Wednesday, March 7

Tumwogope Mungu kwa matendo yetu,kila siku kila wakati


Bila kumwogopa Mungu, hatuwezi kupiga hatua kama taifa. Leo hii kilio kikubwa ni Katiba Mpya. Kila mtu anayetaka kujenga hoja ya kisiasa inayoendana na wakati wa sasa, ni lazima ataje katiba.
Ingawa kuna ukweli usiopingika kwamba kuna watu katika taifa letu hawataki kusikia neno Katiba, na hasa kutaja Katiba Mpya; bado asilimia kubwa wanaililia. Hata hivyo, hata tukiwa na katiba nzuri kiasi cha kuihamisha milima, bila kumwogopa Mungu, hatuwezi kufika popote.
Siasa zetu ziwe ni za kumwogopa Mungu. Tuvijenge vyama vyetu vya siasa kwa msingi wa kumwongopa Mungu. Tusiwe na lengo na kubomoa vyama vingine, tuheshimu uhuru wa kila Mtanzania. Ukweli ni kwamba tukimtanguliza Mungu, hatuwezi kujenga uhasama wa kisiasa, bali kila chama kitakuwa kikikamilisha chama kingine.
Usiwe ushindani wa vyama vya siasa, bali ushindani wa hoja na sera, usiwe ushindani wa ubora wa vyama vya siasa bali utekelezwaji wa sera, ubora wa kuheshimu haki za binadamu na kuutukuza na kuulinda uhai.
Mungu, anatuumba ili tumpende na kupendana sisi kwa sisi. Tukimwogopa Mungu, tutajenga ufalme wake hapa duniani. Siasa zetu zijengwe juu ya msingi imara wa kumwogopa, kumpenda na kumtumikia yeye peke yake.
Kuna kilio kikubwa cha kubinywa kwa demokrasia, chama kimoja kuwa na nguvu na upendeleo kuliko vingine. Kutokuwa na Tume huru ya uchaguzi; madai ya aliyeshindwa kutangazwa mshindi na aliyeshinda kutangazwa ameshindwa na Serikali kukibeba chama kimoja na vyombo vyote vya serikali kukitumikia.
Hiki ni kilio kinachosikika mipaka yote ya nchi yetu. Hata kama kilio hiki kingekoma leo, ukawepo usawa wa vyama vyote na demokrasia ikatawala, tukawa na Tume huru ya uchaguzi, bila ya kumwogopa Mungu si kitu si lolote.
Tunaambiwa kwamba kumwongopa Mungu ndiyo mwanzo wa maarifa na mafanikio. Wale wote waliotembea njia hii, wamefanikiwa. Ingawa taifa letu halina dini, watu wake wote wanamwamini Mungu. Tuna dini nyingi katika taifa letu; dini za kigeni na zile za jadi.
Dini zote zinahimiza kumwogopa Mungu, ili maisha yetu hapa duniani yawe ni ya kumtukuza yeye na kuwapenda na kuwajali ndugu zetu. Amani na utulivu katika mataifa ya dunia hii ni matokeo ya kumwogopa Mungu. Wale wanaopuuza ukweli huu, wanashuhudia vita na maangamizi makubwa.
Tumwogope Mungu, kwa matendo yetu mabaya, Tuongope kuwatendea ndugu zetu yale tusiyopenda kutendewa na sisi. Tumwogope tunapopokea sadaka na zaka nzito kutoka mikononi mwa wanasiasa, bila kuuliza wala kuhoji, tumwogope tunapowakumbatia wanasiasa wenye sifa za ufisadi na kuwaalika kuendesha harambee za kujenga misikiti na makanisa.
Tumwogope Mungu, tunaposamehewa kutoa ushuru na badala ya kuwahudumia wanyonge na maskini, tunajitenga na jamii na kuishi maisha kifahari. Tumwogope Mungu, tunapokula na kusaza, wakati wengine wanakufa kwa njaa.
Tumwogope Mungu, tunapoziingilia familia na kuzisambaratisha. Tumwogope Mungu, tunaposema uongo na kuwasingizia watu. Tumwogope pale tunaposhughulikia afya zetu kwenye hospitali nzuri na kuwaacha wanyonge kufa kwa magonjwa yanayotibika. Orodha ni ndefu. Ni lazima kumwogopa Mungu, kwa matendo yetu yote mabaya.
Kwa viongozi wetu wa dini za Kikristu, ujumbe huu unaweza kuwasaidia kutafakari zaidi:
“……. Nendeni katika moto wa milele aliotayarishiwa shetani na malaika wake. Maana nilikuwa na njaa nanyi hamkunipa chakula; nilikuwa na kiu hamkunipa maji; nilikuwa mgeni hamkunikaribisha; nilikuwa mgonjwa na mfungwa nanyi hamkuja kunitazama…… Nawaambieni kweli, kila mlipokataa kumtendea mambo haya mmojawapo wa hawa wadogo, mlikataa kunitendea mimi” ( Matayo 25: 41- 46).
Yesu, aliongelea mambo yanayotendeka kila siku katika jamii, mambo ambayo yanawatenga watu na Mungu wao. Hivyo orodha hii inaweza kurefushwa, “Mlinibagua kufuatana na rangi yangu ya mwili, kabila langu na dini yangu, chama changu, mlininyanyasa, hamkunisikiliza, hamkunionea huruma nilipolala mitaani, hamkunipatia ushauri mzuri mme wangu alipoanza kutembea nje ya ndoa na kuambukizwa na virusi vya Ukimwi, mlinibagua, mlinibaka, kuninyanyasa kijinsia... ”.
Orodha ni ndefu. Hoja ni kwamba ni lazima kumwogopa Mungu, kwa matendo yetu yote mabaya. Tumwogope na kumtanguliza kwa kila kitu, lakini tunatenda kinyume. Ni dhambi kubwa kujitangaza kuwa mikononi mwa Mungu, lakini huku unatenda kinyume, huko si kumwogopa Mungu.
Yule anayewanyanyasa wanawake na kuwanyima nafasi ya uongozi katika na nafasi ya kufanya maamuzi muhimu katika jamii kama vile ndoa na familia, kuzaa watoto wengi au kuzaa kwa mpango, kutoa mimba au kulinda uhai kwa kupoteza uhai (mfano mwanamke mwenye matatizo kwenye kizazi, ambaye kama angetoa mimba, angeponyesha maisha yake), kuhusu malezi nk, ni lazima amwogope Mungu, maana kuwabagua na kuwanyanyasa wanawake ni Kumbagua Mungu mwenyewe.
