika Mahakama ya Hakimu Mkazi Kisutu kujibu shtaka la uhujumu uchumi kwa kukutwa akiwa na suruali 5,000 za Jeshi la Wananchi (JWTZ), tisheti na vitu.

Akisoma hati ya mashtaka, Wakili wa Serikali, Wankyo Simon  kwa Hakimu Mkazi Mkuu,Thomas Simba  alidai kuwa Ngogo ambaye ni mkazi wa Tabata Segerea, Juni 15, 2017 alikutwa na vifaa hivyo katika maeneo ya bandari kavu ya Galco Inland Container (ICD) iliyopo Sokota Chang'ombe.

Wakili wa Serikali, Simon alidai kuwa siku hiyo, mshtakiwa huyo alikutwa  na suruali 5,000 za JWTZ zenye thamani ya Sh50 milioni ambazo zimepatikana kwa njia isiyo halali.

Ngogo anadaiwa kuwa Juni 15, 2017 katika eneo hilo alikutwa na maofisa wa Jeshi la Polisi akiwa na tisheti 50 za JWTZ zenye thamani ya Sh500, 000.

Aliendelea kudaiwa kuwa Juni 17, 2017 mshtakiwa huyo katika eneo la African Inland Container Deport alikutwa na polisi akiwa na pea 20 za viatu vya JWTZ bila ya kuwa na uhalali.

Mshtakiwa huyo hakuruhusiwa kuongea chochote kwa sababu shtaka linalomkabili Mahakama ya Hakimu Mkazi Kisutu haina mamlaka ya kuisikiliza hadi Mahakama Kuu.

Hata hivyo, Mkurugenzi wa Mashtaka (DPP) amewasilisha hati ya kuzuia dhamana chini ya kifungu cha 36 (2) cha sheria ya uhujumu uchumi.

Kesi imeahirishwa hadi Agosti 29, 2017 kwa ajili ya kutajwa upelelezi bado.

Ahirisha ahirisha yawanufaisha wafuasi wa CUF mahakamani

• Hakimu Mkazi Mwandamizi, Godfrey Mwambapa leo Jumanne, Agosti 15 amewaachia huru wafuasi hao chini ya kifungu cha 225 c ha mwenendo wa mashauri ya Jinai (CPA).

Dar es Salaam. Mahakama ya Hakimu Mkazi Kisutu imewaachia huru wafuasi 22 wa Chama cha CUF waliokuwa wakikabiliwa na mashtaka manne, likiwemo la kukutwa na mabomu ya machozi 10, ambayo yanatumiwa na Jeshi la Polisi.

Hakimu Mkazi Mwandamizi, Godfrey Mwambapa leo Jumanne, Agosti 15 amewaachia huru wafuasi hao chini ya kifungu cha 225 c ha mwenendo wa mashauri ya Jinai (CPA).

Kesi hiyo ilikuwa katika hatua ya washtakiwa hao kusomewa maelezo ya awali (PH) na leo washtakiwa hao walipaswa kusomewa, lakini Wakili wa Serikali, Nassoro Katuga amedai kuwa walikuwa bado hawajayaandaa  na akaomba iahirishwe.

Hata hivyo, wakili wa washtakiwa hao, Hashimu Mziray hakuwa na pingamizi lakini  Hakimu Mwambapa  kutokana na kesi hiyo kuahirishwa  mara kwa mara takribani mara sita aliifuta kesi hiyo na kuwaachia huru washtakiwa.

Baada ya washtakiwa hao kuachiwa huru askari polisi walianza kuwakamata kitendo ambacho kilizua purukushani kwa sababu washtakiwa hao walikuwa wakijikwamua mikononi mwa askari hao na kukimbia.

Hata hivyo, wengi wao walifanikiwa kukimbia na baadhi yao walikamatwa na kuwekwa chini ya ulinzi wa askari hao.

