Wednesday, September 27

Exim yasaidia kukabili upungufu wa vitanda Mnazi Mmoja


Benki ya Exim imetoa msaada wa vitanda na magodoro 50 katika Hospitali ya Mnazi Mmoja iliyopo Unguja, Zanzibar.
Msaada huo umekabidhiwa na Makamu wa Pili wa Rais wa Serikali ya Mapinduzi ya Zanzibar, Balozi Seif Ali Iddi.
Akipokea msaada huo wenye thamani ya Sh20 milioni, Mkurugenzi Mkuu wa Hospitali ya Mnazi Mmoja, Dk Ali Salim amesema utasaidia katika wodi za wazazi, saratani na watu wenye matatizo ya afya ya akili.
“Tuna upungufu wa vitanda 100 kwenye wodi hizo lakini msaada huu utasaidia kupunguza changamoto zilizopo,” amesema Dk Salim.
Benki hiyo iliyoanzishwa mwaka 1997 ilipata faida kabla ya kodi ya Sh83.3 bilioni hivyo kujiweka kwenye nafasi ya nne kwa ukubwa wa mtaji nchini.
Katika hafla ya kukabidhi msaada huo, Mkuu wa Hazina wa Benki ya Exim, Arafat Haji amesema wametenga Sh200 milioni kwa ajili kusaidia sekta ya afya nchini.
Amesema mikoa 13 yenye upungufu wa vitanda itasaidiwa kupitia mradi huo kwa kuwa malengo yaliyopo ni kutoa magodoro na vitanda 500 katika hospitali za umma. “Hospitali na kliniki nyingi zina upungufu wa dawa, vifaatiba na vitanda. Tumeona tuanze na vitanda ili kurahisisha huduma ya uzazi kwa wajawazito,” amesema Haji.
Baadhi ya mikoa inayotarajiwa kunufaika ni Mbeya, Arusha, Morogoro, Tanga, Dodoma, Kigoma, Kilimanjaro, Shinyanga na Mtwara. Pia visiwa vya Pemba na Unguja.
Takwimu za Shirika la Afya Duniani (WHO) zinaonyesha kuna uwiano wa vitanda saba kwa kila watu 10,000 kwenye hospitali zilizopo nchini.

Marufuku ubomoaji Kinondoni



Mkuu wa Wilaya ya Kinondoni, Ali Hapi amepiga marufuku ubomoaji wa nyumba bila idhini yake.
Pia, ameliagiza Jeshi la Polisi kuwakamata madalali wa Mahakama wanaotumiwa kubomoa nyumba za wananchi bila kupata kibali kutoka kwake.
Amesema hayo leo Jumatano, alipozungumza na wananchi wa Kata ya Kunduchi alipotembelea eneo hilo akiwa ziarani kikazi kusikiliza kero za wananchi na kukagua miradi ya maendeleo, ikiwemo ujenzi wa Soko la Samaki.
Marufuku hiyo imetolewa baada ya Diwani wa Kunduchi, Michael Urio kutoa kero kwamba kuna watu wamevunjiwa nyumba pasipo viongozi wa maeneo husika kushirikishwa.
Hapi amesema kumekuwa na kesi nyingi ofisini kwake kuhusu kubomolewa nyumba na watu aliowaita matapeli na kwamba, kuanzia sasa hakuna atakayebomoa bila ya yeye kujua.
Amesema lengo ni kuhakikisha nyumba zinazobomolewa zimeainishwa na Mahakama kwa kuwa madalali wengine wanaghushi hukumu.
"Ni marufuku mtu kuvunja nyumba bila mimi na vyombo vyangu kuwa na taarifa. Hatuwezi kuvumilia huu mchezo, kama kuna dalali amekwenda kuvunja nyumba ambayo haijaainishwa kwenye hukumu ya Mahakama akamatwe mara moja," amesema.
Hapi amesema, "Zipo kesi zimetokea kwenye wilaya yetu, wale madalali wamekuwa wakivunja nyumba ambazo hazijaainishwa, Mahakama inasema nyumba namba 13 wao wanavunja nyumba namba 23," amesema.

Watu 17,326 waumwa na mbwa nchini


Dar es Salaam. Jumla ya watu 17,326 wameripotiwa kuumwa na mbwa au wanyama wa jamii hiyo huku vifo vinane vikitokea, kati ya Januari mpaka Agosti mwaka huu.
Mnyama huyo ambaye husababisha ugonjwa wa kichaa cha mbwa kutokana na virusi kutoka kwa wanyama jamii yake wakiwemo paka, mbweha, fisi na wengineo, humwingia binadamu kwa kumuuma na mate yenye virusi ambavyo huingia  katika eneo lenye jeraha.
Katika taarifa yake ya maadhimisho ya Siku ya Kichaa cha Mbwa kwa vyombo vya habari leo Jumatano, Waziri wa Afya, Maendeleo ya Jamii, Jinsia, Wazee na Watoto, Ummy Mwalimu amesema takwimu hizo hazijumuishi vifo vinavyotokea nyumbani na waathirika ambao hawakufika katika vituo vya kutolea huduma za afya.
“Tatizo hili linaweza kuwa kubwa kuliko tunavyofikiri. Utafiti uliofanyika mwaka 2002 ulibainisha kuwepo na uwezekano wa kuwepo takriban vifo 1,499 kwa mwaka nchini kutokana na ugonjwa wa kichaa cha mbwa,” amesema.
Ummy amesema tafiti pia zimeonyesha waathirika wakuu wa ugonjwa huo ni watoto chini ya miaka 15 kwa sababu wao ndio wanaokuwa karibu na mbwa muda mwingi, pia hupenda kucheza/kuchokoza mbwa wasiowafahamu njiani.

Amesema katika juhudi za kudhibiti ugonjwa huo, Tanzania ilipata ufadhili wa Bill na Melinda Gates na kushirikiana na Shirika la Afya Duniani (WHO) na kuwa moja ya nchi zilizochaguliwa kutekeleza  mradi wa majaribio wa kutokomeza kichaa cha mbwa kati ya mwaka 2009-2016, nchi nyingine zikiwa ni Ufilipino na Afrika ya Kusini.
Fanya haya ukiumwa na mbwa
Endapo mtu ameumwa na mbwa, hatua ya kwanza muhimu ni kuosha jeraha kwa dakika 10 au zaidi kwa maji mengi yanayotiririka na sabuni. Kidonda kisifungwe. Kisha nenda haraka kituo cha kutolea huduma za afya ili kupata chanjo ya kichaa cha mbwa.
Madhara ya kichaa cha mbwa
Vimelea vya kichaa cha mbwa vinapoingia katika jeraha hushambulia neva za fahamu kutoka katika eneo la jeraha, kuelekea katika uti wa mgongo na hatimaye kuathiri ubongo.
Dalili huanza kuonekana baada ya kuathirika kwa mfumo wa kati wa fahamu na baadaye ubongo, ambazo ni pamoja na kuwashwa sehemu ya jeraha, homa, kuumwa kichwa, maumivu ya mwili,  kuogopa maji na mwanga, kutokwa mate mengi mfululizo, kuweweseka, kupooza na hatimaye kupoteza maisha.