Tunafundishwa kwamba sote tumeumbwa kwa mfano wa Mungu, na kwamba binadamu wote ni sawa. Bahati nzuri Katiba yetu inakubaliana na kitu hiki na ile Katiba Mpya tunayoililia imenyoosha vizuri zaidi.
Yule anayewabagua watu wa dini nyingine, ni lazima amwogope Mungu, maana sisi sote ni watoto wa Mungu. Tunaambiwa Mungu, alituumba kwa mfano wake, hivyo hatuna ruhusa ya kubaguana. Tukitaka kubaguana, tukumbuke kwamba ni lazima kumwogopa Mungu. Huwezi kumwogopa Mungu, huku unawabagua watu kwa sura zao, rangi zao, kabila zao, vyama vyao au dini zao.
Ukweli unaotuzunguka sasa hivi ni kwamba Waislamu wanajiona wana haki zaidi ya wengine, Wakristo pia wanajiona wana haki zaidi ya wengine. Wakristu wanagawanyika katika madhehebu ambayo kila dhehebu linajiona kuwa na haki zaidi ya mengine; Waislamu vilevile. Dini zinakuwa kikwazo cha ushirikiano, udugu kama vile ndoa nk, wakati mwingine hata viongozi wa Serikali wanachaguliwa si kwa sifa bali kwa kufuata dini zao.
Yule asiyependa majadiliano, ushauri, ushirikishwaji, ni lazima amwogope Mungu, maana Wakristo wanamwamini anayesikiliza, mwenye huruma , upendo na wema.
Yule asiyekuwa upande wa wanyonge na wanaoonewa, ni lazima amwogope Mungu, maana mbali na hukumu inayotajwa na Matayo katika sura ya 25, mstari wa 31 na kuendelea, Yesu, alisisitiza sana kuwajali wanyonge, wanaoonewa na wafungwa:
“Roho wa Bwana yu pamoja nami, kwani ameniteua rasmi niwaletee maskini habari Njema. Amenituma niwatangazie wafungwa kwamba watapata uhuru, vipofu watapata kuona tena; amenituma niwakomboe wanaoonewa, na niutangaze mwaka ambao Mungu atawakomboa watu wake” ( Luka 4:18-19).
Habari njema inakuja kwa maskini, wafungwa na wanaoonewa, si kwa matajiri na wenye madaraka. Ili ujumbe huu uwe na maana, Yesu mwenyewe alijitokeza miongoni mwa maskini na wanaoonewa. Alizaliwa katika umaskini na kukulia katika umaskini. Enzi zake kulikuwa na matajiri wenye majumba ya kifahari, lakini hakuyachagua. Aliishi na maskini. Mitume wake wote walikuwa ni watu maskini. Aliwaponya wagonjwa, waliwafufua wafu na kuwapatia uzima mpya, uzima tele. Maana yake uhai tele ndiyo kusema wito wetu ni wa uhai tele, kuulinda na kuutetea uhai. Wenye njaa aliwashibisha chakula cha mwili na roho, wenye kiu aliwapatia maji ya uzima. Alifanya miujiza mingi bila kudai ujira.
Hivyo yule anayefanya kazi na kudai ujira, ni lazima amwogope Mungu, maana tumepewa bure ni lazima kutoa bure. Kwenda kinyume na hayo ni maasi. Ukitaka ujira ni lazima umwogope Mungu. Ni lazima kumtanguliza Mungu, maana tumepewa bure na tutoe bure.
Ili ujumbe wa viongozi wetu wa dini uwe na maana yoyote ile ni lazima wajiulize wamesimama upande gani? Kuna matajiri na maskini, kuna majumba ya kifahari na kuna vibanda. Viongozi wetu wa dini wanaishi kwenye majumba ya kifahari au wanaishi kwenye vibanda? Wanapanda daladala au magari ya kifahari?
Je, wako upande wa maskini na wanaoonewa au upande wa matajiri na wenye madaraka. Je, wanaponya wagonjwa? Wenye njaa wanawapatia chakula? Wenye kiu wanawapatia maji ya kunywa? Je wanafanya miujiza bila ya kudai ujira?
Viongozi wetu wa dini wanapotukumbusha kumwogopa Mungu, ni bora wao wakatafakari je, wao wanamwogopa Mungu? Je, wao wanashiriki kiasi gani kuchangia hali hii ya watu kuishi bila kumwogopa Mungu. Kwanini watu waamue kuuza haki yao ya kupiga kura? Kwanini watu waamue kumchagua kiongozi si kufuata sifa zake bali wafuate kabila, dini, pesa, pilau na kanga wanazozipata wakati wa kampeni? Je, viongozi wetu wa dini wanachangia kiasi gani katika kuujenga uchumi wetu?
Kama bado kuna dalili za watu kufanya mambo bila kumwogopa Mungu, katika jamii yetu, basi viongozi wetu wa dini hawajafanya kazi yao vizuri. Mafundisho yao yatakuwa yanapeperushwa na upepo, hayajikiti katika jamii. Kutukumbusha ni jambo zuri, lakini pia kutengeneza mifumo ya kubadilisha hali hii mbaya ni jambo muhimu zaidi. Na mifumo hii itafanikiwa tu pale tutakapoanza kumwogopa Mungu.
Mungu, ametuumba ili tusaidiane na kukumbushana wajibu zetu. Mtu, akisimama peke yake anaanguka haraka. Bahati mbaya hatuna mfumo mzuri wa kukutana na kusaidiana. Watu wanaokutana kanisani au msikitini ni wengi kiasi ni vigumu mtu kumkaribia jirani yake na kumsaidia.
Tungekuwa na mpango wa familia chache kukutana, kusali pamoja, kujadiliana na kusaidiana kimawazo, ki- hali na mali, ungekuwa msaada mkubwa. Haya ndio viongozi wetu wa dini wangekuwa wakiyafanyia kazi.