Pia, washitakiwa hao wanaodaiwa kutenda makosa hayo kati ya Zanzibar na Dar es Salaam wanatuhumiwa kuwa wanachama wa kikundi cha ‘Blue Guard’, kinachojitwika mamlaka ya polisi.

Washitakiwa hao waliokuwa wakikabiliwa na kesi hiyo  ni Hamis Omary Hamis, Said Mohamed Zaharani, Hamid Nassoro au Hemed, Nassoro Humudi Ally, Othuman Humud au Abdallah, Swalehe Ally Swalehe na Hamis Hamis Haji.

Wengine ni Majid Juma, Mohamed Khamis Ally, Ramadhan Juma, Juma Hamad Seif, Masoud Asa Fumu, Jecha Faki Juma, Mbaruku Bakari, Muhsin Ally Juma, Juma Omary Hamis na Haji Rashid Juma.

Pia, wamo  Ally Nassoro au Haji, Ally Juma Salum, Juma Haji au Mmanga, Mohamed Amir Mohamed na Mohamed Zuberi.

Kwa pamoja walikuwa wakidaiwa kuwa Septemba 20 na 25, mwaka 2016, katika maeneo mbalimbali ya Zanzibar na Dar es Salaam na wenzao, ambao hawapo mahakamani, walikula njama ya kutenda kosa kwa kuunda kikosi cha brigadi, ambacho kinafanya kazi kama polisi kinyume cha sheria.

Washtakiwa hao pia wanadaiwa katika tarehe hizo na maeneo hayo, wakiwa wanachama wa kikundi cha ‘Blue Guard’, kwa madhumuni ya kujiingiza katika ajira, walikuwa wakifanya majukumu ya polisi.

Wanadaiwa  kuwa Septemba 25, mwaka2016, maeneo ya Mwananyamala ‘A’, wilayani Kinondoni, Dar es Salaam, walikutwa wakimiliki visu vitano na mabomu 10 ya machozi.

Pia, wanadaiwa kuwa siku hiyo walikutwa wakimiliki mabomu hayo 10 ya machozi kinyume cha sheria, kwa kuwa kimsingi humilikiwa na Jeshi la Polisi.Walikana mashtaka hayo na walikuwa  wapo nje baada ya kukamilisha masharti ya dhamana waliyopewa.

Washtakiwa hao wanatetewa na wakili Hashimu Mziray ambaye alilaani kitendo cha askari hao wa polisi kuwakamata wateja wake bila ya kufuata utaratibu.

China yapiga marufuku bidhaa za Korea Kaskazini

Haki miliki ya pichaGETTY IMAGES

Image captionDaraja la mto Yalu karibu na Dandong, linalotumiwa sana kupitisha bidhaa kati ya China na Korea kaskazini

China imesema itasitisha mpango wa kununua makaa ya mawe, chuma na chakula cha baharini kutoka Korea Kaskazini.

Hatua hiyo ni ya utekelezaji wa vikwazo vya Umoja wa Mataifa vilivyowekwa kutokana na hatua ya Korea kaskazini kufanyia majaribio makombora yake mawili ya masafa marefu mwezi uliopita.

China inanunua asilimia 90 ya biashara yote ya Korea kaskazini.

Beijing ilikuwa imeahidi kuweka vikwazo hivyo baada ya Marekani kuishutumu kwa kutoishinikiza Korea Kaskazini kusitisha mpango wake wa kutengeza silaha.

Umoja wa Mataifa uliidhinisha vikwazo dhidi ya Pyongyang mapema mwezi huu ambavyo vinaweza kuligharimu taifa hilo mapato ya dola bilioni 1 kwa mwaka kulingana na takwimu zilizotolewa na ujumbe wa Marekani kwa baraza la usalama la umoja wa mataifa.

Ijapokuwa uagizaji wa makaa kutoka Korea kaskazini ulilipatia taifa hilo dola bilioni 1.2 mwaka uliopita,takwimu hizo zitashuka mwaka huu kwasababu China tayari ilikuwa imeiwekea vikwazo nchi hiyo tangu mwezi Februari, kulingana na wataalam.

