Madereva walia na ajira za kusafirisha magari nje ya nchi

Kilio cha madereva kimetolewa leo Machi 10, 2018 wakati wa mkutano mkuu wa mwaka wa umoja wa madereva wanaosafirisha magari nje ya nchi (ITDA) ambao ulilenga kujadili masuala mbalimbali ikiwemo uhakika wa ajira zao.

Dar es Salaam. Umoja wa madereva wanaosafirisha magari nje ya nchi (ITDA) wameiomba Serikali kufikiria kutunga sheria ndogo ili kulinda ajira za wazawa kufuatia kazi nyingi kuchukuliwa na  wageni.

Kilio hicho kimetolewa leo Machi 10, 2018 wakati wa mkutano mkuu wa mwaka wa umoja huo ambao ulilenga kujadili masuala mbalimbali ikiwemo uhakika wa ajira zao.

Madereva hao wamelalamika kuwa raia wa kigeni wamekuwa wakichukua ajira hizo za kupeleka magari katika nchi zao huku Watanzania wakibaki wanyonge.

Mmoja wa madereva hao, Peter Mhina amesema hivi sasa  imekuwa kawaida magari yanapotoka bandarini kuendeshwa na dereva wa nchi husika linakokwenda.

Amesema hali hiyo imekuwa kikwazo kikubwa cha ajira kwa wazawa ambao wamekuwa wakitegemea kupata kazi za kusafirisha magari hayo na hivyo kujiongezea kipato.

"Hali imekuwa mbaya bandari yetu lakini tunaishia kuangalia maji, wenzetu kazi wanapeana wenyewe kwa wenyewe, ukifuatilia kwa undani madereva wengi sasa hawana kazi," amesema Mhina.

Mwenyekiti wa ITDA, Jimmy Mwalugelo amekiri kuwepo kwa changamoto hiyo na kueleza kuwa jitihada zinaendelea kufanyika kupata ufumbuzi.

Amesema hali hiyo ni matokeo ya makubaliano ya ushirikiano kati ya Tanzania na nchi nyingine za Afrika Mashariki hivyo ni muhimu kuheshimu makubaliano hayo.

"Hatuwezi kukiuka makubaliano ya ‘protocol’ namba 13, hiyo ndiyo inawapa nguvu wenzetu kuchangamkia fursa hiyo ya ajira," amesema.

Amesema ili kupata ufumbuzi ni muhimu Serikali ikaanzisha sheria ndogo itakayoelekeza magari yote yanayotoka bandarini yaendeshwe na dereva aliyepitia mafunzo maalum yatakayotolewa katika Chuo cha Muhonda.

"Tunafanya utaratibu wa kuanzisha chuo, ambacho kitakuwa kinatoa mafunzo mafupi na yenye tija kwa madereva wanaokwenda nje ya nchi, hawa tutawapatia vyeti,"amesema.

“Ndiyo sababu tunashauri kwa kusaidia kulinda ajira za wazawa iwekwe sheria itakayomtaka dereva anayetoa gari bandarini awe na cheti hiki pamoja na leseni."

Amesema mataifa ya jirani yamechangamkia fursa ya ushirikiano wa Afrika Mashariki kwa kuwaweka watu wao kufanya kazi mipakani na bandarini.

Pamoja na hilo amewasisitizia madereva umuhimu wa kuwa na bima za afya ili kuwa na uhakika wa matibabu yao na familia zao.

"Hizi kazi hazieleweki unaweza ukasafiri ukapata matatizo njiani au familia yako ikapata matatizo ukiwa na bima ni nafuu unatibiwa hata kama huna fedha kwa wakati huo," amesema.