Muswada tata wa mabadiliko ya Katiba wazua wasiwasi Kenya


Miezi michache iliyopita nilisema katika makala yangu moja kwamba pilikapilika za siasa za mwaka 2022 nchini Kenya zingeanza punde tu baada ya Rais Uhuru Kenyatta kuanza utawala wake wa muhula wa pili na wa mwisho. Utabiri huo ulitimia hata kabla sijafumba wala kufumbua jicho.
Siasa za kumalizana au kujengana kuelekea mwaka huo sasa zimejaa tele nchini. Kila mwanasiasa anajaribu kila awezalo kuchora ramani yake itakayompa nafasi nzuri ya kushinda uchaguzi ya mwaka 2022.
Kiti cha urais ndicho kinaleta utata na migawanyiko ambayo inaenda kasi kuliko vile tunavyoweza kuichambua au kubashiri jinsi itakavyopinda na kunyooka katika siku zinazokuja.
Mambo mazito
Kimsingi, wale wanaokosoa Serikali wamejikuta mahali pabaya huku wakipoteza viti vyao vya ubunge katika mahakama mbalimbali.
Na mambo bado. Ghafla bin vuu, mbunge wa chama cha Kanu, William Kamket awasilisha muswada katika Bunge la Kitaifa akitaka Katiba ibadilishwe kutoa nafasi ya wadhifa wa waziri mkuu mwenye mamlaka tele na kiongozi wa shughuli za Serikali.
Isitoshe, muswada huo unatafuta kupunguzwa kwa nguvu za Rais. Ikiwa muswada huo utapitishwa na Bunge, Rais hatakuwa na mamlaka kama ilivyo sasa.
Licha ya hayo, muswada huo ukipitishwa, Rais atakuwa na muhula mmoja tu wa miaka saba wa kutawala kinyume na sasa ambapo rais anaweza kuwania kiti hicho mara mbili mfululizo; kila muhula una miaka mitano.
Mswada wa Kamket una nafasi mbili za makamu wa rais; kwa hivyo ukipita, kutakuwa na makamu wa rais wawili.
Wachambuzi wa siasa wanasema ingawa muswada huu uliletwa na Kamket kama muswada wa binafsi, kuna watu wanaoufadhili kwa ajili ya kunufaisha wanasiasa fulani mnamo 2022 wakati Kenya itakuwa inawachagua wanasiasa wao akiwemo rais wa kumrithi Uhuru.
Rais Uhuru amejitenga na muswada huo akisema jukumu lake sasa ni kuzingatia miradi ya maendeleo. Aliongeza kwamba yeye hatajiingiza kwenye siasa baada ya 2022.
Ili kuelewa kwa nini muswada huu unakuja wakati huu, ni muhimu kuelewa nguvu zinazokinzana katika jukwaa la kisiasa zikilenga uchaguzi wa 2022. Rais Uhuru amesisitiza kwamba atamuunga mkono makamu wake, William Ruto anayepania kumrithi.
Lakini si wote wanaoimba pambio hili. Baadhi ya wanasiasa wa chama cha Jubilee wanaichimbia kaburi fursa ya Ruto; wanasema hawaungi mkono ndoto zake za urais. Wanasiasa hao wanaegemea upande wa Seneta wa Baringo, Gideon Moi.
Gideon ni mwanaye Rais mstaafu, Daniel arap Moi. Uhusiano wake na Ruto kisiasa ni mbaya mno na wanachosubiri wanasiasa hao ni kutoana kijasho 2022.
Gideon ni mwenyekiti wa chama cha Kanu ambacho alikirithi kutoka kwa babake alipostaafu 2002. Wadadisi wa siasa wanasema Seneta huyo ndiye amemtuma Kamket kuwasilisha mswada huo bungeni ili uhujumu ndoto za Ruto.
Kiongozi wa walio wengi bungeni, Adan Duale amefuata nyayo za Rais Uhuru kwa kusema kamwe hatakubali kupitishwa kwa muswada huo bungeni.
Kanu iliunga mkono chama cha Jubilee katika uchaguzi wa mwaka jana ikitarajia kufaidika kutokana na nyadhifa mbalimbali serikalini, lakini waliambulia patupu wakati Rais na Makamu wake walipounda Serikali.
Hatua hii huenda iliwatuma wana Kanu kufikiria upya uhusiano wao na Jubilee na hatma ya baadaye ya kiongozi wao. Kanu iko mbioni kutafuta njia na marafiki wapya katika safari hii ndefu iliyojaa hatari ya kuelekea 2022.
Lakini muswada huo ukipitishwa, unaweza kupokea uungwaji mkono kutoka kwa mirengo mbalimbali ikiwemo ya upinzani.
Kauli ya OdInga
Kiongozi wa Upinzani, Raila Odinga amepinga vikali muswada huo akisema hautapita. Kuna dalili Raila atawania tena urais 2022 baada ya uhusiano wake na viongozi wenza wa upinzani kukwama kwenye bahari ya Muungano wa Nasa. Muungano huu unayumbayumba huku Raila akilalama kwamba haitakuwa muda mrefu kabla ya viongozi wenza wake kumsaliti kama vile Yesu Kristo alivyosalitiwa na Yuda.
Ikiwa anawania urais, Raila hatataka kuwa Rais asiye na mamlaka ya kutosha.
Ruto naye amepuuzia mbali muswada huo akisema wakati wa kufanya siasa umeisha na wale wanaotaka kupoteza muda kwa siasa zisizo na maana wanafaa kusubiri hadi 2022.
Jamii ya Wakikuyu ambayo ni kabila la Rais Uhuru imegawanyika katikati kuhusu endapo watampigia kura Ruto 2022 kama shukrani kwa kumuunga mkono mara mbili kijana wao Uhuru (2013 na 2017).
Lakini familia ya Mzee Moi pamoja na wafuasi wa Kanu hawataki kusikia wala kusimuliwa juu ya ndoto za Ruto kumrithi Uhuru.
Miezi miwili iliyopita, Gideon na nduguye Raymond walihutubia wanahabari wakisema Wakikuyu hawana deni lolote la kisiasa kwa mtu yeyote kumaanisha kwamba si lazima kabila hilo limpigie Ruto kura 2022.
Lakini kulingana na makubaliano kati ya Uhuru na Ruto, Wakikuyu hawana budi kumpigia Makamu wa Rais kura awe rais wa tano wa Kenya.
Muswada huu unaweza kusambaratisha ndoto hizo lakini ikiwa utapita. Na je, utapita vipi huku Jubilee ikiwa na wabunge wengi zaidi kuliko vyama vingine?
Lakini ukipitishwa kwa uungwaji mkono wa Jubilee na Baraka za Rais Uhuru, Ruto anaweza kufaidika kwa sababu atakuwa na nyadhifa nyingi za kuwagawia wale watakaomuunga mkono kuliko kujistarehesha bila hakikisho la kuungwa mkono na Wakikuyu pale Uhuru atakapostaafu.
Ruto anaweza kumwamini Rais Uhuru anaposema hatamuacha 2022 lakini Uhuru hana uwezo wa kuwalazimisha Wakikuyu wote popote walipo kumpigia kura Ruto.
Katika miaka iliyopita, jamii ya Wakikuyu imeenda kinyume na ahadi zilizotolewa na viongozi wao kwa wale waliowaunga mikono kunyakua urais.
Mbali na hayo, Kanu imesema wanaunga mkono Muswada wa Kamket kwa kuwa unalenga kuleta mazuri katika uongozi. Ni mapema kwa Jubilee kuonyesha ishara zozote za kupigia debe muswada huo lakini kuna uwezekano wa mtazamo huu kubadilika.
Katika Kanda ya Afrika Mashariki, si jambo geni kwa wanasiasa kubadilisha Katiba ili kuwapa viongozi fulani nafasi ya kuongoza au kuendelea kuongoza kwa muda mrefu.
Mfano mzuri ni Rwanda ambapo utawala wa urais wa miaka saba umepangwa na kutekelezwa. Uganda pia ina mpango kama huu. Huenda watu fulani katika Jubilee wanataka Rais Uhuru kuendelea uongozini kwa kuwania kiti cha waziri mkuu.
Rais Uhuru ataendelea kuwa mwenyekiti wa chama cha Jubilee baada ya kustaafu lakini pia kuna uwezekano kuwa anaweza kuendelea kuongoza ikiwa muswada huu utapitishwa kwa kuungwa mkono na Jubilee.
Kwa sasa, wabunge na viongozi wa Jubilee hawataki kuonekana kuunga mkono mswada huu kwa sababu uongozi wa chama chao haujafikia uamuzi mahsusi.
Lakini kwa sababu ya siasa zetu ambazo jamii nyingine zinafungiwa nje ya uongozi, muswada huu unaweza kuwa tiba kamili ya kuwaleta uongozini viongozi wa makabila mengine wanaohisi wamefungiwa nje ya uongozi muda mrefu.
Kamket anateta kuwa, muswada wake haulengi kukatisha ndoto za wanasiasa fulani bali unapania kuleta uwiano nchini. Pia anasema wabunge wengi wa Jubilee wanaufurahia na wanasubiri kwa hamu kuupitisha.