Haki miliki ya pichaGETTY IMAGES

Image captionMakaa ya mawe kutoka Korea Kaskazini

''China tayari ishanunua makaa yake ya mawe ya kipindi cha robo ya kwanza ya mwaka chini ya vikwazo vya 2017.Hivyobasi hakutakuwa na athari zozote nchini humo , huku Korea Kaskazini ikiwa inauza kiwango kidogo cha makaa yake ya mawe kwa mataifa mengine'', alisema David Von Hippel kutoka kwa taasisi ya Nautilus kundi la wataalam wanaofanya utafiti katika sekta ya makaa ya mawe Korea kaskazini.

Uchaguzi Kenya: Odinga achelewa kutangaza hatua atakayochukua

Haki miliki ya pichaGETTY IMAGES

Image captionBw Odinga na Bw Mudavadi

Muungano wa upinzani nchini Kenya National Super Alliance (Nasa) umeahirisha kikao cha kutoa tangazo kuhusu mweleko wa chama hicho kufuatia uchaguzi mkuu wa mwaka jana.

Kiongozi wa muungano huo Raila Odinga alikuwa ameahidi kwamba angetangaza ni hatua gani atachukua leo baada ya kupinga matokeo ya uchaguzi yaliyotangazwa Ijumaa, ambapo mpinzani wake Rais Uhuru Kenyatta alitangazwa mshindi.

Ajenti mkuu wa Nasa Musali Mudavadi amesema sasa muungano huo unapanga kutoa tangazo keshi Jumatano.

"Tunasikitika kwamba mashauriano yanachukua muda mwingi kuliko ilivyotarajiwa na Nasa kwa hivyo hawataweza kuwahutubia Wakenya kama walivyotarajia leo."

Bw Mudavadi hata hivyo amesema mashauriano "yanaendelea na yanaendelea vyema".

Rais Kenyatta alitangazwa mashindi kwa kura 8,203,290 huku naye Raila Odinga akipata kura 6,762,224.

Hapo jana, Bw Odinga alikuwa ametoa wito kwa wafuasi wake kususia kazi kabla ya kutoa tangazo kubwa leo.

Watu wengi hata hivyo walionekana kupuuza wito wa kususia kazi.

Baada ya kutokea kwa maandamano katika baadhi ya maeneo ambayo ni ngome ya upinzani mitaa ya Mathare na Kibera jijini Nairobi na mji wa Kisumu, hali ya utulivu ilianza kurejea Jumatatu.

Viongozi wa muungano huo wa upinzani wanadai mitambo ya Tume ya Taifa ya Uchaguzi (IEBC) ilidukuliwa na watu wenye uhusiano na serikali ya Jubilee na kwamba watu hao waliingilia na kuchakachua matokeo kumfaa Rais Uhuru Kenyatta aliyekuwa akishindana na Bw Raila Odinga kwa mara ya pili.

Tume ya uchaguzi ilisema mwanzoni ilikuwa haina taarifa kuhusu udukuzi kama huo lakini kwamba ingelifanya uchunguzi. Saa chache baadaye, tume hiyo ilisema hakuna jaribio lolote la udukuzi lililokuwa limefanyia katika sava ya matokeo ya uchaguzi.

Muungano wa upinzani pia umeikosoa IEBC kwa kutoa matokeo ya urais bila kuwasilisha fomu za kutangazwa kwa matokeo katika vituo vya kupigia kura na pia katika maeneo bunge, Fomu 34A na Fomu 34B.

Muungano huo umesema hautaenda kortini kupinga matokeo ya uchaguzi huo.

Marekani yampongeza Kenyatta kwa kuchaguliwa muhula wa pili

Haki miliki ya pichaAFP

Image captionUhuru Kenyatta ( kulia) na makamu wa rais William Ruto

Marekani imewapongeza watu wa Kenya kufutia kumalizika kwa uchaguzi mkuu kwa njia ya amani, na pia kumpongeza Rais Uhuru Kenyatta kwa kuchaguliwa kwa muhula wa pili.