‘NEC haikushinikizwa kuteua wabunge wapya CUF’


Tume ya Taifa ya Uchaguzi (NEC) hivi karibuni ilifanya uteuzi wa Wabunge wa Viti Maalumu vya Wanawake kwa tiketi CUF, uteuzi huo ulipokelewa kwa hisia tofauti na baadhi ya wadau ambapo baadhi yao waliitupia lawama Tume kwamba imekiuka taratibu.
Baadhi ya wafuasi wa CUF, viongozi wa chama hicho waliishambulia Tume kwamba ilikuwa na njama kati yake na Spika wa Bunge katika kulishughulikia suala la wabunge hao CUF waliokuwa wamefukuzwa uanachama na upande wa Profesa Lipumba na hatimaye kupelekea uteuzi wa wabunge wapya kujaza nafasi zao.
Katika ufafanuzi wake, Mkurugenzi wa Uchaguzi wa NEC, Kailima Ramadhani anasema, “Kwa kweli nadhani tatizo hapa ni ukosefu wa uelewa wa watu kwa upande mmoja, lakini pia kuna upotoshaji wa makusudi.”
Anasema NEC ilizingatia matakwa yote ya kisheria yanayohusiana na viti maalumu vya wabunge wanawake kwa kuzingatia sheria zinazoiongoza Tume zinatambua uchaguzi wa aina mbili, ule wa kupiga kura na ule wa wabunge wa kuteuliwa.
Kailima anasema baada ya NEC kupokea barua kutoka kwa Spika kwamba kuna nafasi za wazi, hatua inayofuata inatekelezwa kwa mujibu wa Ibara ya 74 (4) ya Katiba ambayo inaelekeza kwamba orodha iliyowasilishwa Tume awali na chama husika cha siasa wakati wa uchaguzi mkuu, itumike kujaza nafasi iliyopo wazi au nafasi zilizo wazi.
Hata hivyo, ufafanuzi wa ujazaji huo wa nafasi unafanyika baada ya kushauriana na chama husika cha siasa.
Kailima anasema kutokana na matakwa ya sheria kwa kawaida Tume inaviandikia barua vyama vya siasa kuwauliza ni yupi miongoni mwa wale walioko kwenye orodha anafaa kuteuliwa kujaza nafasi iliyoachwa wazi.
“Vyama hivyo vinatakiwa kujibu barua ya Tume kwa kujaza Fomu namba 8E, na baada ya kuipokea hiyo fomu Tume huendelea na taratibu nyingine za kiutawala kujiridhisha kwamba muhusika au wahusika wana sifa stahiki na kupitisha jina au majina yao,” anasema.
Kailima anafafanua kuwa baada ya kukamilisha utaratibu wa kupitia na kujiridhisha juu ya vigezo vya jina la mwanachama anayependekezwa, wanamwandikia Spika wa Bunge kumfahamisha kuwa wameshafanya uteuzi, barua hiyo pia inatumwa kwa chama cha siasa kwa kunukuu barua yao ya maombi kuwafahamisha kwamba maombi yao yamepokelewa na yameshughulikiwa.
Kwa suala mahususi la CUF, Kailima anasema, “Jioni ya tarehe 26 mwenzi Julai tulipokea barua kutoka kwa Spika kumfahamisha Mwenyekiti wa Tume ya Uchaguzi kwamba kuna viti maalumu viko wazi Bungeni vya CUF. Siku iliyofuatia Julai 27 nilimwandikia Katibu mkuu wa CUF. Kwa taratibu za Tume barua ikiandikwa na mwenyekiti wa Tume inatumwa kwa Mwenyekiti wa chama cha siasa na nikiiandika mimi (Mkurugenzi wa Uchaguzi) naituma kwa Katibu mkuu wa chama husika.”
Anasema wakati wa kutuma barua, NEC imekuwa ikitumia anuani zilizotolewa na Msajili wa Vyama vya Siasa kwa sababu Tume haishughuliki na mambo ya usajili wa vyama na badala yake inapokea taarifa zote kuhusu majina ya vyama, majina ya viongozi, namba za usajili na anuani.
Hata hivyo, Mkurugenzi huyo anasema kuna vyama vina anuani zaidi ya moja kama CCM ambacho kina anuani ya Dodoma na Dar es Salaam na CUF ambacho kina anuani ya Dar es Salaam na Zanzibar.
Kailima anasema katika suala la CUF, utaratibu barua kwa chama ilitumwa kwa anuani ya Dar es Salaam (siyo Zanzibar) kwa kuwa barua iliyotumwa Tume ilitoka Dar es Salaam.
Kuhusu madai kwamba majina ya wabunge walioteuliwa hayakuwa kwenye orodha iliyotumwa awali na CUF, Kailima alisema matamshi au tuhuma kama hizo ni mfano kwamba kuna wanasiasa ambao walijipanga kupotosha umma kwa makusudi kwa sababu za kisiasa wanazozijua wenyewe.
“Inashangaza kwa sababu Katibu Mkuu wa CUF, Seif Sharif Hamad ambaye anadai kwamba majina ya wateule hayakuwa kwenye orodha, yeye ndiye aliyesaini karatasi yenye orodha hiyo ambayo iliwasilishwa hapa Tume mwaka 2015,” anasema.
Akifafanua juu ya madai kwamba ni kwa nini Tume ililishughulikia suala la CUF kwa haraka, Kailima amesema sheria ambazo zinaisimamia Tume kwenye mchakato wa uteuzi wa wabunge wa viti maalumu hazijaweka masharti ya muda kwenye uteuzi.
Kailima anaongeza kuwa hakuna kipengele katika sheria ambacho kinaiagiza au kuielekeza Tume kupokea maelekezo kutoka kwa mtu au taasisi yoyote na kwa hiyo, tuhuma kwamba Tume ilifanya maamuzi kwa shinikizo kutoka kwa Spika wa Bunge si za kweli.
“Tume haijawahi, na haitadiriki kamwe kufanya kikao na Spika wa Bunge kwa lengo la kupokea maelekezo yake juu ya utekelezaji wa majukumu ya Tume. Kwa mujibu wa Katiba, sheria, kanuni na miongozo, hatuna utaratibu kama huo.
Hata hivyo, Kailima anasema Tume inashirikiana na Serikali kwenye masuala yanayohusu na uendeshaji wa shughuli zake kwa maana ya bajeti na ulinzi, haswa wakati wa chaguzi mbalimbali na shughuli kama za uboreshaji wa daftari la kudumu la wapiga kura.
“Tumekua tukifanya kazi kwa ukaribu na vyama vya siasa, ni wadau wetu muhimu na tunawajibika kuwashirikisha katika shughuli zetu mbalimbali kama vile uandikishwaji wa wapiga kura na uchaguzi, lakini hii haimaanishi kwamba wanaweza kuingilia au kutushawishi katika maamuzi ambayo tunatakiwa kuyafanya kwa uhuru,” alifafanua Kailima.
Mwandishi wa makala haya ni Afisa Habari wa Tume ya Taifa ya Uchaguzi (NEC)

Hatutarudi nyuma katika kupinga udhalimu (2)