Waziri ataka wachimbaji wadogo 400 kuondoka eneo la mwekezaji


Naibu Waziri wa Madini, Dotto Biteko amewataka wachimbaji wadogo zaidi ya 400 waliovamia eneo la uchimbaji katika Kijiji cha Bululu, Kata ya Nyamtukuza, Wilaya ya Nyang’wale mkoani Geita kuondoka katika eneo hilo kwa kuwa lina leseni ya mwekezaji.
Eneo hilo lenye ukubwa wa kilomita za mraba 13.6 lina leseni 24 za uchimbaji chini ya kampuni ya madini ya Nyanzaga ambayo ilikata leseni ya utafiti wa madini namba PL 9662 ya mwaka 2014 ambayo inaisha muda wake Machi 30.
Akizungumza jana Machi 6, 2018 na wachimbaji hao,  Biteko amesema nia ya Serikali ni kutoa maeneo ya uchimbaji kwa wachimbaji wadogo ili waweze kunufaika na rasilimali hiyo, lakini akawataka kuheshimu sheria hadi pale muda wa mwekezaji utakapomalizika.
"Ni jambo la kusikitisha wilaya nzima kukosa eneo la
wachimbaji wadogo, taarifa niliyopata ni kwamba maeneo yote yana leseni za wawekezaji na hawajazifanyia kazi, niwaombe mtulie msiharibu mambo huyu leseni yake ndio inafika mwisho mkichimba mnampa nafasi ya kushtaki na hamtapata, vuteni subira zimebaki siku chache,” amesema Biteko.
Amesema  kwa sasa leseni ambazo zimeshikiliwa na mwekezaji na hajaendeleza eneo zikiisha muda wake wizara inazigawa kwa wachimbaji wadogo na kuwataka wajiunge kwenye vikundi kwa kuwa leseni hazitolewi kwa mtu mmoja mmoja.
Awali, Mbunge wa Nyang’wale,  Hussein Kasu amesema  wananchi wamechoka kukimbizwa kwenye maeneo kila wanapovumbua eneo lenye dhahabu na kusema sasa wamefika mwisho na hawapo tayari kuendelea kuonewa.
Mwenyekiti wa wachimbaji wadogo mkoani Geita, Christopher Kadeo amesema changamoto kubwa katika sekta ya madini ni maeneo mengi kuwa na leseni kubwa za utafiti ambazo hazifanyiwi kazi huku wachimbaji wadogo wakiwa hawana maeneo.

Chadema, ACT wahaha madiwani wao kuhamia CCM


Wakati katibu wa itikadi na uenezi wa CCM, Humphrey Polepole akianza ziara yake mkoani Kigoma, viongozi wa vyama vya ACT - Wazalendo na Chadema wamesema watakuwa tayari kuwalinda madiwani na viongozi wao wasitimkie CCM.
Kwa sasa ACT ina madiwani 19, Chadema mmoja na CCM wanao wanane. Vyama hivyo vya upinzani mkoani hapa vimeamua kujihami kutokana na wimbi la madiwani wa upinzani kujitoa katika vyama vyao na kuhamia CCM wakidai kuunga mkono juhudi za Serikali ya Awamu ya Tano.
Katibu wa CCM Mkoa wa Kigoma, Naomi Kapambala amesema wakati wa ziara ya Polepole iliyoanza juzi wanatarajia kuvuna wanachama wapya kutoka vyama vya upinzani hasa Chadema na ACT vyenye wanachama na wafuasi wengi mkoani hapa. Licha ya kutowataja kwa majina, alisema kuna baadhi ya madiwani wameahidi kuachana na vyama vyao ili wajiunge na CCM kutokana na chama hicho kutekeleza ilani yake ya uchaguzi vizuri na kuleta maendeleo kwa wananchi.
Wakizungumza na Mwananchi mjini Kigoma, viongozi wa vyama hivyo vya upinzani walisema wamepokea taarifa za kuwepo mikakati ya baadhi ya madiwani na viongozi wa vyama vyao kuhamia CCM, jambo lililowafanya kuchukua hatua mbalimbali kukabiliana na tishio hilo. Katibu wa Chadema Mkoa wa Kigoma, Shabani Madede alisema alipata taarifa juu ya kadi za chama hicho kununuliwa kwa wingi katika Wilaya ya Uvinza kiasi kwamba baadhi ya matawi yameishiwa.
“Kadi zetu (Chadema) zinauzwa Sh1,500 lakini nimeelezwa kuwa kuna watu wanapitapita huko vijijini kwenye Wilaya ya Uvinza na kununua kadi kwa Sh3,000 hadi Sh5,000. Jambo hili lilinishangaza na nimetoa maelekezo kwa makatibu wote wa matawi, kata na majimbo kusitisha kuuza kadi,”alisema Madede.
Alisema kuna watu katika vyama vya siasa wamegeuza biashara kwa kununua wanachama kutoka vyama vingine, jambo linalodumaza na kudhoofisha demokrasia katika ushindani wa kisiasa.
“Tumejiandaa vya kutosha kulinda madiwani, viongozi na wanachama wetu kuhamia CCM, lakini inawezekana wachache wakadanganywa kwa kununuliwa na hivyo kujiunga CCM. Ikitokea tukasikia kuna waliohamia huko watakuwa ni wanachama hewa, bila shaka ndio hizo kadi zinazonunuliwa kwa bei kubwa,” alisema.
Katibu wa ACT Jimbo la Kigoma mjini, Azizi Ally alikiri kuwepo mikakati ya baadhi ya madiwani wa chama hicho kujiunga CCM. Hata hivyo, alisema hatarajii kuona hilo likifanyika.
Alisema wametumia nguvu na gharama kubwa kukijenga chama hicho tangu mwaka 2014 na kwamba, madiwani wote walio nao waliwapigania kushinda kwenye kata zao. Tayari madiwani hao wanadaiwa kula kiapo cha uaminifu kwa chama chao na kuahidi kuwatumikia wananchi wa Kigoma mjini kutokana na chama chao kuongoza manispaa, kazi ambayo hawajaitekeleza kutokana na kuwepo ahadi zinazoendelea kutekelezwa.
Akimnadi aliyekuwa mgombea ubunge wa CCM Jimbo la Siha, Dk Godwin Mollel, Januari 27, naibu katibu mkuu wa chama hicho, Rodrick Mpogolo alisema viongozi wa upinzani wanajiunga na CCM baada ya kubaini ajenda ya kuwahudumia wananchi ipo katika chama hicho.

