Friday, September 15

Mlipuko waripotiwa katika treni Uingereza

Maafisa wa zima moto wakiwasili katika eneo la mlipuko nchini UingerezaHaki miliki ya pichaREUTERS
Image captionMaafisa wa zima moto wakiwasili katika eneo la mlipuko nchini Uingereza
Ripoti za hivi punde kutoka nchini Uingereza zinasema kuwa mlipuko umetokea kwenye treni zinazokwenda chini kwa chini katika eneo la Kusini magharibi mwa mji mkuu wa London.
Abiria katika kituo cha wazi cha Parsons Green wamesema katika mitandao ya kijamii kwamba baadhi ya watu wamepata majeraha ya uso na kwamba kulikuwa na wasiwasi mkubwa wakati watu walipokuwa wakijaribu kutoka katika treni hiyo.
Idara za kutoa huduma ya dharura zimewasili katika eneo hilo.
Picha zimeonyesha ndoo nyeupe ikichomeka ndani ya mfuko wa duka la jumla ,lakini mfuko huo hauonyeshi uharibifu mkubwa ndani ya treni hiyo.
Mashahidi wameelezea kuona abiria mmoja akiwa na majeraha ya uso.
Mfuko uliokuwa ukichomeka ndani ya treni hiyo
Image captionMfuko uliokuwa ukichomeka ndani ya treni hiyo
Wengine wamesema kuwa kulikuwa na wasiwasi huku abiria wakitoka ndani ya treni hiyo katika kituo cha treni cha Parsons Green.
Huduma ya ambalensi inasema kuwa imetuma kikosi cha kukabiliana na majanga katika eneo hilo.
Mtangazaji wa BBC Riz Lateef aliyekuwa katika kituo hicho cha treni akielekea kazini alisema: kulikuwa na wasiwasi mwingi huku watu wakitoka ndani ya treni hiyo wakihofia maisha yao huku wakisema kulikuwa na mlipuko.
Wengi walipata majeraha ya kukatwa wakijaribu kutoroka eneo hilo.
Mwandishi wa BBC Sophie Raworth anasema kuwa alimuona mwanamke mmoja akiwa na majareha ya moto usoni na miguuni.

Myanmar yatakiwa kukoma kuwatesa Waislamu wa Rohingya

Waislamu wa kabila la Rohingya wanaowasili nchini Bangladesh inadaiwa kuongezeka maradufuHaki miliki ya pichaEPA
Image captionWaislamu wa kabila la Rohingya
Kiongozi wa wengi katika bunge la senate nchini Marekani, Mitch McConnell, amesema kuwa kiongozi wa Burma Aung San Suu Kyi amemwambia kuwa anakubaliana na haja ya kuwaruhusu zaidi maafisa wa kutoa msaada kwa Waislamu wa kabila dogo la Rohingya na amechukuwa jukumu la kuhakikisha hilo linafanyika.
Amesema katika mazungumzo ya simu bi Aung San Suu Kyi kadhalika amesema ukiukaji wa haki za binadamu utahitaji kushughulikiwa lakini akasisitiza kuwa hana uwezo wa kuliamuru jeshi la taifa hilo lenye ushawishi mkubwa.
Awali waziri wa mashauri ya nchi za kigeni wa marekani, Rex Tillerson, alisema kuwa serikali ya Myanmar ni sharti ikome kuwahangaisha Waislamu wa kabila la Rohingya.