Mamia ya wananchi wakiwa wamejitokeza kupokea

Mamia ya wananchi wakiwa wamejitokeza kupokea msafara wa Katibu Mkuu wa CCM Abdulrahman Kinana ulipowasili kwa treni Stesheni ya Kigoma jana. Kinana na ujumbe wake wamesafiri kwa treni hadi Kigoma kwa ajili ya sherehe za kilele cha maadhimisho ya miaka 36 ya CCM zitakazofanyika mwanzoni mwa mwezi ujao mjini Kigoma. Picha na Mpiga picha wetu 
Katika sehemu ya kwanza ya makala haya Jumapili iliyopita nilizungumzia maana ya mageuzi makubwa yanayoendelea kufanyika ndani ya Chama cha Mapinduzi, na jinsi ambavyo hayatarudi nyuma. Endelea...
Pia, nilifafanua kwa ufupi aina na sifa za viongozi wanaotakiwa na chama, hasa katika uchaguzi unaoendelea, ambayo watatakiwa kuyasukuma mageuzi hayo. Leo katika sehemu ya mwisho ya makala haya tutaendelea kutazama msingi wa mageuzi haya kusonga mbele na kuwa ni mwiko kurudi nyuma.
Kipindi hiki tunapofanya mageuzi haya makubwa, napenda ifahamike kwamba wako baadhi yetu ambao watashindwa kwenda na mwendokasi wa mageuzi haya makubwa.
Baadhi ya wanaoshindwa kwenda na mwendokasi wa mageuzi makubwa ya CCM ni wale ambao walizoea kuishi kwa mazoea, kula visivyo vyao, kudhulumu haki za wananchi hasa wanyonge, walizoea kujimilikisha mali za CCM na kuzifuja watakavyo na walizoea kuwa miungu watu na kuwadharau wanachama.
Katika historia ya chama chetu, watu hawa wamekuwapo katika awamu zote, na ni mapambano kuwaondoa. Wanachama wanawajua, dhamira njema ya CCM mpya inawajua na hakika uongozi wa CCM na vikao vya chama vitahakikisha watu hawa wenye inda hawapati uongozi katika chama chetu.
Watu waovu wana mitandao yao ya uovu, tuwakatae. Chama chetu kimekuwa na desturi nzuri ya kuwakataa, kipindi hiki tutawakataa tena na kwa sauti kuu.
Mitandao imedhoofisha sana chama chetu, mitandao ya watu wabinafsi na wanaotaka kukitumia chama chetu kama kitega uchumi, mitandao ya kidhalimu haina nafasi kwa CCM.
Wakati mwingine hata watu ambao wamepata kuhudumu katika nyadhifa za uongozi wanahusika kuhujumu chama na nchi yetu. Wanatengeneza mitandao na kushirikia na madhalimu, tunawajua, hata utu una kikomo, hatutawaruhusu kuvuruga chama chetu.
Shime wanachama msikubali hata kidogo madhalimu wa kisiasa wakajaribu tena kuteka chama chetu, walishindwa, wameshindwa na wataendelea kushindwa.
Rai yangu hapa, watu wabaya huwa hawagombani, masilahi yao ya kidhalimu ni ya kudumu, wanaweza kuonekana hawako pamoja lakini wanaunganishwa na masilahi yao ya kudumu ya kidhalimu. Hata kwenye chama chetu walikuwapo, wameondoka, wamebaki, kazi yetu ni kuwadhibiti ipasavyo. Wameanza kuzungumza, tuwe macho kulinda misingi ya chama chetu.
Kila mwana CCM asimame kidete, akisemee chama, aisemee Serikali ya Chama Cha Mapinduzi. Ni wajibu wetu kuujuza umma wa wananchi nini Serikali inafanya na kwa nini.
Tunaupinga udhalimu katika chama chetu na tunaupinga udhalimu katika Serikali. Si kazi rahisi lakini tutashinda kwa sababu dhamira yetu ni njema na inasimamia masilahi mapana ya Taifa la Tanzania na watu wake.
Hata mabwana wakubwa wa dunia tumewaonyesha kwa vitendo kwamba tunamaanisha tunaposema tumechoka kuonewa, tumechoka kuibiwa kwa makusudi au kwa kuhadaiwa.
Nchi yetu ni ya kipekee sana na Mungu ametubariki na kila aina ya utajiri wa asili na watu wenye mshikamano.
Kijiografia nchi yetu iko katika eneo la kimkakati katika uso wa dunia. Katika bara la Afrika ni nchi mbili tu ndio zinatengeneza nyonga ya bara la Afrika nazo ni Tanzania na Jamhuri ya Kidemokrasia ya Congo. Hizi ndizo nchi pekee ambazo zinalikata bara la Afrika katikati na nchi ambazo zina mipaka ya bahari kuu zinazozunguka bara la Afrika kwa maana ya Bahari ya Hindi upande wa Mashariki inayopakana na Tanzania na Bahari ya Atlantiki upande wa Magharibi inayopakana na Jamhuri ya Kidemokrasia ya Congo.
Ukizungumzia nguvu za siasa za kidunia, Majabali (Mataifa makubwa) ya kidunia na hasa yanayoongozwa na mrengo wa siasa za kiliberali na yenye uchumi uliononeshwa na matunda za udhalimu wa kibepari, utagundua wanatamani sana nchi hizi mbili zisitawalike.
Majabali haya yanatamani nchi hizi zisitawalike ili wapate nafasi ya kudhibiti eneo hili la kimkakati. Lakini, zaidi ya yote ifahamike kwamba katika eneo hili ndiko hazina ya rasilimali madini ya dunia iliko, kwa uchache na kwa kutaja, hapa yako madini yenye thamani ambayo hata duniani hakuna, ndio maana hata Tanzanite ikapewa jina hilo.
Ili majabali wawe na uhuru wa kuchukua hapa watakacho lazima hapa pasiwe na mwenyewe, watapandikiza chuki kwa makundi, watajaribu kutuvuruga kwa tofauti za kiimani na watajaribu pia kupitia vyama vya siasa.
Majabali ya dunia yamefanikiwa kuiangusha Congo au niseme yamefanikiwa kuifanya Congo isitawalike na wamepafanya pawe pahala ambapo wanaingia na kutoka na chochote bila kuulizwa maswali wala kulazimika kutoa majibu.
Mwenyekiti wa CCM na Rais wa Jamhuri ya Muungano wa Tanzania, John Magufuli amebadilisha utamaduni mbaya na desturi zisizofaa.
Amewakatia mirija madhalimu wakubwa na wadogo walioko ndani ya nchi na walioko nje ya nchi.
Imewauma sana sana, na wale walioko ndani wanatafuta kila njia ya kumhujumu asifanikiwe. Uzuri wanajulikana, ni wanaume wavaao baibui, baadhi yao ni watoto wa maskini na wamenufaika kwa fedha za maskini ila wamechagua maisha ya kufuru na ufedhuli, kwao vikao hukutania Dubai. Tunawajua.
Wako wachache katika chama chetu cha CCM, wana CCM na vikao vyake tusaidieni kuwakataa na pale wanapotumia hila kujipenyeza wafichueni.
Hakuna chama makini kama CCM, ndiyo chama ambacho kwa imani yake kinaamini katika ujamaa na kujitegemea, ndiyo chama pekee ambacho kinaamini binadamu wote ni sawa na ndio pekee ambacho kwa imani kinaamini utu wa binadamu unastahili kuheshimiwa.
Kule nje hakuna vyama, kuna vikundi maslahi, ni kama bidhaa sokoni, akifika mwenye bei anachukua bidhaa, na ninyi ushahidi mmeuona mwaka 2015.
Nakomea hapa, kwa kuwa ndoto ya kujenga uchumi imara na madhubuti ambayo Mwalimu Nyerere alikuwa nayo na hakuishi kuiona imeanza kudhihirika katika awamu ya Tano.
Ombi langu kwenu, hivi ni vita vya mwili na roho, ni vita ya haki dhidi ya udhalimu, vita ya mwili tunaimudu na tutaishinda hakika, tusaidieni maombi maana vita ya roho yapaswa ipiganwe na wengi wema na waishio maisha ya kujikana nafsi na wenye hofu ya Mungu.
Humphrey Polepole ni Katibu wa Halmashauri Kuu ya Taifa (NEC) ya Chama Cha Mapinduzi (CCM) mwenye dhamana ya Itikadi na Uenezi