Kenya yakataa wito kutaka Marekani isuluhishe mgogoro


 Serikali imekataa wito unaotaka Marekani iingilie kati mgogoro wa sasa wa kisiasa dhidi ya upinzani.
Katibu Mkuu wa Mambo ya Nje, Macharia Kamau amesema hakuna haja ya mazungumzo kwa kuwa Kenya imefanikiwa kupitia mzunguko wa uchaguzi wa miaka mitano na sasa inazingatia kuwahudumia raia wake.
Kamau alikuwa akijibu makala iliyochapishwa mwishoni mwa mwezi uliopita na mabalozi wa zamani wa Marekani nchini Kenya Johnnie Carson na Mark Bellamy ambao walitaka Marekani iingilie kati hali ya Kenya.
"Jibu letu kwa ombi la kipuuzi la waandishi kutaka uingiliaji wa Marekani nchini Kenya kwa sauti kubwa ni hapana, shukrani," amesema katika taarifa Jumanne.
"Hiki ni kielelezo cha wazi cha jinsi mawazo yaliyotangulia na yaleyale juu ya Afrika kutoka kwa wataalamu hawa wa nchi za Magharibi wanavyoathiri uzoefu wowote na maarifa ambayo wanaweza wawe wameyapata katika bara. Weledi wao wa kukosea juu ya masuala ya Kiafrika na ya Kenya siyo tu unashangaza bali pia unaonyesha kwa nini tafiti zinazofanywa kwenye madawati juu ya Afrika, na chanzo pekee cha habari kikiwa kile kinapendelea vyombo vya habari vya Magharibi, unapaswa kushughulikiwa kikamilifu kwa kukataa," amesema.
Msemaji wa Rais Uhuru Kenyatta Manoah Esipisu alionekana kuthibitisha kuwa, kwa kweli, huo ndio msimamo alionao Mkuu wa Nchi.
"Katibu Mkuu amesema na huo ndiyo msimamo. Je, unataka kuongeza nini?" ameuliza.

Saba wapandishwa kizimbani kwa wizi, kutakatisha fedha


Watu saba akiwamo raia wa Zambia wamefikishwa katika Mahakama ya Hakimu Mkazi Kisutu wakikabiliwa na mashtaka matatu ya kula njama, wizi na utakatishaji  fedha kiasi cha Sh120.5 milioni.
Akiwasomea hati ya mashtaka inayowakabili leo Jumatano Machi 7, 2018 wakili wa Serikali, Mwanaamina Kombakono mbele ya hakimu mkazi mkuu, Huruma Shaidi amewataja washtakiwa hao kuwa ni Robert Silaa (26) ambaye ni  wakala wa usafirishaji.
Wengine ni  Isihaka Ngubi (25) ambaye ni dereva, Cathbeth Mlugu (35) mlinzi wa Zambia Cargo and Logistic Ltd;  Mrisho Mindu;  Giften John (32); Maulid Said (40) wote makarani; Kirby Ng'andu ambaye ni meneja mwendeshaji wa kampuni ya Zambia Cargo and Logistic Ltd.
Wakili Kombakono amedai kuwa kati ya Januari mosi na Februari 6, 2018 katika kampuni ya Zambia Cargo and Logistic Ltd iliyopo Dar es Salaam, washtakiwa hao walikula njama ya kutenda kosa la wizi.
Washtakiwa hao wanadaiwa kuwa katika kipindi hicho, waliiba katoni 700 za korosho zilizobanguliwa zenye thamani ya dola 54,180 za Marekani (zaidi ya Sh120.5 milioni) mali ya Barabara Trading Tanzania Limited.
Iliendea kudaiwa katika shtaka la utakatishaji fedha, walijihusisha moja kwa moja na muamala wa katoni 700 za korosho zilizobanguliwa zenye thamani ya Sh120,563,909.55 wakati wakijua mali hiyo ilikuwa ni zao la wizi.
Baada ya washtakiwa kusomewa mashtaka hayo yanayowakabili, wote walikana na upande wa mashtaka alidai kuwa upelelezi haujakamilika.
Washtakiwa walipelekwa rumande kwa sababu shtaka la utakatishaji wa fedha kwa mujibu wa sheria halina dhamana.
Kesi imeahirishwa hadi Machi 9,2018 kwa ajili ya kutajwa ili kuangalia kama upelelezi utakuwa umekamilika ama la.