Mazoezi ya kijeshi ya Urusi na Belarus yaanza na kuzua hofu Ukraine

Russian tank (file pic)Haki miliki ya pichaMIL.RU
Image captionKifaru cha Urusi kikielekea kwa mazoezi ya kijeshi ya Zapad
Urusi na Belarus zimeanza mazoezi makubwa ya pamoja ya kijeshi, ambayo yamepewa jina Zapad-2017, na ambayo yamezitia wasiwasi nchi jirani wanachama wa shirika la kujihami la nchi za Magharibi la Nato.
Mazoezi hayo ni moja ya mazoezi makubwa kabisa ya kijeshi kuwahi kufanywa na Urusi tangu ilipotwaa rasi ya Crimea kutoka kwa Ukraine mwaka 2014.
Wizara ya ulinzi ya Urusi imesema wanajeshi 12,700 wanashiriki, lakini wataalamu wa Nato wanatarajia kwamba idadi itakuwa juu zaidi ya hiyo.
Mazoezi hayo ya kijeshi yanafanyika ndani na maeneo ya karibu na belarus na yanashirikisha vifaru, ndege za kivita na manowari.
Rais wa Ukraine Petro Poroshenko ameonya kuwa Zapad-2017 (jina ambalo maana yake kwa Kirusi ni "Magharibi") huenda ikawa ni hatua ya mwisho kabla ya kuivamia Ukraine.
Kiev imeimarisha ulinzi wake mpakani.
Makundi ya wapiganaji wanaoungwa mkono na Urusi wanadhibiti maeneo makubwa ya mashariki mwa Ukraine na wameendelea kukabiliana na wanajeshi wa serikali.
Hii ni licha ya kutiwa saini kwa makubaliano ya kusitisha mapigano Februari mwaka 2015 mjini Minsk.
Nato imeituhumu Urusi kwa kuwapa waasi hao silaha kalikali pamoja na wanajeshi.
Urusi imekanusha tuhuma hizo, lakini imekiri kwamba kuna baadhi ya raia wa Urusi "wanaojitolea" wanaowasaidia waasi hao.
Nato imetuma wanajeshi jumla ya 4,350 Poland, Estonia, Latvia na Lithuania, nchi ambazo zinapakana na Belarus na Urusi.
Nchi 29 wanachama wa Nato pia zinashika doria angani katika mataifa ya eneo la Baltic.
Zapad
Kinachofanyika wakati wa mazoezi ya sasa ya kijeshi ya Zapad-2017 ni kuigiza hali dhahania ya maasi nchini Belarus ikiongozwa na "wasaliti" na "magaidi" wanaoungwa mkono na nchi dhahania kwa jina "Veishnoria".
Wanajeshi wa Urusi wanatumwa Belarus kuisaidia kumaliza maasi hayo.
Lengo kuu ni jinsi ya kuunganisha makao makuu ya kijeshi ya mataifa hayo mawili wakati wa vita.
Belarus imetuma wanajeshi 7,200 na Urusi imetuma wanajeshi 5,500, wizara ya ulinzi ya Urusi imesema.
Jimbo la Urusi la Kaliningrad - ambalo lipo katikati ya Poland na Lithuania ambazo ni nchi wanachama wa Nato - limeshirikishwa katika mazoezi hayo ya kijeshi.
Rais wa Belarus Alexander Lukashenko ana uhusiano wa karibu na Urusi, ingawa kumekuwepo na mzozo wa mara kwa mara kati ya serikali yake na Urusi kuhusu biashara.

Rais Temer wa Brazil akabiliwa na mashtaka zaidi ya uhalifu

Mashtaka mengine ya ufisadi yamuandama rais Michel Temer wa BrazilHaki miliki ya pichaAFP
Image captionMwendesha mashtaka wa kesi za ufisadi nchini Brazil amemfungulia mashtaka rais Michel Temer kwa kosa la kuzuia sheria kuchukuwa mkondo wake na kuhusika katika mtandao wa rushwa.
Mwendesha mashtaka wa kesi za ufisadi nchini Brazil amemfungulia mashtaka rais Michel Temer kwa kosa la kuzuia sheria kuchukuwa mkondo wake na kuhusika katika mtandao wa rushwa.
Hatua hiyo ni ya pili katika kesi ya jinai inayomkabili rais huyo ambaye amekanusha madai hayo.
Wanamtuhumu bwana Temor kwa kuchukua hongo na kujaribu kuwanyamazisha mashahidi.
Bwana Temer amepinga madai ya kufanya makosa yoyote.
Mashtaka ya awali ya ufisadi yalizuiwa na bunge la uwakilishi ambalo lina uwezo wa kuamua iwapo rais anafaa kufunguliwa mashtaka au la.
Katika shtaka la pili rais Temer ameshtakiwa pamoja na washirika wake sita wa kisiasa.
Kiongozi wa mashtaka Rodrigo Janot alisema katika taarifa kwamba bwana Temer alihudumu kama kiongozi wa genge la wahalifu linaloshirikisha wanachama waandamizi wa chama chake cha PMDB.
Amesema kuwa kundi hilo lilidaiwa kuchukua hongo ya takriban dola milioni 190 kwa lengo la kuwazawadi waliotoa fedha hizo kandarasi katika kampuni za umma.
Mashtaka hayo yanatokana na ushahidi uliotolewa na mmiliki wa kampuni kubwa ya nyama JBS Joesely Batista na Wesley Batista.