Watoto watekwa na kutumikishwa, polisi yawaokoa

Polisi mkoani Geita inawashikilia watu wawili kwa tuhuma za kuwateka watoto na kuwatumikisha kwenye shughuli za ufugaji.
Wanaoshikiliwa wametajwa kuwa ni Edward Lukanya (35) mkazi wa mjini Geita na Karume Kalamu (53) mkazi wa wilayani Nyang'hwale.
Kamanda wa Polisi mkoani hapa, Mponjoli Mwabulambo amesema kukamatwa kwa watu hao kumetokana na taarifa iliyotolewa na mtoto mwenye miaka 13 (jina linahifadhiwa) aliyepotea tangu mwaka 2013 ambaye alirejea nyumbani mwanzoni mwa mwezi huu na kueleza maisha aliyokuwa akiishi porini.
Kamanda Mwabulambo amesema tayari polisi imewaokoa watoto wengine wanne waliokuwa wakitumikishwa.
Amesema wanaendelea kuwatafuta watoto wengine zaidi ya 10 wanaodaiwa kuwa kwenye misitu wilayani Geita wakichunga mifugo.
Mtoto huyo akizungumza na gazeti hili amesema mwaka 2013 akiwa njiani kwenda msikitini alisimamishwa na mtuhumiwa Edward aliyemtaka apande baiskeli na aliondoka naye.
Amesema mtuhumiwa alimpeleka kwa mzee Kalamu ili alipwe kazi kwa ujira wa Sh20,000.
Watoto hao inadaiwa huchukuliwa katika mazingira yasiyoeleweka, ambapo mtoto mwingine mwenye miaka 16 aliyeokolewa na polisi amesema hajui alitokaje nyumbani.
Mtoto huyo amesema hakumbuki mwaka aliotoka nyumbani kwao.
Amesema siku ya tukio alikwenda kununua dagaa na akiwa njiani ulivuma upepo mkali na baadaye alijikuta eneo la Kasamwa.
Mtoto huyo amesema alichukuliwa na mwanamume ambaye hakumtambua aliyempeleka kwa mzee Kalamu kuchunga mifugo.