Mbunge CCM ajilipua kwa hoja nane


Bunge limekiri kupokea barua ya mbunge wa Nzega Mjini (CCM), Hussein Bashe anayekusudia kuwasilisha hoja binafsi inayobeba mambo manane, yakiwamo mashambulio ya risasi, kusinyaa kwa demokrasia nchini, utekaji, watu kupotea na mauaji ambayo pia yanawahusisha wanasiasa.
Bashe, ambaye kusudio lake limeungwa mkono na Mtandao wa Watetezi wa Haki za Binadamu (THRDC), Kituo cha Sheria na Haki za Binadamu (LHRC) na mbunge wa Kigoma Mjini (ACT-Wazalendo), Zitto Kabwe alieleza hayo katika barua aliyomwandikia Katibu wa Bunge, Stephen Kagaigai juzi.
Katika barua hiyo, Bashe anasema lengo la hoja hiyo ni chombo hicho cha kutunga sheria kuunda tume teule kuchunguza matukio hayo aliyodai kuwa yanahatarisha usalama, umoja wa Taifa na utu wa Mtanzania.
“Barua yangu tayari imeshapokewa bungeni. Wabunge kupitia vyama vyetu ni wawakilishi wa wananchi na tumepewa dhamana ya kuisimamia Serikali. Naamini hiki ninachotaka kukifanya ni kwa masilahi ya wananchi, Taifa na chama changu,” alisema Bashe katika mazungumzo na Mwananchi jana.
Akizungumza na mwandishi wetu jana, Kagaigai alisema barua ya mbunge huyo imeshapokewa bila kufafanua zaidi.
Katika maelezo yake jana, Bashe alisema jinsi matukio hayo yanavyojirudia, raia wanaendelea kuwa na hofu na ongezeko la mgawanyiko katika jamii kwa kuwa jambo hilo ni muhimu katika kulinda usalama wa Taifa.
Katika barua hiyo Bashe amesema, “Jukumu la msingi la Bunge ni kuisimamia Serikali kwa mujibu wa Katiba ibara ya 63 (2) na tuhuma zote hizi zinagusa moja kwa moja taasisi zilizo serikalini.
“Nimeona kuna umuhimu wa jambo hili kupewa fursa kujadiliwa ndani ya Bunge na kuundwa Tume teule ya Bunge ambayo itafanya uchunguzi na kuwasilisha taarifa ndani ya Bunge ili kulinda usalama wa Taifa letu.”
Alifafanua katika barua hiyo kuwa ataliomba Bunge kuunda kamati kuchunguza matukio mbalimbali yanayoonyesha kutishia umoja, usalama na mshikamano wa Taifa.
Mambo manane
Mambo hayo manane ameyataja kuwa ni kusinyaa kwa demokrasia na haki za raia; kupotea, kutekwa na kuuawa kwa raia katika chaguzi mbalimbali na matukio ya uhalifu katika siasa; kupigwa risasi na kuumizwa kwa raia ndani ya nchi na kikundi ambacho kinaitwa wasiojulikana.
Nyingine ni ameyataja kuwa ni mauaji ya viongozi wa kisiasa wanaotokana na vyama halali vya siasa nchini; ukandandizwaji wa uhuru wa raia kutoa maoni, kukosoa na kushauri; matumizi mabaya ya sheria na ukandamizaji wa demokrasia ndani ya nchi; haki za kikatiba na kisheria za vyama vya siasa kutoheshimiwa na tuhuma dhidi ya vyombo vya usalama na matumizi ya silaha za moto kwa raia.
“Kwa heshima kubwa nachukua fursa hii kutoa taarifa ya hoja binafsi kwako ikiwa ni katika kutimiza majukumu yangu kama mbunge kwa mujibu wa ibara ya 63(2) pamoja na ibara tajwa hapo juu kwa kuzingatia kanuni za kudumu za Bunge toleo la Januari, 2016 mahsusi kanuni ya 55, fasili ya (1) na fasili ya (2) zikisomwa kwa pamoja na kanuni ya 120 fasili ya (I) mpaka ya (4) nakusudia kuwasilisha hoja binafsi katika mkutano wa Bunge la 11,” inaeleza sehemu ya barua hiyo.
Atoa ufafanuzi
Alipotakiwa kutoa ufafanuzi wa kina kuhusu hoja hiyo, Bashe alisema kumekuwa na matukio mengi nchini yanayoleta hali ya sintofahamu na kwamba yanatakiwa kupatiwa ufumbuzi.
“Tanzania tuna mihimili mitatu; Bunge, Serikali na Mahakama. Bunge ni chombo kinachowawakilisha wananchi. Mfano ni yaliyotokea wilayani Kibiti, viongozi wa CCM waliuawa lakini mpaka leo hakuna aliyefikishwa katika vyombo vya sheria,” alisema Bashe.
“Katika chaguzi ndogo kumeibuka vurugu pia hakuna waliofikishwa mahakamani na matukio haya yanatokea sana lakini bado yapo na yanaendelea kutokea.”
Alisema wanasiasa nchini wanapaswa kutokimbia wajibu wao wa kikatiba kwa sababu wamepewa dhamana na vyama vyao kuwawakilisha wananchi na kuisimamia Serikali.
“Yupo Azory (Gwanda - mwandishi wa kujitegemea wa Kampuni ya Mwananchi). Huyo ana zaidi ya siku 100 amepotea. Naamini hiki ninachokifanya ni kwa masilahi ya Taifa. CCM inanyooshewa kidole maana ndiyo yenye dhamana ya kuongoza nchi. Lazima kuwe na sehemu ya kuanzia na sehemu yenyewe ni bungeni,” alisema.
Lema amjia juu
Katika ukurasa wake wa mtandao wa kijamii wa Twitter, Bashe aligusia hoja hiyo na kujibiwa na mbunge wa Arusha Mjini (Chadema), Godbless Lema.
Katika majibu yake Lema alimtaka Bashe kuacha kuwa vuguvugu na badala yake aamue kuhamia upinzani au kusimamia misingi ya chama chake kinyume na hapo atakuwa mnafiki.
Lema alisema Bashe analeta hoja ambazo anafahamu wazi kuwa Bunge haliwezi kujadili kutokana na nguvu waliyonayo wabunge wa CCM.
Alisema anachokifanya Bashe kwa sasa ni kutafuta uhalali wa kisiasa na kujionyesha kwenye jamii kuwa anasimamia misingi ya haki lakini ukweli ni kwamba anafahamu fika msimamo wa chama chake.
“Kuthibitisha kuwa anayo majibu ndiyo maana hata yeye (Bashe) alishindwa kwenda kumjulia hali mbunge mwenzake Tundu (Lissu - Singida Mashariki) aache unafiki,” alisema Lema.
Lissu alishambuliwa kwa risasi zaidi ya 30 katika makazi yake mkoani Dodoma Septemba 7 mwaka jana, kwa sasa anaendelea na matibabu nchini Ubelgiji.
Jana, Bashe alipoulizwa juu ya majibu ya Lema alisema, “Sijui bwana ila kwa ufupi Lema naye ni mbunge anaposema Bunge limekufa maana yake hata yeye ameshindwa kuisimamia Serikali. Wabunge tusikwepe majukumu yetu.”
Aungwa mkono
Wakati Lema akisema hayo, mratibu wa THRDC, Onesmo Ole Ngurumwa alisema Bashe anatekeleza moja ya mapendekezo 17 waliyoyatoa kwa Serikali kuhusu haki za binadamu.
“Katika mapendekezo yetu 17, tulitaka Bunge liunde kamati maalumu kuchunguza vitendo vya uvunjifu wa haki za binadamu, kama ilivyofanya huko nyuma kwenye Operesheni Tokomeza na matukio mengine,” alisema.
“Tulitaka Bunge lifanye hivyo kwa sababu vyombo vya dola kama Jeshi la Polisi nao ni watuhumiwa wa mauaji kwa hiyo hawawezi kujichunguza. Kwa hiyo Bashe amefanya vizuri tunaamini Bunge litasimamia nafasi yake.”
Ole Ngurumwa alilikosoa Bunge la 11 akisema limeshindwa kusimamia nafasi yake ikiwa pamoja na kuiwajibisha Serikali.
“Bunge la sasa limepoteza nguvu ya kuisimamia Serikali kama ilivyokuwa zamani. Kama uongozi wa Bunge unaogopa hata wabunge nao hasa wa CCM wanajaribu lakini ni wachache tu wanaojiamini,” alisema.
Kaimu mkurugenzi mtendaji wa LHRC, Naemy Silayo alisema kituo hicho kimefurahishwa na hoja hiyo.
“Huo ndiyo utendaji wa mihimili mitatu. Kazi ya Bunge ni kuisimamia Serikali na kutunga sheria. Kazi yake ni kuiwajibisha Serikali kwa kuihoji ili kupata majibu yaliyosahihi hasa katika vitendo hivyo,” alisema Silayo.
Mbunge wa Kigoma Mjini, Zitto Kabwe alisema suala si kama hoja ya Bashe itapitishwa au la, bali hoja ni kuwa jambo hilo ni kubwa na la msingi kustahili kujadiliwa na Bunge.
“Masuala anayoibua Bashe hayajawahi kuelezwa uchunguzi wake umefika wapi, hivyo hoja ya Bashe itatoa nafasi kwa Serikali kueleza kama imefanya uchunguzi na matokeo yake nini ? Mimi binafsi ninaunga mkono hoja ya Bashe,” alisema.
“Hata kama chama chake kitaizuia, mjadala tu wa jambo hili ambao ameuibuka ni muhimu sana. Hoja hii ikiletwa bungeni nitaiunga mkono.”
Alisema Bashe ndiye alitoa hoja Bunge kuchunguza suala la Lissu kupigwa risasi na suala hilo kupelekwa kwenye kamati.
“Mpaka sasa hakuna taarifa iliyotolewa. Hoja hii binafsi ya Bashe itawezesha taarifa hiyo ya kamati ya ulinzi na usalama kuwekwa wazi. Kila Mbunge mzalendo amuunge mkono Bashe kwenye hoja hii,” alisema Zitto.

Mbunge Chadema ataka wananchi kupewa mbadala wa zao la bangi


Mbunge wa Arumeru Mashariki (Chadema), Joshua Nassari ameitaka Serikali kuwapatia  zao mbadala wananchi wa jimbo lake ambao baadhi wamekuwa wakitegemea kulima bangi kama zao za biashara.
Akizungumza katika kikao cha kamati ya ushauri mkoa wa Arusha(RCC) leo Jumatano Machi 7, 2018 Nassari amesema wananchi hasa maeneo ya Kisimiri hawajui kilimo kingine cha biashara  zaidi ya bangi.
"Magunia mengi ya bangi yamekamatwa katika jimbo langu, lakini tulikubaliana kikao kilichopita cha RCC wananchi watafute zao mbadala walime hasa Pareto lakini hadi sasa hawajafundishwa kulima,”amesema.
Hata hivyo, Kaimu Mkuu wa Mkoa Arusha, Iddi Kimanta amesema kulima bangi ni kosa la kamwe Serikali haitawavulia.
Amesema bodi ya Pareto imeahidi kuanzia Machi itaanza kutoa elimu hivyo Nassari awe na subira.
Katibu mwenezi wa CCM Mkoa wa Arusha, Shaban Mdoe akichangia hoja amemtaka Nassari kuishukuru Serikali ya Awamu ya Tano kwa kufikia uamuzi kuwatafutia zao mbadala wananchi wa Meru.
"Nassari ashukuru sana  Serikali kwani ingeweza kupiga marufuku kilimo cha bangi kama madawa ya kulevya mengine bila kutoa mbadala" amesema.