Chanjo ya watoto huenda ikatolewa mara moja

Chanjo ya watoto huenda ikatolewa mara moja
Image captionChanjo ya watoto huenda ikatolewa mara moja
Teknolojia ambayo huenda ikapelekea chanjo ya watoto kutolewa mara moja kwa kila mtoto imebuniwa na watafiti nchini Marekani.
Chanjo hiyo itakayotolewa mara moja kwa mpigo itashirikisha dawa zote katika sindano moja ambazo zitakuwa zikifanya kazi kwa muda utakaohitajika ili kumkinga mtoto na magonjwa yanayolengwa.
Teknolojia hiyo imeonakana kufanya kazi miongoni mwa panya katika jarida la sayansi.
Watafiti wanasema teknolojia hiyo inaweza kuwasaidia wagonjwa duniani.
Chanjo ya watoto husababiha vilio na machozi na nyingi hupewa watoto kwa muda tofauti.
Kundi moja la watafiti katika chuo cha kiteknolojia cha Massachusetts kimebuni chanjo ambayo inashirikisha dawa zote za chanjo anayopewa mtoto.
Dawa hiyo imetengezwa katika hali ambapo chanjo zilizochanganywa hujitokeza na kuanza kufanya kazi katika muda tofauti katika kiupindi cha wiki sita licha ya kutolewa kwa pamoja.
Teknolojia hiyo itawasaidia wazazi ambao hawana uwezo wa kwenda hospitalini mara kwa mara.

Korea Kaskazini yafyatua kombora kupitia anga ya Japan


Seoul, Korea Kusini. Korea Kaskazini imeuthibitishia ulimwengu kwamba haitishwi na taifa lolote wala vikwazo ilivyowekewa baada ya jana kufyatua kombora la masafa marefu kupitia anga ya kisiwa cha Hokkaido, Japan.
Taifa hilo la kijamaa limefyatua kombora hilo siku moja baada ya kutishia kuizamisha Japan na kuiangamiza Marekani ibaki “majivu na giza” kwa kuliunga mkono Baraza la Usalama la Umoja wa Mataifa kuiwekewa vikwazo vya kiuchumi baada ya kufanya jaribio la nyuklia Septemba 3.
Naibu waziri wa ulinzi wa zamani wa Marekani, Lawrence Korb katika uchambuzi wake aliiambia televisheni ya Al Jazeera kwamba jaribio hilo halikushtua kwani mara zote Korea Kaskazini inataka kuonyesha hasira zake dhidi ya vikwazo ilivyowekewa.
"Kimsingi tulijua kwamba Korea Kaskazini itafanya jambo fulani kwa sababu walikuwa wanapeleka vifaa eneo wanalofyatulia makombora. Ni wazi kwamba jaribio hili lilikuwa la kuonyesha ukaidi wake,” alisema.
Jeshi la Korea Kusini linasema kuwa kombora hilo limefyatuliwa kutoka maeneo ya karibu na mji mkuu wa Pyongyang.
Waziri wa Mambo ya Nje wa Marekani Rex Tillerson ametoa wito kwa China na Urusi kuchukua hatua za moja kwa moja dhidi ya Korea Kaskazini, huku Waziri Mkuu wa Japan Shinzo Abe akitaja jaribio hilo kuwa ni kitendo cha kuudhi.
“China na Urusi lazima zionyeshe kwamba zimechoshwa na hatua ya Korea Kaskazini kuendelea kufanyia majaribio makombora yake kwa kuichukulia nchi hiyo hatua ya moja kwa moja,” alisema Tillerson. China huiuzia Korea Kaskazini mafuta na Urusi ndiyo taifa lililowaajiri raia wengi wa Korea Kaskazini.
Waziri wa Nchi Mratibu wa Sera, Yoshihide Sug amesema, "Japan tunapinga kwa nguvu zetue zote urushwaji wa kombora hilo na tutachukua hatua stahiki na kwa wakati kwenye Umoja wa Mataifa na kwingineko huku tukishirikiana na Marekani na Korea Kusini," alisema Suga.
Korea Kusini
Dakika chache baada ya ufyatuzi huo Korea Kusini ilifyatua makombora mawili ya masafa marefu baharini katika hatua ya kuionya Korea Kaskazini kulingana na chombo cha habari cha Yonhap.
Rais Moon Jae-in alifanya kikao cha dharura na kuonya kwamba kombora hilo litasababisha vikwazo zaidi dhidi ya Korea Kaskazini.

