RAIA WA CHINA ALIPA MILIONI 110/- KUKWEPA KWENDA JELA MIAKA 20

MAHAKAMA ya Hakimu Mkazi Kisutu imemuhukumu Raia wa China, Liu Xiu Feng kutumikia kifungu cha miaka 20 jela ama kulipa faini ya Sh.milioni 110 baada ya kukiri kosa la kukutwa na meno ya Simba mawili.

Hukumu hiyo imesomwa leo na Hakimu Mkazi Mkuu, Huruma Shaidi baada ya Wakili wa Serikali Mwandamizi, Mutalemwa Kishenyi kueleza mshtakiwa huyo amekiri kosa.

Hakimu Shaidi amesema kutokana na mshtakiwa huyo kukiri kosa Mahakama inamuhukumu kutumikia kifungo cha miaka 20 gerezani ama kulipa faini ya sh.milioni 110."Mahakama inakuhukimi kutumikia kifungo cha miaka 20 jela ama ulipe faini ya Sh.milioni 110," amesema Hakimu Shaidi.

Baada ya kutolewa hukumu hiyo, mshtakiwa Feng aliepuka kwenda jela baada ya kulipa faini hiyo ya Sh.milioni 110.

Raia huyo wa China alikuwa akikabiliwa na kosa la kukutwa na meno mawili ya Simba katika uwanja wa Ndege wa Kimataifa wa Julius Nyerere (JNIA).Alikutwa na meno hayo Februari 7,mwaka 2018 ambapo yanathamani ya Sh.milioni 11, 029,900.