Dk Tulia akabidhi jengo la upasuaji Mbeya


Naibu Spika wa Bunge,  Dk Tulia Ackson amekabidhi mradi wa  jengo la upasuaji  katika Kituo cha Afya Ruanda cha jijini hapa  kwa Mkuu wa Mkoa wa Mbeya,  Amos Makalla.
Ukarabati wa jengo hilo uliofanywa na taasisi ya naibu spika huyo ya Tulia Trust, umegharibu Sh40milioni.
Dk Tulia amekabidhi jengo hilo leo Jumatano Machi 7, 2018 katika ziara yake mkoani hapa sambamba na kukagua  ukarabati wa mradi  huo na kuzungumza na wananchi na wagonjwa waliofika kupata matibabu katika  kituo hicho.
Amesema katika kuunga mkono jitihada za Serikali, taasisi yake imelenga kuboresha huduma  muhimu za  afya za  wajawazito na watoto  katika vituo vya afya na zahanati.
"Mkuu wa mkoa (Makalla) nakupongeza kwa jitihada zako mpaka kufikia hatua za mwisho za kusimamia mradi huu   sasa ninaomba changamoto za  mahitaji madogo  yaliyopo  yafanyiwe kazi  ili huduma za upasuaji zianze kutolewa," amesema.
Kwa upande wake Makalla amesema Serikali imetoa Sh700  milioni kwa ajili ya ujenzi wa majengo ya kisasa katika Kituo cha Afya Ruanda pamoja na vifaa tiba.
"Naibu Spika ukarabati wa chumba cha upasuaji umekuwa chachu kwa Serikali na sasa imetoa fedha kwa ajili ya ujenzi wa majengo ya kisasa katika kituo hiki kwa kweli unatupa moyo sana kama viongozi wa Mkoa," amesema.
Pia, ameagiza halmashauri ya jiji kupitia mapato yake ya ndani kutoa fedha kwa ajili ya kumalizia baadhi ya mahitaji katika chumba cha upasuaji ili kianze kutoa huduma kwa wananchi
"Natoa wiki mbili ukarabati huu uwe umekamilika na huduma zianze kutolewa mapema iwezekanavyo," amesema.
Mganga mfawidhi  wa kituo hicho, Elioth Sanga amesema  wametenga Sh55 milioni kwa ajili ya ununuzi wa vifaa vya upasuaji.

Wabunge Uingereza wataka kumtembelea Morsi gerezani


 Wabunge wa Uingereza wameiomba serikali ya Misri iwape ruhusa ya kumtembelea kwa lengo la kumwona rais wa zamani Mohamed Morsi aliyeko jela huku kukiwa na taarifa juu ya kuzorota kwa afya yake.
Morsi anashikiliwa katika chumba cha peke yake katika gereza la Tora na familia yake imeruhusiwa kumtembelea mara mbili tu tangu alipofungwa baada ya kupinduliwa na jeshi mwaka 2013.
Morsi alishinda urais katika uchaguzi uliofanywa kufuatia maandamano yaliyoung’oa utawala wa miaka 30 wa Hosni Mubarak, na alitawala kwa mwaka mmoja kabla ya kufungwa.
Alihukumiwa baada ya kutiwa hatiani kutokana na mlolongo wa mashtaka yakiwemo ya kuhatarisha usalama wa taifa kwa kuvujisha nyaraka za siri kwa Qatar na kuhamasisha vurugu za kundi la Udugu wa Kiislamu (Muslim Brotherhood).
Kumekuwa na ripoti kwamba amenyimwa haki ya kupewa matibabu ya maana akiwa jela. Maombi ya kumtembelea yametumwa kwa Balozi wa Misri nchini Uingereza na yanatokana na maombi ya familia ya Morsi kwa wabunge wa Uingereza.
Wabunge na wanasheria wa kimataifa wanaotaka ruhusa ni pamoja na mwenyekiti wa zamani wa Kamati Maalum ya Mambo ya Nje Sir Crispin Blunt. Watu wengine wanaotaka mapitio ya kuwekwa kwake kizuizini ni pamoja na Lord Faulks, waziri wa zamani wa Sheria na Paul Williams, mwanachama wa kamati ya chama cha wafanyakazi kuhusu afya. Tim Moloney QC na mshauri wa kisheria wa kikundi.
Blunt amesema: "Kuna wasiwasi wa kuaminika kwamba hali ambamo Dk Morsi anashikiliwa inaweza kuwa haijafikia viwango vya kimataifa na Misri kwenyewe. Tunawasilisha ombi hili kwa mamlaka za Misri ili turuhusiwe kuona na kutathmini wenyewe mazingira ambamo Dk Morsi anazuiliwa.”

Serikali kukarabati shule za ufundi


 Naibu Katibu Mkuu Wizara ya Elimu, Sayansi na Teknolojia, Dk Ave Semakafu amesema Serikali inakarabati shule za sekondari za ufundi ili kuwaandaa wasichana kuwa wabunifu wa teknolojia ya sayansi.
Semakafu amesema hayo leo Machi 7 kwenye kongamano la wabunifu lililoandaliwa na British Council kwa kushirikiana na Human Development Innovation Fund (HDIF) ikiwa ni maadhimisho ya siku ya kimataifa ya wanawake duniani.
Amesema kufutwa kwa shule za sekondari za ufundi kulisababisha vijana kuanza kujifunza masuala ya ubunifu wa teknolojia baada ya kumaliza kidato cha nne.
“Vijana wanatakiwa kujifunza masuala hayo tangu wakiwa wadogo ili waweze kuwa wabunifu na kutoa mchango wao kwa taifa,” amesema na kuongeza serikali imeliona hilo na kuanza kuchukua hatua.
Akitoa mfano, Semakafu alisema kuna shule za sekondari ambazo zinakarabatiwa zikiwemo za Ifunda na Moshi na baadaye zitawekewa vifaa ili zianze kutoa mafunzo ya ufundi.
“Zipo shule nyingi zinakarabatiwa hivi sasa ambazo ni za ufundi zitaanza kutoa elimu,” amesema.
Amesema katika mwaka wa fedha 2018/19 shule za sekondari za ufundi zitaanza kutoa elimu.
“Hii itasaidia kwa kiasi kikubwa wasichana wabunifu kuanza kazi hiyo wakiwa bado na umri mdogo,” alisema.
Naibu Kiongozi wa Timu wa HDIF, Joseph Manirakiza alisema kongamano hilo limewaleta pamoja wabunifu wanawake ili waweze kushawishi wengine kuingia katika ubunifu.
Alisema taasisi hiyo imekuwa ikisaidia wanawake na wasichana ikiamini kwamba wanawake wakisaidiawa jamii nzima itanufaika.
Naibu Mkuu wa Idara ya Kimataifa ya Maendeleo ya Uingereza (DFID), Jane Miller alisema imekuwa ikisaidia wanawake wa Tanzania katika sekta elimu, afya hasa uzazi wa mpango.
Alisema wakati huu ambao yanafanyika maadhimisho ya siku ya kimataifa ya wanawake, Uingereza itaendelea kuwasaidia wanawake na wasichana ili waweze kusimama wenyewe na kujitegemea.
“Wanawake wanatakiwa kujiamini na kuona kuwa wanaweza kufanya jambo lolote hata kuwazidi wanaume,” amesema.