Chaurembo: Manji amenyang’anywa udiwani kwa makosa ya mwaka 2016



Yussuf Manji
Yussuf Manji 
Dar es Salaam. Meya wa Manispaa ya Temeke, Abdallah Chaurembo amesema aliyekuwa Diwani wa Mbagala Kuu (CCM), Yusuf Manji alivuliwa cheo hicho kwa kosa la kutohudhuria vikao sita vya mwaka 2016 bila kutoa taarifa.
Manji aliyekumbwa na mikosi ya kesi tangu mwaka huu uanze juzi aliachiliwa huru na Mahakama ya Hakimu Mkazi Kisutu Dar es Salaam akiwa na wenzake watatu waliokuwa wakikabiliwa na kesi ya uhujumu uchumi kwa kukutwa wakiwa na mabunda 35 ya vitambaa vinavyotumika kutengeneza sare za Jeshi la Wananchi wa Tanzania(JWTZ) zenye thamani ya Sh 192.5 milioni.
Kesi hiyo imefutwa baada ya Mkurugenzi wa Mashtaka(DPP) kusema hana nia ya kuendelea nayo.
Mbali na kesi hiyo, Manji pia anakabiliwa na kesi ya matumizi ya dawa za kulevya aina ya heroin aliyosomewa Februari 17, katika Mahakama ya Hakimu Mkazi Kisutu, Dar es Salaam.
Septemba 6, Meya Chaurembo aliwaambiwa waandishi wa habari jijini Dar es Salaam kuwa walimwondoa kwenye nafasi ya udiwani kwa kukosa sifa ikiwa pamoja na kutohudhuria mikutano sita ya Baraza na Kamati za  Madiwani.
Hata hivyo, Manji alishaeleza kuhusiana na kutokubaliana na hatua ya kumvua udiwani na mara baada ya kuachiwa huru, aliulizia kuhusu malalamiko yake aliyowasilisha mahakamani hapo kuhusu udiwani wake yako vipiu lakini Hakimu Shaidi alimueleza kwa kuwa yuko huru ataenda kulishughulikia hilo.
Akizungumza jana kwa njia ya simu na gazeti hili, Chaurembo alisema makosa ya Manji yalitendeka mwaka 2016 kabla hata mikosi ya kukamatwa na kufunguliwa kesi haijaanza.
“Ungekuja ofisini kwa Mkurugenzi wa Manispaa uone ‘correspondence’ (barua) tulizokuwa tukiwasiliana na Manji ndiyo ujue kwamba tuliwasiliana naye kabla. Vikao ambavyo Manji hakuhudhuria ni vya mwaka 2016 kabla hata hajakamatwa kwa tuhuma za dawa za kulevya,” alisema Chaurembo.
Alisema mbali na kosa hilo, baadhi ya wananchi wa Kata ya Mbagala Kuu walishawasilisha malalamiko ya kukosa mwakilishi katika Baraza la Madiwani, huku chama chake cha CCM nacho kikiridhia avuliwe udiwani.
Hata alipoulizwa sababu za kumhukumu Manji kwa kosa alilofanya mwaka 2016, Chaurembo huku akimtaka mwandishi kwenda ofisi za Manispaa ya Temeke, alisema walikuwa wakiwasiliana na CCM kwanza.
“Wakati huo tulikuwa pia tunawasiliana na chama chake ambacho kilitupa ‘go ahead’ tuchukue sheria. Sheria ya Serikali za Mitaa ya mwaka 1982 inataja vikao vya madiwani vinane, vinne vya Baraza na vinne vya Kamati ya Madiwani. Diwani asipohudhuria vikao vitatu bila kutoa maelezo anavuliwa udiwani,” alisema Chaurembo.
“Manji hakuhudhuria vikao na hakutoa taarifa mpaka sisi tulipomtafuta na ndipo akajibu. Tukawasiliana na chama chake wakasema tuendelee na taratibu. Kuhusu kuadhibiwa kwa kosa la mwaka 2016, mtafute Mkurugenzi wa Manispaa atakwambia, mimi kwa sasa niko kijijini kwetu,” alisisitiza Chaurembo.
Mkurugenzi Mtendaji wa Manispaa ya Temeke, Nassib Mbaga alipotafutwa kwa njia ya simu alisema hawezi kuzungumzia suala hilo kwa sababu yuko safarini.
“Mimi niko safarini, nenda ofisini utapewa taarifa. Taratibu zote zilifuatwa lakini siwezi kukumbuka ni barua ya lini aliandikiwa au ya lini alijibu,” alisema Mbaga.
Manji aliyekuwa Mwenyekiti wa Klabu ya Yanga alikuwa pia akikabiliwa na kesi ya kuajiri wafanyakazi 25 wa kampuni yake ya Quality Group waliokuwa wakidaiwa kutokuwa na vibali vya kufanya kazi nchini.
Aprili 19 mwaka huu, wafanyakazi 16 kati ya hao ambao pia ni raia wa India, walihukumiwa kifungo cha miaka mitatu jela kila mmoja au kulipa faini ya Sh 22 milioni baada ya kupatikana na hatia kwa mashtaka matano yanayowakabili, ikiwemo kufanya kazi nchini kinyume cha sheria na kuzuia maofisa Uhamiaji kutimiza majukumu yao.

