Wakazi Loliondo watoa kilio kwa Waziri Mkuu

Waziri Mkuu, Kassim Majaliwa 

• Kamati iliyoundwa na  Waziri Mkuu, Kassim Majaliwa kushughulikia mgogoro huo, imependekeza kugeuzwa eneo la pori tengefu la Loliondo kuwa hifadhi maalumu ya jamii ya wanyamapori (WMA). 

Dar es Salaam. Wananchi wa Loliondo  mkoani Arusha, wamemuomba Waziri Mkuu, Kassim Majaliwa kushughulikia mgogoro wa ardhi unaoendelea kwenye eneo lao.

Wakizungumza jijini hapa leo Agosti 31, baadhi ya wananchi waliowawakilisha wenzao wamesema hali imekuwa mbaya baada ya makazi yao kuanza kuchomwa moto.

Mwakilishi wa wenyeviti wa mitaa, Lazaro Malongo amesema licha ya eneo lao kuwa kwenye mgogoro kwa zaidi ya miaka 20, Serikali inapaswa kusitisha uchomaji wa makazi ili kunusuru maisha ya wananchi wasio na pa kwenda.

Mwakilishi wa wanawake wa eneo hilo, Pirias Maingo amesema hali si shwari kwao na watoto kutokana na kukosa makazi baada ya nyumba kuchomwa.

"Twende wapi sasa, tumekuwa wakimbizi ndani ya nchi yetu wenyewe. Tunaomba Waziri Mkuu atusaidie," amesema.