LHRC yaijibu NEC

Kituo cha Sheria na Haki za Binadamu (LHRC)  kimeitaka Tume ya Taifa ya Uchaguzi (NEC) kufanyia kazi changamoto zilizoibuliwa na wadau wakati wa uchaguzi mdogo wa ubunge Kinondoni na Siha bila kujali udhaifu katika uwasilishaji wa changamoto hizo.
Kituo hicho kimedai kuwa kuibuliwa kwa changamoto hizo kunalenga kujenga jamii yenye haki na usawa.
Hayo yameelezwa leo Jumatano Machi 7, 2018 na Kaimu Mkurugenzi Mtendaji wa LHRC, Naemy Sillayo alipokuwa akijibu hoja zilizotolewa na NEC wiki iliyopita kutokana na tamko lililotolewa na asasi za kiraia.
Sillayo amesema tamko hilo halikutolewa na LHRC bali lilitolewa na umoja wa asasi za kiraia ambao kituo hicho ni mwanachama.
Sillayo amesema LHRC inakubaliana na hoja iliyotolewa na azaki ya kutaka NEC kuboresha kanuni za usimamizi wa uchaguzi na kutovibana vyombo vya habari.
“Hilo litasaidia kutoweka mipaka kwa vyombo vya habari wakati wa kutimiza jukumu la kutoa taarifa kwa umma,"amesema.
Kuhusu mashirika kunyimwa vibali vya uangalizi wa uchaguzi Sillayo amesema jambo hilo lilipeleka butwaa kwa azaki.
"LHRC pekee ndiyo asasi iliyopewa kibali kuangalia uchaguzi, tofauti na ilivyokuwa uchaguzi wa 2015; karibu asasi 400 ziliangalia uchaguzi. Asasi ziliomba lakini majibu yalikuwa nafasi zimejaa, tunasisitiza hili liangaliwe kwenye chaguzi zijazo na kutoa muda wa kutosha wa kutuma maombi kwa asasi,"amesema.
Hoja nyingine ambayo LHRC imejibu ni utaratibu mpya uliowekwa na NEC unaowataka watazamaji kuwasilisha taarifa zao ili zikaguliwe na kuridhiwa na tume.
"Utaratibu ulioanzishwa mwaka 2015 unaondoa dhana ya asasi za kiraia kuwa vyombo huru. Utaratibu huu unalazimisha ripoti ya awali ya uangalizi iwasilishwe kwa tume na ikiri kupokea ripoti hiyo ndipo Azaki zinazoangalia uchaguzi ziweze kutoa taarifa kwa umma.
" Hata hivyo tume haijaweka muda maalumu ambao itatumia kabla ya kukiri kuipokea ripoti ya uchaguzi,” amesema.
Amesema upo umuhimu wa NEC kuzishirikisha asasi za kiraia na wadau wengine katika maboresho ya sheria, kanuni na taratibu zinazoratibu utendaji wa tume hiyo na usimamizi wa uchaguzi kwa lengo la kuimarisha demokrasia nchini.

Ujenzi Kinyerezi II wakamilika kwa asilimia 90

Ujenzi wa mradi wa kufua umeme wa Kinyerezi II umekamilika kwa asilimia 90 huku ukielezwa kukamilika kwake utaongeza nishati hiyo katika gridi ya Taifa.
Hayo yamesemwa leo Machi 7, 2018 na  meneja wa Kinyerezi II, Stephen Manda wakati akitoa maelezo kwa ujumbe wa Bodi ya Usajili wa Wahandisi (ERB) waliotemebelea mradi huo.
"Mradi huu ni wa megawatt 240 ambao utakamilika rasmi Septemba. Ukijumulisha na Kinyerezi I wenye megawatt 150 tutakuwa na megawati 390," amesema Manda.
Amesema mahitaji kwa nchi nzima ni megawatt 1,100 huku uwezo mara baada ya kukamilika kwa Kinyerezi II itakuwa ni megawati 1,400 hivyo kuwa na akiba ya megawatt 300.
"Tanzania ya viwanda inahitaji umeme, umeme upo wa kutosha kwa hiyo wawekezaji wachangamkie fursa ya uwekezaji," amesema Manda
Naye kaimu msajili wa ERB, Patrick Barozi amesema kwa sasa Tanzania inahitaji umeme wa kutosha kwa ajili ya kutekeleza sera ya viwanda na nishati hiyo ipo hivyo ni wawekezaji kujitokeza kwa wingi.
Kuhusu miundombinu ya usafirishaji umeme, Barozi amesema ni wakati wa Tanesco kuboresha miundombinu hiyo ili kuondoa tatizo la nishati hiyo kukatika pindi mvua zinaponyesha.
Mwenyekiti wa Bodi ya Wahandisi, Profesa Ninatubu Lema amesema ni jambo jemba kwamba mradi huo unakwenda kama ulivyopangwa na unasimamiwa kwa sehemu kuwa na wazawa.
"Tumesikia kuwa miradi ya Tanesco kuwa umeme ni mwingi na kubwa nitoe wito kwa  wahandisi tuwekeze katika viwanda kwani umeme upo wa kutosha," amesema Profesa Lema

Magufuli atuma rambirambi kifo cha Dk Kabourou


Dar es Salaam. Rais John Magufuli ametuma rambirambi kwa familia ya mbunge wa zamani wa Kigoma Mjini, Dk Aman Kabourou.
Katika taarifa kwa vyombo vya habari iliyotolewa na Ikulu leo Machi 7,2018 Rais pia ametuma rambirambi kwa wana CCM, wananchi wa Kigoma, ndugu jamaa, marafiki na wote walioguswa na msiba huo.
Rais Magufuli katika salamu kwa Mkuu wa Mkoa wa Kigoma, Emmanuel Maganga ameiombea familia ya marehemu na wote walioguswa na msiba huo kuwa na moyo wa subira, uvumilivu na ustahimilivu katika kipindi cha majonzi.
Dk Kabourou aliyekuwa mwenyekiti mstaafu wa CCM Mkoa wa Kigoma amefariki dunia usiku wa kuamkia leo Machi 7,2018 katika Hospitali ya Taifa Muhimbili jijini Dar es Salaam alikokuwa akipatiwa matibabu.
Amesema Dk Kabourou atakumbukwa kwa mchango wake alipokuwa kiongozi katika nyadhifa mbalimbali ndani ya CCM, alipokuwa mbunge wa Kigoma Mjini na wa Bunge la Afrika Mashariki.