Bomoabomoa yawaondoa porini wakazi wa Geita



Mkuu wa Wilaya ya Geita, Herman Kapufi
Mkuu wa Wilaya ya Geita, Herman Kapufi 
Geita. Kamati ya Ulinzi na Usalama ya Wilaya ya Geita kwa kushirikiana na wakala wa Huduma za Misitu  (TFS) wameanza operesheni ya kuwaondoa kwenye maeneo ya hifadhi za misitu wananchi waliovamia maeneo hatari  ya mlima wa Geita.
Wananchi zaidi ya 1,000 wameathirika na bomoabomoa hiyo iliyoanza leo Ijumaa saa tatu asubuhi.
Akizungua katika eneo hilo Mkuu wa Wilaya ya Geita, Herman Kapufi amesema serikali ya wilaya  imetimiza agizo la kikao cha kamati ya ushauri ya mkoa cha Oktoba mwaka jana  kilichotangaza wananchi hao wahamishwe katika maeneo hayo.
Wakizungumza na waandishi baadhi ya wananchi balozi wa eneo hilo Cleofas Vitalis amesema wanaishi katika eneo hilo toka mwaka 2002 na walinunua maeneo kutoka kwenye uongozi wa Mtaa wa Mkoani ambao zamani kilikua Kitongoji cha Mkoani.
Amesema wamepewa taarifa ya kutakiwa kuhama maeneo hayo miezi miwili iliyopita lakini hawakuhama wakiamini Serikali itawahurumia kwa kuwa hawana pa kwenda na tayari wana watoto wanaosoma katika Shule ya Msingi Mkoani.
Wanafunzi zaidi ya 100 wanaosoma Shule ya Msingi Mkoani  wameathiriwa na bomoabomoa hiyo.