Ukuta Mererani uanzie kwenye vichwa vyetu


Ninampongeza Rais John Magufuli kwa jitihada zake za kupambana kulinda rasilimali za Taifa letu. Na hasa nguvu kubwa alizozielekeza kwenye madini na kwa namna ya pekee ukuta anaoujenga kule Mererani ili kukomesha wizi wa madini yetu ya Tanzanite.
Inasikitisha sana kuona madini ambayo yako Tanzania tu, lakini nchi ya India ndiyo inaonekana ni ya kwanza duniani kuyazalisha. Tumesikia jinsi maelfu ya watu huko India, wanavyopata ajira kutokana na viwanda vya Tanzanite nchini humo. Ni wazi Tanzanite imewanufaisha zaidi watu wa nje kuliko wa ndani.
Hivyo juhudi zozote za kudhibiti wizi huu mkubwa ni za kupongezwa sana. Pamoja na pongezi hizi, tunafikiri uamuzi huu wa kujenga ukuta umechelewa sana, maana taarifa zilizopo ni kwamba Mererani inakaribia kuwa mashimo matupu. Lakini pia kujenga ukuta wa kuzuia wizi wa madini kabla ya kujenga kiwanda cha kuongeza thamani ya madini haya, tatizo litabaki palepale.
Tanzanite zitatoka kwenye ukuta na kuelekea India ili kuongezewa thamani. Wale wanaoajiriwa kwenye viwanda vya India wataendelea kunufaika. Nini kianze, swali lilelile la yai na kuku. Labda kiwanda cha kuongeza thamani Tanzanite, Kingeanza kabla ya ukuta.
Lakini pia tunafikiri kitu muhimu ni kujenga ukuta kwenye vichwa vyetu. Ukuta unahitajika kwenye akili zetu na roho zetu. Bila kujenga ukuta kwenye akili zetu, ni kazi bure.
Si kwamba ninapinga ujenzi wa ukuta ambao Jeshi letu la ulizi limeanza kujenga kule Mererani, lakini tukiangalia mifano ya matukio katika Taifa letu ni kwamba bila kujenga ukuta vichwani mwetu, ni kazi bure.
Tuna mfano mzuri wa Mwadui. Hakuna mgodi, Afrika Mashariki wenye ukuta kama mgodi kama ule wa Mwadui. Pamoja na kuwa na ukuta huo wa Mwaduni, tumeibiwa zaidi ya miaka 50 na juzi tu almasi za mabilioni zimekamatwa kwenye uwanja wa ndege wa Dar es Salaam.
Benki Kuu ya Tanzania (BoT) ina kuta imara kabisa, lakini tumeshuhudia jinsi wizi mkubwa umekuwa ukitokea kwenye BoT. Ufisadi mkubwa kwenye Taifa letu unaendelea kwenye taasisi zenye kuta kubwa na imara.
Hivyo tatizo si kujenga ukuta wa saruji na matofali, bali ni kujenga ukuta wa kumkomboa Mtanzania kifikra.
Mtanzania ajitambue, ajipende na kulipenda Taifa lake. Tunaweza kujidanganya, kama ambavyo tumekuwa tukijidanganya kwamba kazi hii ya kumkomboa Mtanzania kifikra itafanywa na wanasiasa wetu. Tunawaamini, tunawachangua, lakini wakifika kule, wanatugeuka.
Badala ya kuangalia masilahi ya Taifa, wanayashughulikia matumbo yao. Tuliwaamini watutengenezee Katiba mpya, lakini hadi leo hatujitambui na Katiba mpya imepaa na kupotelea kusikojulikana. Tuliwaamini watuletee maendeleo, lakini kila siku tunashuhudia meli zinaelea juu ya bahari lakini shilingi inazama. Tuliwaamini watuwakilishe bungeni, lakini kila kukicha tunashuhudia wanatetea masilahi ya vyama vyao vya siasa na kutuacha njia panda.
Njia pekee ya kupambana na wizi, ufisadi na udanganyifu katika Taifa letu na majanga mengine kama umaskini na ujinga, vita na upweke, ni kujenga mifumo ya watu kuishi kwa uwazi na kujaliana.
Ni lazima tujenge mifumo itakayotengeneza jumuiya za Watanzania zinazojaliana, zinazojuliana hali, zinazochungana, zinazolindana na zinazowajibishana.
Jumuiya za Watanzania tulizonazo sasa hivi, familia za Watanzania tulizonazo sasa hivi, ambazo zinashuhudia wizi mkubwa wa rasilimali za taifa letu na zinaishi kwenye upepo mkubwa wa ufisadi na wizi mkubwa ni zile ambazo kila mtu yuko kivyake.
Hakuna anayemchunga mwenzake, hakuna anayemlinda mwenzake na hakuna anayemwajibisha mwenzake. Kila mtu amejifungia katika nafsi yake: Hakuna uwazi katika familia, hakuna kufunuliana familia, hakuna kushirikishana katika familia, hakuna kuchukuliana familia, hakuna kulindana na kuchungana katika familia.
Hivyo hivyo hakuna uwazi katika jumuiya zetu, hakuna kufunuliana katika jumuiya zetu, hakuna kushirikishana katika jumuiya zetu, hakuna kuchukuliana katika jumuiya zetu, hakuna kulindana na kuchungana katika jumuiya zetu.
Kila mtu anaufunga moyo wake na kubaki na siri nyingi ndani ya nafsi yake. Hata na mambo ya kawaida kama vile kupenda, yanafanywa siri. Mambo kama tamaa, uchu, furaha, huzuni na mengineyo yanabaki siri ndani ya moyo wa mtu.
Kuna waandishi wengi, mfano kama Elieshi Lema wameandika juu ya tabia hii ya mtu kujifunga ndani ya nafsi yake. Ukipata nafasi unaweza kujisomea vitabu kikiwamo cha “Parched Earth”.
Mtu anayeufunga moyo wake hawezi kufanikiwa kutengeneza familia yenye kutoa mchango wa kulijenga taifa.
Ni lazima tuwe na mfumo imara na wa kudumu kuyakabili majanga yanayoweza kutukumba kimwili na kiroho. Mfumo wa sasa hivi ni ule unaotukuza wizi. Mtu akiiba ndiye mwanaume. Ukifanya kazi bila kuiba, bila kujenga nyumba kubwa ambayo haiendani na mshahara wako, unaitwa rofa. Katika jamii ambayo inautukuza wizi, kujenga ukuta kuzunguka mgodi wa Tanzanite ni kupoteza nguvu na fedha.
Ngugi wa Thiong’o, katika kitabu chake cha Shetani Msalabani, anaelezea vizuri jinsi Waafrika tunavyowatukuza wezi. Anaelezea vizuri majigambo ya wezi, kuanzia wizi wa kuiba kuku na kuchomoa kwenye mifuko ya watu hadi wezi wakubwa wanaopora mali ya umma. Hatimaye heshima na umaarufu wa mtu katika jamii, unajengwa na kiwango kikubwa cha wizi. Ngugi, anaelezea vizuri kwenye kitabu hicho jinsi ilivyo kazi ngumu kuleta mabadiliko kwenye jamii yenye ugonjwa wa kuwatukuza wezi.
Tuwekeze kwenye kuijenga jamii kwanza. Tuwekeze kwenye kutengeneza mifumo mizuri na kuleta mabadiliko makubwa katika fikra za Watanzania.
Mabadiliko haya hayahitaji bunduki wala mzinga. Hayahitaji polisi wala jeshi na wala hayahitaji vitisho vya aina yoyote ile. Mabadiliko haya yanahitaji elimu na ukombozi wa kifikra, hivyo yanahitaji maongezi, majadiliano na ushirikishwaji.
Ni nani wa kumwelezea Rais wetu ukweli huu? Tukishindwa kuusema ukweli huu tukabaki kuogopa na kutaka kumfurahisha. Tutakuwa tunafanya dhambi kubwa na sote tutaumia. Kulijenga taifa ni mradi wa pamoja ambao ni lazima sote tushiriki bila kutanguliza maslahi binafsi.
Kama ninaruhusiwa kutoa mfano wa mtu ambaye, alilenga kubadilisha mfumo kwanza, kabla ya vitu vingine.
Huyu ni Yesu wa Nazareti. Samahani kwa waumini wa dini nyingine, huu ni mfano wa kutusaidia kufahamu mada hii ninayokazana kuifafanua.
Bwana Yesu anasema hivi:
“Naomba ili wote wawe kitu kimoja. Baba! Naomba wawe ndani yetu kama vile wewe ulivyo ndani yangu nami ndani yako. Naomba wawe kitu kimoja kusudi ulimwengu upate kuamini kwamba wewe ulinituma” (Yohana 17: 21.
Maneno haya ya Yesu, yanaeleweka vizuri ukiyaunganisha na yale ya Yohana 5: 19-20.
“Kweli nawaambieni, Mwana hawezi kufanya kitu peke yake; anaweza tu kufanya kile anachomwona Baba akikifanya. Maana kile anachofanya baba, Mwana hukifanya vilevile. Baba ampenda Mwana, na humwonyesha kila kitu anachokifanya yeye mwenyewe, tena atamwonyesha mambo makuu kuliko haya, nanyi mtastaajabu”.
Yesu, alikuwa akielezea uhusiano wake na Mungu Baba. Jinsi yalivyo na maisha ya uwazi. Hakuna siri kati yao. Analolijua Mungu Baba, analijua Mungu Mwana, na analijua Mungu roho mtakatifu. Hii ndiyo maana ya Mwana kuwa ndani ya Baba na Baba kuwa ndani ya Mwana na wote wawili kuwa ndani ya Roho Mtakatifu. Wanaishi maisha ya utatu, katika uwazi na kufunuliana. Uwazi huu unawafanya waungane na kuwa kitu kimoja.
Yesu, anatuombea na sisi kuishi maisha ya utatu. Kuishi maisha ya uwazi. Tuwe ndani yake na yeye awe ndani yetu na sote tuwe ndani ya Baba.
Tuwe na familia zenye kuishi utatu. Baba ndani ya familia amjue mama, na mama amjue Baba. Baba ajifunue kwa mama, na mama ajifunue kwa Baba. Kwa njia hii wanaweza kulindana, kuchungana, kuchukuliana na kusaidiana. Ni katika uwazi na kufunuliana familia inaweza kuungana na kuwa kitu kimoja.
Baba na mama wakichukuliana, wakafunuliana, wakalindana na kuchungana, wanajenga mfumo wa kuwalinda na kuwachunga watoto wao. Watoto watakua katika uwazi na kutembea katika mwanga. Watafundishwa maadili mema
Familia zilizoungana na kuwa kitu kimoja, zinatengeneza jumuiya iliyoungana na kuwa kitu kimoja. Jumuiya ikiungana na kuwa kitu kimoja, ni lazima pawepo kufunuliana, kujaliana, kulindana, kuchungana na kusaidiana.
Jumuiya inayoishi hayo niliyoyataja hapo juu, ndiyo inayoweza kupambana na majanga makubwa kama ufisadi na wizi wa rasilimali za taifa letu.
Yote niliyoyasema yanawezekana pale tu ambapo kila mmoja wetu, kila Mtanzania, atasali sala kama ile ya Bwana Sufi Bayazid:
“Nilipokuwa kijana mwanamapinduzi, sala yangu pekee kwa Mungu ilikuwa: ‘Mungu, nipatie nguvu na uwezo wa kuubadilisha ulimwengu’
“Nilipofikisha umri wa mtu mzima na kugundua kwamba sijafanikiwa kuibadilisha roho hata moja, nilibadilisha sala. Nikasema, ‘Mungu, nipatie nguvu na uwezo wa kuwabadilisha watu wanaonizunguka, familia yangu na marafiki zangu’
“Sasa ninapozeeka, bila kufanikiwa kuubadilisha ulimwengu sala yangu imekuwa: ‘Mungu, nipatie nguvu na uwezo wa kujibadilisha mimi mwenyewe’
“Kumbe ningesali hivi tangia mwanzo, nisingepoteza muda wangu bure” (The Song of the Bird – uk 153 – tafsiri ni yangu).
Kama anavyosema Sufi Bayazid, tusiweke nguvu nyingi katika kutaka kuyabadilisha maisha ya wengine, kabla ya kubadilisha maisha yetu sisi wenyewe. Ni kila mmoja wetu kubadilisha maisha yake mwenyewe. Ni kila mmoja wetu kujinyoshea kidole. Kwa njia hii tunaweza kubadilika na kulijenga taifa letu.
Mabadiliko haya ambayo ni muhimu na ni lazima, hayahitaji bunduki na mizinga. Na wala hayahitaji kujenga ukuta. Ni kubadilisha fikra na kusali sala ya Bwana Sufi Bayazid. Mungu, atusaidie kutambua kwamba kulijenga taifa letu la Tanzania ni mradi wa pamoja.
Padre Privatus Karugendo.
pkarugendo@yahoo.co.
+255 754 633122.