Marekani pia imewapongeza wagombea, maafisa na watu kwa kuendesha uchaguzi uliokuwa wa amani, ikiongeza kuwa inakaribisha taarifa za waangalizi wote kuhusu uchaguzi huo.

"Tunasumbuliwa na ripoti kuwa baadhi ya maandamano yamekuwa yenye ghasia tunatoa wito kwa wakenya wote kukataa ghasia na kutatua mizozo kwa kufuata katiba ya Kenya na sheria

Tunakaribisha wito wa Rais Kenyatta wa kuwepo amani na umoja wa kaitaifa.

Uchaguzi huu wa kihistoria ni hatua kubwa mbele, na tunawashauri wakenya wote kuungana kwa amani na kuendrlea kujenga nchi yao. Mareknia itandelea kushirikiana na Kenya katika kuhakisha kuwepo kwa amani siku za usoni, taarifa hiyo ilisema.

Kiungo wa kimataifa wa DR Congo ametua Jangwani

Kiungo wa kimataifa wa DR Congo ametua Jangwani na kusaini mkataba wa miaka miwili jambo ambalo limeshusha presha ya mashabiki wa timu hiyo

Klabu ya Yanga leo imempokea kiungo Papy Kabamba Tshishimbi kutoka Jamhuri ya Kidemokrasia ya Kongo (DRC), na kumsainisha mkataba wa miaka miwili kuichezea timu hiyo.
Katibu Mkuu wa Yanga Boniface  Mkwasa, amesema, kutua kwa mchezaji huyo kunawapa uhakika  wa kukiimarisha kikosi chao katika nafasi ya ulinzi ambayo imewasumbua kwa muda mrefu ambapo ni zaidi ya misimu mitatu.
“Nikweli T’shishimbi, tumemaliziana naye na hivi ninavyokwambia tayari tumempeleka Zanzibar, kwa ajili ya kujiunga na wenzake,”amesema Mkwasa.
Katibu huyo amesema wanafurahi kukamilisha usajili wa mchezaji huyo na kwasasa wanachokiangalia ni kukiandaa kikosi chao kwa ajili ya kufanya vizuri kwenye mechi za ligi.
Amesema mipango yao ni kuhakikisha wanatetea ubingwa wao wa ligi ya Vodacom na kufanya vizuri kwenye michuano ya kimataifa na hilo linawezekana kutoka na ubora wa kikosi walichokuwa nacho.
“Tumesajili vizuri hata kama hatukucheza vizuri kwenye mechi za kirafiki, lakini huo ulikuwa mwanzo, mwalimu wetu George Lwandamina, alikuwa bado anajenga timu ,”amesema Mkwasa.
Kiongozi huyo amesema wanatarajia kumtua T’shishimbi, kwenye mchezo wa Ngao ya Jamii dhidi ya Simba, ambao utapigwa wiki Ijayo uwanja wa Taifa Dar es Salaam.
Baada ya T’shishimbi Yanga imebakisha nafasi moja ya mchezaji wa kimataifa na kwasasa inamfanyia majaribio beki na kiungo raia wa Nigeria ambaye tayari ameshacheza mechi moja na kuonyesha uwezo mkubwa uliowavutia makocha wa timu hiyo.

Kim Jong-un akabidhiwa mpango wa kushambulia Guam

Haki miliki ya pichaAFP

Image captionWanajeshi wa Korea Kaskazini wanasubiri agizo la kushambulia kisiwa cha Guam

Kiongozi wa Korea Kaskazini amepokezwa habari kuhusu mpango wa taifa hilo wa kutaka kurusha kombora hadi katika kisiwa cha eneo la pacific cha Guam kinachomilikiwa na Marekani kulingana na ripoti za vyombo vya habari.

Lakini ripoti hiyo imesema kuwa itachunguza vitendo vya Marekani kabla ya kuchukua hatua ya kurusha kombora hilo katika kisiwa cha Guam.