Maombi maalum kwa Lissu Jumapili hii


Dar es Salaam. Baraza la Vijana la Chadema (Bavicha) limeandaa maombi maalumu kwa ajili ya mbunge wa Singida Mashariki, Tundu Lissu ambaye alipigwa risasi Septemba 7 akiwa Dodoma.
Maombi hayo yatafanyika Jumapili ijayo katika viwanja vya TIP, Sinza jijini Dar es Salaam na tayari viongozi mbalimbali wa dini wamealikwa kwa ajili ya kuongoza maombi hayo.
Makamu Mwenyekiti wa Bavicha - Tanzania Bara, Patrick Ole Sosopi amesema tayari wametoa taarifa polisi na mamlaka nyingine zinazohusika kwa ajili ya kufanikisha jambo hill.
"Tunakwenda kufanya maombi na siyo siasa, sisi tumeratibu tu maombi haya lakini hatutazungunza chochote, tutawaacha viongozi wa dini waongoze maombi hayo," amesema kiongozi huyo.
Habari zinazohusiana:
Ole Sosopi amesema wamepeleka barua ya mwaliko kwa taasisi mbalimbali za dini ikiwamo Bakwata, TEC na CCT, hata hivyo amesema bado wanasubiri kujibiwa barua zao.
"Tumetoa taarifa pia kwa jeshi la polisi kama sheria inavyoyaka, hatutarajii kuzuiwa kwa sababu tumefuata taratibu zote kama sheria inavyotaka. Mmiliki wa uwanja amekubali, serikali ya mtaa pia imeridhia jambo hilo," amesema Ole Sosopi na kusisitiza kwamba hili jambo ni la kitaifa na watalifanya kwa amani.

Ecobank yaangazia mageuzi ya teknolojia

Mkurugenzi Mtendaji mpya wa Ecobank, Mwanahiba
Mkurugenzi Mtendaji mpya wa Ecobank, Mwanahiba Mzee(kushoto) akiwa katika mahojiano maalumu leo katika ofisi za Mwananchi. 
Dar es Salaam. Benki ya Ecobank imeanzishakwa mara ya kwanza huduma ya malipo mtandaoni yanayohusu viza na Mastercard bila kutumia kadi kupitia programu ya simu.
Uanzishwaji wa huduma hiyo ni sehemu ya mikakati ya benki hiyo kuhakikisha inawafikia wateja wengi zaidi na kuwarahisishia kufanya biashara kwa kuwaruhusu kufanya miamala katika maeneo tofauti duniani.
Mkurugenzi mpya wa Ecobank, Mwanahiba Mzee amesema jana Alhamisi kuwa, huduma hiyo inayotarajiwa kuzinduliwa wiki ijayo itakuwa sehemu ya uboreshaji wa programu ya sasa ya Ecobank mobile app ambayo inarahisisha ufanyaji miamala kutoka na kwenda benki na akaunti za fedha za simu.
Mzee amesema huduma hiyo itawasaidia zaidi wateja ambao katika maeneo walipo hakuna uwezekano wa kufanya malipo kwa kutumia akaunti ya benki ya simu na hasa nje ya nchi.
“Huduma itakayopatikana kwenye Ecobank mobile app ni salama na inakidhi vigezo vyote vya kufanya malipo kimataifa. Benki Kuu ya Tanzania (BoT) wameshaithibitisha, tuliwapelekea nyaraka zote na kuwaonyesha huduma inavyofanya kazi na kitengo cha usimamizi kimeridhia,” amesema.
Mzee aliyeanza kuiongoza benki hiyo Julai mwaka huu, amesema mipango yao ni kuhakikisha wanawekeza katika huduma za digitali katika kiwango kikubwa kwa wateja wote.
“Lengo letu ni kuwapatia wateja urahisi wa kupata huduma za kibenki ili hata kama mtu ana kazi nyingi afanye muamala kwenye simu akiwa anakula chakula cha mchana,” amesema Mzee katika mahojiano maalumu alipotembelea ofisi za kampuni ya Mwananchi Communications Ltd (MCL) jana.
Amsema “Tunataka kupunguza matumizi ya fedha taslimu kwa sababu uhalifu ni mwingi siku hizi.”
Mbali na uwekezaji wa huduma za kidigitali, amesema wamepanga kuongeza wateja, mtaji na kukuza faida kwa wanahisa wake.
Ecobank ni benki ya kimataifa inayopatikana katika nchi 36 barani Afrika na baadhi ya maeneo ya Uingereza, Ufaransa, Dubai na Beijing nchini China.
Mzee ambaye benki yake ipo katika kundi la pili la benki (Tier 2), amesema wataendelea kuwezesha ukuaji wa uchumi kwa kutoa mikopo itakayosaidia wafanyabiashara kufikia malengo yao na hasa biashara zinazovuka mipaka na uuzaji wa mazao.
Katika mikakati ya sasa ya kuimarisha benki hiyo ambayo katika robo ya kwanza ilikuwa na mikopo chechefu kwa asilimia 57 ya mikopo yote, Mzee amesema wana mpango wa kuanzisha mikopo ya nyumba, mikopo inayotokana na dhamana ya mishahara na mingineyo.
Mikopo chechefu ni ile ambayo haijalipwa baada ya kuilipa kupita na kufanya ionekane hailipiki.
“Tunataka kuongeza wigo wa huduma zetu wa kuangazia sekta kama vile huduma ndogondogo za benki, asasi za kiraia, Saccos na shule. Tunataka tuwe vinara katika sehemu hii ya huduma,” amesema Mzee na kuongeza moja ya kazi kubwa atakayoifanya ni kupunguza mikopo chechefu.
Katika mahojiano hayo maalumu, Mhariri Mtendaji Mkuu wa MCL, Bakari Machumu amemweleza Mzee kuwa kampuni  inawekeza kwa kiwango kikubwa katika digitali ili kuhakikisha habari zinawafikia watu wengi zaidi na kwa haraka.
MCL inachapisha magazeti ya Mwananchi, The Citizen, Mwanaspoti na mtandaoni kupitia MCL Digital.