Chadema yamsimamisha katibu wake Moshi

Katibu wa Chadema Mkoa wa Kilimanjaro, Basil

Katibu wa Chadema Mkoa wa Kilimanjaro, Basil Lema. 
Moshi. Chama cha Demokrasia na Maendeleo (Chadema) Mkoa wa Kilimanjaro, kimezifuta barua walizoandikiwa madiwani sita wa Halmashauri ya Moshi, wakitakiwa kujieleza kwa usaliti.
Mbali na kufuta barua hizo zilizokuwa zimeandikwa na Katibu wa Chadema Wilaya ya Moshi, Emmanuel Mlaki chama hicho kimemsimamisha uongozi katibu huyo.
Madiwani hao akiwamo Mwenyekiti wa Halmashauri, Michael Kilawila walitakiwa kujieleza kwa madai ya usaliti kwa kumchagua makamu mwenyekiti wa halmashauri kutoka NCCR-Mageuzi.
Chadema na NCCR-Mageuzi ni vyama washirika katika Umoja wa Katiba ya Wananchi (Ukawa), unajumuisha pia CUF na NLD.
Taarifa iliyotolewa leo na Katibu wa Chadema Mkoa wa Kilimanjaro, Basil Lema imesema barua zilizoandikwa na Mlaki ni batili na ameagiza ziondolewe katika rekodi za chama hicho.
“Tunautangazia pia umma kuwa Emmanuel Mlaki amesimamishwa uongozi ili kupisha uchunguzi wa tuhuma dhidi yake na tunautaka umma kusitisha mawasiliano rasmi ya chama kupitia kwake.”

Mambosasa asema hajui miili iliyokutwa kwenye viroba imetoka wapi


Kamanda wa Polisi Kanda Maalumu ya Dar es Salaam, Lazaro Mambosasa amesema miili ya wanaume watatu iliyokutwa pembezoni mwa Bahari ya Hindi eneo la Coco Beach hawajui imetoka wapi hivyo wanaendelea na uchunguzi kubaini ilipotoka.
Mambosasa amesema jeshi la polisi linaendelea kupeleleza ili kujua miili hiyo imetokea mkoa upi, nchi gani na wajulikane watu hao ni wakina nani.
“Miili hiyo haieleweki inatoka wapi na watu wenyewe hawajulikani kama wanatoka Tanzania, Msumbiji au Angola hivyo tunaendelea kuichunguza,” amesema Mambosasa.
Maiti za watu ziliokotwa juzi katika eneo hilo mbili zilifungwa kwenye viroba huku nyingine imekutwa na jiwe kubwa lililofungwa na kamba.