Wiki iliopita, Korea Kaskazini ilionya kwamba mikakati inawekwa kushambulia eneo ambalo ndege za kijeshi za Marekani zimekita kambi.

Kumekuwa na cheche za maneno kati ya Marekani na Korea kaskazini.

Ripoti hiyo ya kitengo cha habari cha KCNA ilisema kuwa Kim Jong un aliutazama mpango huo kwa muda mrefu na kuujadili na maafisa wakuu wa jeshi.

Kamanda wa jeshi la kimkakati la Korea Kaskazini sasa anasubiri agizo baada ya kuandaa shambulio hilo la Guam.

Lakini ripoti hiyo pia imeongezea kwamba kiongozi wa Korea Kaskazini atachunguza mienendo ya Marekani kabla ya kutoa uamuzi wowote, hatua inayoonekana kupunguza kasi ya cheche za maeneo kati ya mataifa hayo mawili.

Mwandishi wa BBC Yogita Limaye mjini Seoul anasema kuwa hatua hiyo itapunguza wasiwasi na kuzuia mgogoro wa kijeshi katika eneo la Korea.

Haki miliki ya pichaREUTERS

Image captionWanahewa wa Marekani wamepiga kambi katika kiswa cha Guam

Mwandishi mwengine ameongeza kuwa baada ya siku kadhaa za vitisho kutoka Pyongyang ,inaonekana kwamba rais Kim Jong Un sasa anataka kunyamaza na kutazama hali ,lakini katika taifa lenye siri kubwa kama Korea Kaskazini huwezi kuwa na hakika.

Wachanganuzi wanasema inamaanisha kwamba Pyongyang haiko tayari kutekeleza shambulio katika kisiwa cha Guam, kwa hivyo huenda inachukua muda.

Hatua hiyo inajiri baada ya waziri wa ulinzi nchini Marekani James Mattis kuonya kwamba shambulio lolote linaweza kusababisha vita vikali, na iwapo Pyongyang itarusha kombora kuelekea Guam basi ''itakuwa vita''.

Ameambia maripota kwamba Jeshi la Marekani litatetea taifa hilo kutoka kwa shambulio lolote wakati wowote na kutoka kwa taifa lolote.

Image captionKisiwa cha Guam

Pia aliwahakikisha raia wa Guam ,ambapo kuna kambi za kijeshi za Marekani kwamba takriban watu 160,000 wanalindwa na akasema iwapo kombora litarushwa ''tutalitibua''.

Mambo manane kuhusu kutumia mkono wa kushoto

Haki miliki ya pichaPSCU

Image captionRais Kenyatta na Waziri Mkuu wa Israel Benjamin Netanyahu. Wote wawili hutumia mkono wa kushoto

Watu wengi duniani hutumia mkono wa kulia kwa shughuli nyingi na si ajabu kwamba vitu vingi huundwa kwa kuwafikiria wanaotumia mkono wa kulia.

Wanaotumia mkono wa kushoto husumbuka sana katika kutumia vitu kama vile mkasi, vitabu au hata kufungua milango.

Fikiria pia kuhusu kipanya katika vituo vya kupokea huduma ya mtandao, mara nyingi utapata kimewekwa upande wa kulia.

Kuna pia viti vyenye sehemu ya kuandikia vyuoni, ni vichache sana hujengwa kwa matumizi ya watu wanaotumia mkono wa kushoto.

Siku ya watu wanaotumia mkono wa kushoto huadhimishwa kila mwaka tarehe 13 Agosti.

Siku hii iliadhimishwa mara ya kwanza mwaka 1976.

Haya hapa ni baadhi ya mambo kumi ya kushangaza kuhusu watu wanaotumia mkono wa kushoto:

1.Asilimia kumi kati ya watu wote duniani hutumia mkono wa kushoto, na kiwango hiki kimesalia hivyo kwa muda mrefu. Wanaume wana uwezekano mkubwa wa kuwa wanatumia mkono wa kushoto.

