Mbunge mteule Janeth Masaburi azungumzia uteuzi wake

Mbunge mteule, Janeth Masaburi 

• Mteule huyo amesema atakwenda kuwawakilisha vyema wanawake ili kufikia azma ya uchumi wa viwanda.

Dar es Salaam. Mbunge mteule, Janeth Masaburi amezungumzia uteuzi wake akisema anamshukuru Mungu kwa hatua hiyo.

Rais John Magufuli, Oktoba 21,2017 alimteua Janeth kushika wadhifa huo.

Mteule huyo leo Jumanne Oktoba 24,2017  amezungumza na Mwananchi akisema, “Namshukuru Mungu kwa kuwa imempendekeza na amemtumia mtu wake kumkumbuka mjane na kada wa CCM.”

“Ameamua kuniteua kwenda kuongeza nguvu, kikubwa nitakwenda kuwawakilisha vyema wanawake na tufikie azma ile ya uchumi wa viwanda,” amesema.

Janeth ni mke wa marehemu Dk Didas Masaburi aliyewahi kuwa Meya wa Jiji la Dar es Salaam.

Katika Uchaguzi Mkuu wa mwaka 2015, Dk Masaburi aligombea ubunge wa Ubungo na kushindwa na Saed Kubenea wa Chadema.

Uteuzi wa Janeth umefanywa na Rais Magufuli kwa mujibu wa Ibara ya 66 (1)(e) ya Katiba ya Tanzania inayompa mamlaka ya kuteua wabunge 10 na ulihitimisha nafasi hizo.

Wateule hao ambao ni mawaziri ni; Dk Philip Mpango (Fedha na Mipango), Profesa Palamagamba Kabudi (Katiba na Sheria), Profesa Joyce Ndalichako (Elimu, Sayansi na Teknolojia), Profesa Makame Mbarawa (Ujenzi, Uchukuzi na Mawasiliano) na Dk. Augustine Mahiga (Mambo ya Nje, Ushirikiano wa Afrika Mashariki, Kikanda na Kimataifa).

Wengine walioteuliwa na Rais Magufuli ni Dk Tulia Ackson ambaye ni Naibu Spika wa Bunge, Salima Kikwete, Anne Kilango na Abdallah Bulembo.