Msigwa: waKenya wanashangaa hadhi ya wabunge nchini Tanzania


Tangu mbunge wa Singida Mashariki, Tundu Lissu aliposhambuliwa kwa risasi akiwa mjini Dodoma Septemba 7, kumekuwa na malumbano makali kati ya viongozi wa Chadema, Bunge na Serikali.
Mzozo ulianzia Hospitali ya Mkoa wa Dodoma wakati Lissu akipatiwa huduma ya kwanza. Serikali ilitaka apelekwe Hospitali ya Taifa ya Muhimbili (MNH), lakini viongozi wa Chadema walitaka akatibiwe Nairobi, Kenya, jambo lililotekelezwa kwa kuchangishana fedha za kukodisha ndege na kugharamia matibabu.
Malumbano hayo yameendelea kuchukua sura mpya kila siku, huku kila upande ukivutia kwake, kunyoosheana vidole na kujitetea kwa kila namna.
Miongoni mwa viongozi wa Chadema aliyeshiriki kumsaidia Lissu tangu hospitalini hadi Nairobi ni Mbunge wa Iringa Mjini, Mchungaji Peter Msigwa ambaye amerudi nchini hivi karibuni.
Akizungumza na gazeti hili katika mahojiano maalumu, Msigwa anasimulia hatua kwa hatua kuhusu misukosuko ya tukio hilo na safari ya kwenda Nairobi ilivyokuwa. Endelea
Swali: Tumesikia mambo mengi kuhusu mkasa uliompata Tundu Lissu hivi karibuni. Kwa kuwa wewe ulikuwapo tangu Dodoma na sasa umetoka Nairobi, hebu tueleze hali ilikuwaje wakati huo na sasa ikoje?
Jibu: Nataka tu niwaambie Watanzania kwamba Tundu Lissu wetu aliumizwa sana katika jaribio la kuchukua uhai wake. Watu wasichukulie kama ni jambo dogo, ni jambo kubwa lililoharibu hata akili za watu tuliokuwa karibu naye.
Mimi ambaye nilikuwa miongoni mwa watu wa kwanza kuwa naye, nikafika mahali nikaona risasi siiogopi tena kwa maumivu aliyokuwa nayo. Nisingependa kama Taifa tufikie huko, yaani tusiogope risasi.
Hali aliyokuwa nayo hata alipofika Nairobi, madaktari walishangaa kuona Lissu akiwa hai kwa sababu alipoteza damu nyingi sana. Lakini, niwashukuru sana madaktari wa Hospitali ya Dodoma kwa huduma waliyotoa kufanya Lissu tufike Nairobi.
Swali: Hali ilikuwaje baada ya kupata ndege na kuanza safari ya Dodoma.
Jibu: Kwenye ndege nako tulipata shida kidogo, kuna wakati kitanda kilifyatuka. Mimi nikawa nashikilia, Mwenyekiti kuna hewa ya Oxygen alikuwa anashikilia ambayo ilikuwa imetoboka, kwa hiyo muda mrefu mimi nimeshikilia kitanda, madaktari wale nao wameshikilia.
INATOKA UK 15
Height (kimo) ya ndege nayo ilikuwa ndogo na (Lissu) alikuwa apewe dawa za usingizi, inakuwa siyo rahisi, hewa na maji ilikuwa inashindwa kufika vizuri.
Kwa hiyo kisaikolojia unaathirika kwa kuona mateso aliyopata. Lakini, tulifika Nairobi vizuri wametupokea wakaanza kushughulika naye, mpaka mambo yakaenda vizuri. Lakini, niseme mwenzetu ameumizwa sana.
Leo (Jumatano) ndiyo nimeondoka Nairobi na nilipata nafasi ya kumuaga, anaendelea kupata operesheni za hapa na pale. Isingependeza kuingia kwa undani kwa ajili ya kulinda privacy (faragha) ya mgonjwa. Lissu anaendelea vizuri, yuko critical lakini stable, kiasi kwamba anaanza kupata vitu vya majimaji.
Swali: Awali Serikali ilishauri Lissu atibiwe katika Hospitali ya Taifa ya Muhimbili, kwa nini ninyi mling’ang’ania kwenda Nairobi?
Jibu: Tulipomwondoa hapa, hatukusema kuwa madaktari wetu hawawezi, sababu kubwa ni security (usalama). Hata hivyo, ni ukweli usiopingika kuwa hospitali ya Muhimbili haina tofauti na hospitali ya Jomo Kenyatta kule Kenya ambayo nayo ni ya Serikali, lakini hospitali tuliyompeleka siyo ya umma, ina gharama kubwa lakini ina huduma kubwa.
Huduma zinazidiana. Ukienda Afrika Kusini, ukienda Ulaya au Marekani, kuna utofauti. Kama tutalazimika kwenda nje baada ya kushauriana na madaktari, lazima tutumie ndege ua kubeba wagonjwa, haitakuwa chini ya Dola 250,000. Hiyo ni mikakati tunayofanya.
Pamoja na maombi, kilichosaidia pale ni kwamba wenzetu Nairobi wana vifaa vya kisasa ambavyo vinacheki maeneo mengi sana. Kwa hiyo utaona lile jopo la madaktari 10, wengine ni wa mifupa, wengine wa saikolojia, wengine wa ndani ya tumbo na maeneo mengine, wote wanakaa kumhudumia.
Sasa tulikuwa tunashangaa, tuna wataalamu wengi hapo Muhimbili, lakini hatuna vifaa vya kutosha na madaktari kimekuwa kilio chao kikubwa. Lissu yuko katika hali ya dharura, unasema tufuate utaratibu, kwamba aende Dar es Salaam, madaktari wakae kwanza.
Alipofika Nairobi, kila kitu kilisimama, tulikuta pameandaliwa vizuri kwenda hospitali. Maana yake si kwamba wanaanza tu kuunga mifupa. Wakafanya vizuri, sasa ndiyo wakasema wanampeleka kwenye chumba cha upasuaji.
Swali: Pengine huo ndiyo utaratibu wenu wa matibabu bungeni au Serikali, kwa nini msingeufuata?
Jibu: Kwa kweli huduma ya kwanza aliyoipata Dodoma ilikuwa nzuri sana. Sasa ndiyo useme tufuate utaratibu? Ni mawazo ambayo naweza kusema yalikuwa ya kijinga.
Nadhani ni maneno katika kitabu cha No longer at ease, mwandishi anasema kuku akienda porini akakamatwa na mbweha, akiwa kwenye kinywa cha mbweha, huanzi kumkemea kuku kwamba kwa nini ulikwenda porini, unamtoa kwanza kisha unamwambia usiwe unakwenda porini utaangamia.
Sasa Lissu yuko kwenye hatari ya kupoteza uhai, watu wanasema tufuate utaratibu? Hata Kenya wanatushangaa wabunge wa Tanzania, kwamba Watanzania tuna bima inayofanya kazi tu ndani, wanasema ninyi VIP wa aina gani?
Wanashangaa Wakenya. Wakati wa Anna Makinda tulikuwa na bima ya Jubilee, lakini sasa hii ni ya ndani. Tunafikiria bora tukate bima ya binafsi, kwa sababu hatuko salama.
Ukiangalia wenzetu Kenya, mbunge analindwa na Serikali, walinzi zaidi ya wanne ambao wako full armed (wenye silaha), lakini na nyumbani wako wawili, kwa sababu huyu ni mbunge anayeisimamia Serikali, anakosoa. Halafu mtu anakwambia uende Muhimbili.
Swali: Hivi karibuni Waziri wa Afya, Ummy Mwalimu amesema Serikali iko tayari kumtibu Lissu mahali popote duniani kama familia yake itaomba, kwa nini msiombe?
Jibu: Sisi hatuhitaji kuiomba Serikali, inawajibika kumtibu Mbunge. Bunge linawajibika kumtibu Mbunge, lakini kwa sababu Spika ametishwa, Bunge halifuati utaratibu. Hebu tufikirie, kosa la Lissu ni nini katika nchi tukiwa wakweli?
Tunasimama kwenye jukwaa, tukamate kipaza sauti, tunawaambia Serikali imekesea moja, mbili, tatu… tunawaambia bombardier (ndege ya Serikali) imekamatwa, wawekezaji wanaondoka, sisi tunaisaidia Serikali, sisi ni marafiki.
Serikali inapaswa iwalinde hawa watu wanaoisaidia Serikali.
Swali: Ile kauli yako kwa Spika Job Ndugai kuhusu nani aliyelipia ndege huoni kwamba ilikuwa mapema mno kuitoa?
Jibu: Ulikuwa ni wakati mwafaka kwa sababu niliona Spika analeta utani kwenye masuala ya msingi. Ni kweli yule bwana alisaidia sana wakati tunatafuta ndege, kwa sababu ile ndege iliyoletwa ilikuwa haiwezi na ilibidi tutafute ‘jet’.
Ni kweli yule bwana (Turki) alitusaidia lakini hakulipa. Sasa Spika anasema amelipa wakati hakulipa. Kama amelipa kwa nini watuletee sisi invoice? Nasema hivyo kwa sababu niko kwenye Tume ya Bunge.
Spika hana uwezo wa kuliendesha Bunge, ndiyo maana nimesema, akitaka anifukuze hata kesho. Kimsingi Tanzania hatuna Bunge huru. Kwa mimi ambaye nimetoka Kenya, ukiangalia jinsi wenzetu wanavyofanya kazi kwa uhuru, jinsi vyombo vya habari vinavyofanya kazi, utafikiri uko Ulaya, kweli.
Jana nimeona watu wameandamana mpaka mahakamani, japo walizidisha kugonga milango ya mahakama, lakini polisi waliwaacha. Kesho wataandamana Nasa yataisha. Watakuwa na Uhuru pale watamkosoa, mambo yanaendelea. Watu wamewekeza vizuri, kuna uchumi mzuri.
Sasa hapa, huko mitaani watu mnateta na hii hali msidhani kwamba kuna mtu atakuja kuwabadilishia hapa Tanzania, ni sisi wenyewe. Tuwe huru, Msigwa niwe na uwezo wa kukosolewa na kila mtu akosolewe.
Kwa hiyo kauli yangu ilikuja wakati mwafaka na nina maanisha, niko tayari kufukuzwa bungeni, kwa sababu Spika asidhani kwamba hatuwezi kuishi bila kuwa wabunge. Siyo kwamba uanasiasa wangu utakoma kwa sababu siko ndani ya Bunge.
Wala asidhani kwamba tutakosa hela, mimi kwa sasa nina miaka 52, hapo bungeni si nina miaka saba tu? Miaka yote hiyo nilikuwa naishije? Kwa hiyo haitatufanya tunyamaze.
Swali: Kwa nini mnaoikosoa Serikali halafu mnalalamika kwamba haiwajali katika suala hili?
Jibu: Wana hiari ya kuja, maana yake kupigwa risasi siyo jambo la mchezo, unakufa kabisa. Sisi ndiyo tunapigwa risasi. Sasa hizo ni hisia tu, wangekuja kumuona wakafukuzwa hiyo ingekuwa kweli.
Kweli mtu kama Lissu ni mtu wa Rais John Magufuli kutoa masikitiko yake kwenye Twitter?
Angekuwa Mbunge wa CCM wange tweet kama hivyo? Ni mtu wa ku-tweet masikitiko yake hivyo? Ni mtu ambaye mpaka leo hakuna hata mtu aliyekamatwa? Magari yametajwa yanaeleweka.
Pale anapokaa Lissu ni karibu na anapokaa Naibu Spika anayelindwa na askari wenye silaha, wanakaa viongozi, mawaziri.
Tuliwauliza waendesha bodaboda wakasema, pale mliofika mnapajua, walizuia njia ile ya Dodoma Klabu 84 na huku (kwenye tukio), walipomaliza mipango yao walifungua.
Swali: Kwa hiyo kuna watu mnawahisi?
Jibu: Sisi tunaihisi Serikali.
Swali: Lakini si mtu moja kwa moja?
Jibu: Nimesema, hivi wakitaka kujua kama mimi niko hapa, hawatajua? Kwa sababu wale watu waliokwenda pale walikuwa wanawasiliana na kuna mnara pale. Hiyo ni akili ya kitoto tu. Ukicheki mawasiliano lazima utawajua. Kilichomwokoa Lissu ni kwa sababu hakushuka kwenye gari.
Swali: Kuhusu dereva wa Lissu, mbona mmempeleka Nairobi wakati anatafutwa na polisi?
Jibu: Wao walisema amekimbia, ngoja niulize swali, polisi wamekuja hospitali saa mbili baada ya tukio. Mimi nilikuwa mbunge wa kwanza kufika hospitali, nilifungua kwa nguvu kwenye huduma ya kwanza, baadaye wakaja kina Mbowe (Freeman) na Selasini (Joseph), hata waandishi wa habari walichelewa.
Nilikuwa mtu wa pili kupata taarifa, nikaendesha gari mwenyewe mpaka kufika pale ndani. Shughuli zote zimekwisha, polisi wamekuja baada ya saa mbili.
Pili, hata kwenye tukio la Lissu kupigwa risasi, walikuja baadaye sana.