2.Kwa muda mrefu katika jamii nyingi, watu wenye kutumia mkono wa kushoto walichukuliwa kuwa dhaifu. Si ajabu kwamba huenda uliwaona au unawaona watoto wanaochapwa sana kwa kutumia mkono wa kushoto wakila au wakiandika. Katika baadhi ya jamii, kutumia mkono wa kushoto huhusishwa na uchawi.

3.Kumsalimia mtu kwa kutumia mkono wa kushoto kumekuwa kukitazamwa kama kumkosea mtu heshima. Hii ni kwa sababu watu zamani walikuwa wakitumia mkono wa kushoto kujitakasa baada ya kwenda msalani.

4.Bingwa wa tenisi duniani Rafael Nadal alibadilisha na kuanza kutumia mkono wake wa kushoto akicheza - kutokana na imani ya mkufunzi wake Toni Nadal kwamba ingempatia nafuu kiasi akikabiliana na wachezaji wengine uwanjani.

5.Mrengo wa kushoto? Jina hili lilianza kutumiwa miaka ya 1790 baada ya mapinduzi ya Ufaransa na kuondolewa kwa utawala wa kifalme. Wawakilishi wa chama cha kishoshialisto katika bunge walikuwa wakikaa upande wa kushoto wa kiongozi wa vikao. Wat wa mrengo wa kushoto wakati huo walikuwa wakitazamwa kama maadui wa wasomi na watawala.

6.Kwa muda mrefu, dini ya Kikristo ilihusisha upande wa kushoto na maovu. Kwenye picha nyingi za Siku ya Kiama, wale waovu (mbuzi) hutumwa upande wa kushoto nao wale wa kuokolewa (kondoo) hutumwa upande wa kulia. Wakati wa kusulubiwa kwa Yesu, mwizi aliyetubu alikuwa amewekwa upande wa kulia na yule mwovu alikuwa upande wa kushoto.

7.Watano kati ya marais wanane wa karibuni zaidi nchini Marekani hutumia mkono wa kushoto kuandika. Marais hao ni Gerald Ford, Ronald Reagan, George H.W. Bush, Bill Clinton, na Barack Obama.

8.Kuna pahala penye jina Left Hand (Mkono wa Kushoto). Eneo hilo hupatikana katika jimbo la West Virginia na hutokana na kijito cha Lefthand Run.

Haki miliki ya pichaAFP/GETTY

Miongoni mwa watu mashuhuri wanaotumia au waliotumia mkono wa kushoto:

• Rais wa zamani wa Marekani Barack Obama
• Rais wa Kenya Uhuru Kenyatta
• Waziri Mkuu wa Israel Benjamin Netanyahu
• Mwanamfalme William wa Uingereza
• Msanii Angelina Jolie
• Mwanasayansi Albert Einstein
• Mwigizaji Tom Cruise
• Mwanamuziki David Bowie
• Mwanariadha Paula Radcliffe
• Mwanakandanda Pele
• Mwanaanga za juu Neil Armstrong
• Mwanasayansi Marie Curie
• Bondia Manny Pacquiao
• Mwanaviwanda Henry Ford
• Mwanamuziki Justin Bieber
• Mwanamuziki Lady Gaga
• Mwanamuziki Marshall Bruce Mathers III maarufu kama Eminem
• Mwanamuziki Paul McCartney
• Mwigizaji Jennifer Lawrence

Sikio la kushoto

Kwa jumla, watu 40% duniani hutumia zaidi sikio la kushoto kusikia, 30% hutumia jicho la kushoto na 20% hutumia zaidi mguu wa kushoto.

Mabingwa wa tenisi

Ingawa ni asilimia 10% ya watu duniani hutumia zaidi mkono wa kushoto, tangu kuanza kwa enzi ya Open katika mchezi wa tenisi duniani, 23% ya mataji ya Wimbledon ya mchezaji mmoja mmoja yameshindwa na wachezaji wanaotumia mikono ya kushoto.

Image captionMabingwa wa tenisi ambao hutumia mkono wa kushoto