Craca Machel awataka vijana wajitume

Mke wa aliyekuwa Rais wa kwanza wa Afrika Kusini Nelson Mandela, Graca Machel 

Dar es salaam. Mke wa aliyekuwa Rais wa kwanza wa Afrika Kusini Nelson Mandela, Graca Machel amewataka vijana wa Afrika kuacha kulalamikia serikali zao katika masuala mbali mbali ya kiuchumi na badala yake waonyeshe mfano kwa kufanya kazi.

Machel amesema hayo leo wakati akizungumza na vijana kutoka nchi mbalimbali katika mjadala wa kujadili changamoto zinazowakabili vijana wa Afrika katika uchumi, Elimu ikiwa ni maandalizi ya kuelekea siku ya vijana duniani 12 Agosti mwaka huu.

"Nimewasikia vijana wengi mkilalamika serikali haijaweka mazingira mazuri kwa vijana, serikali haijafanya hiki na kile, naomba ni waambie vijana wangu acheni kulalamika, fanya! Onyesha unaweza nini "amesema.

Amesema kulalamika pekee hakuwezi kuwasaidia vijana wa Afrika kuwa na maisha mazuri hakuna serikali inayoweza kuwaletea ama kuwafanyia kila jambo mengine vijana wenyewe wanatakiwa kufanya na wanapokwama basi waifuate serikali.

" Zambia mnasema tumepiga kelele kwa serikali juu ya kuboresha mazingira ya uwekezaji wa uchumi kwa vijana lakini hakuna jitihada niwaambie vijana wangu tengenezeni mipango yenu kama vijana kisha wapelekeeni muwaambie tumefanya hivi lakini tumekwama hapa "amesema.

-" Kama wasipowasikiliza waambieni tutawanyima kura, nawaambia lazima serikali itawasikiliza kinachotakiwa nikujikusanya vijana wengi msiwe kikundi cha watu sita au kumi" amesema

Amewataka pia vijana kuacha visingizio na kuuliza maswali ya sasa tunafanyaje? Tutaanzaje? kwani majibu ya maswali hayo wanatakiwa kuwa nayo wao wenyewe.

"Acha kuuliza maswali ambayo majibu yake unayo wewe, fanya, jiwekeeni mipango kama mtalalamika tu mnataka nani afanye "amesema.

Hata hivyo baadhi ya vijana wanaharakati wamesema vijana wa Afrika wengi bado wa na changamoto nyingi ikiwamo ukosefu wa ajira na elimu ya uzazi hali inayosababisha vijana wengi hasa wasichana kukosa fursa ya elimu baada ya kubeba ujauzito wakiwa shuleni.

Akizungumza katika kongamano hilo kijana mwanaharakati kutoka Tanzania, Halima Lila amesema "Hatuna mwongozo sahihi wakulinda elimu ya mtoto wa kike,bado Kuna hitaji kubwa la kutoa elimu juu ya uzazi kwa vijana wakike na wa kiume" amesema.

Seif Ibrahim amesema Tanzania bado kuna tatizo la ajira kwa vijana na mimba kwa watoto wakike ambao wengi wanashindwa kumaliza elimu zao za sekondari lakini pia elimu zinazotolewa kwa vijana mashuleni haziwapi uwezo wa kujitegemea wamalizapo masomo "amesema.