Twitter watangaza kuongeza maneno lakini watumiaji hawajafurahia


Mtandao wa Twitter umeatangaza kuwa upo katika majaribio ya kuongeza idadi ya herufi (character limit) kutoka 140 za sasa 280.
Meneja uzalishaji wa mtandao huo, Aliza Rosen amesema wanataka kuongeza idadi ya maneno ili watu waweze kujieleza kwa uhuru.
Katika hali isiyotarajiwa baadhi ya watumiaji wa mtandao huo hawajaipokea vizuri taarifa hiyo wakisema itaufanya ufanane na mingine.
Mwanzilishi wa Twitter, Jack Dorsey alikuwa wa kwanza kujaribu kuandika tweet yenye herufi 280 na kujibiwa na watuamiaji hao kuwa hiyo inapunguza ubunifu.
Din Moses wa Kenya alisema: “Herufi 240 zitapunguza ubunifu katika uandishi.” Mwingine anayejitambulisha kwa jina la Arsene Wenger aliandika: “Sitasoma tena tweet, sina muda wa kusoma maandiko marefu.”
Ciru Muriuki naye alimhoji Dorsey sababu za kuongeza maneno badala ya kuiwezesha Twitter kufanya marekebisho pale unapokosea katika andiko lako.
Katika mtandao wa Twitter unapokosea kuandika utalazimika kufuta kwa kuwa haiwezeshi kufanya marekebisho.
Mhariri wa Jarida la Vice la Marekani, Caitlin Kelly alikwenda mbali zaidi kuonyesha kuwa hakuridhika na uamuzi huo kwa kuipunguza maneno tweet ya Dorsey yakabaki 139 na kuleta maana ile ile.

Wengine walisema anayefurahia mabadiliko hayo ni Rais wa Marekani, Donald Trump kwa kuwa hupenda kuutumia mtandao huo kuandika taarifa zake.

Askofu Niwemugizi asema yuko tayari kuitwa mchochezi


Dar es Salaam. Askofu wa Kanisa Katoliki Ngara, Severin Niwemugizi amesema yuko tayari kuitwa mchochezi endapo kundi la watetezi wa haki za binadamu watachukuliwa kama wachochezi.
Askofu Niwemugiza amesema yeye kama kiongozi wa dini anaongozwa na maadili, haki na ukweli hivyo hajali namna wengine watakavyomchukulia.
Akifungua mkutano wa asasi za kiraia uliolenga kujadili kuhusu Katiba Mpya leo Jumatano, Askofu Niwemugizi amesema imefika wakati nchi inahitaji kuwa na dira nzuri.
Amesema hakuna mtetezi wa haki za binadamu anayetaka nchi iingie kwenye machafuko kwani wote lengo lao ni kuchochea maendeleo, amani na utulivu.
Askofu Niwemugizi amesema kuanza kutokea kwa matukio ya kuteka watoto, vifo katika mazingira ya kutatanisha na ongezeko la watu wasiojulikana ni ishara mbaya.

"Hizi sio dalili nzuri kwa Taifa lenye afya njema. Ni vielelezo vyenye dira mbaya. Imefika wakati tukae kama Taifa tukubaliane kuwa tunataka dira njema ambayo ni Katiba."
Amesema anatambua jitihada anazofanya Rais John Magufuli katika kupambana na ufisadi na kutaka rasilimali ziwanufaishe wanyonge lakini ni muhimu juhudi hizo zilindwe na Katiba nzuri.
"Rais anafanya mengi mazuri na alipoanza kila mmoja aliona dalili za matumaini lakini juhudi hizo zinaweza zisiwe endelevu kama hakuna ulinzi wa Katiba,”
"Tunahitaji Katiba tena Katiba nzuri ambayo haitaruhusu kuchezewa na yeyote kwa maslahi au matakwa yake binafsi."
Amesema, "Namshauri Rais achunguze kwa makini yatakayozungumzwa kwenye mkutano huu,  ayaone kuwa yana nia njema na ayafanyie kazi."