Waliokamatwa na mzigo wa almasi JNIA wafikishwa Kisutu

Shehena ya Almasi iliokamatwa katika Uwanja wa
Shehena ya Almasi iliokamatwa katika Uwanja wa Ndege wa Kimataifa wa  Julius Nyerere jijini Dar es Salaam  hivi karibuni. Ambayo jana  ilioyeshwa hadharani wakati Waziri wa  Fedha na Mipango, Dk  Philip Mpango na viongozi wegine wa Serikali,   alipokwenda kukabidhiwa ripoti  ya uchunguzi kuhusu  utoroshwaji wa madini hayo kiwanjani hapo jana. Picha na Ikulu 
Dar es alaam. Watuhumiwa waliokamatwa na mzigo wa almasizenye thamani ya Sh 32.3 bilioni katika Uwanja wa Ndege wa Kimataifa wa Julius Nyerere(JNIA), wamefikishwa mahakamani Kisutu asubuhi leo Ijumaa.
Watuhumiwa hao walikamatwa na mzigo huo ambao ulizuliwa na Serikali ili ufanyiwe tathimini upya kujua thamani halisi baada ya thamani iliyotumika kutiliwa mashaka na Serikali.
Jeshi la polisi liliwashikilia watuhumiwa wanne kwa uchunguzi na hatua nyingine za kisheria baada ya kuzuia mzigo huo.
Mzigo huo wa almasi ulikuwa unatoka mgodi wa Mwadui ambao ni wa ubia kati ya Serikali na kampuni ya Petra Diamonds ya Afrika Kusini kwa hisa 25 za Serikali na Petra  Diamonds hisa 75.

Kamanda Lyanga akerwa na wananchi wa Rufiji


Rufiji. Kamanda wa Kanda Maalum ya Rufiji, Onesmo Lyanga ameeleza kukerwa na tabia ya wananchi ya kutokutoa ushirikiano kwa Jeshi la Polisi na kutowaonyesha mahali walipokuwa wakiishi wauaji baada ya polisi kutoa orodha ya majina ya watuhumiwa wanaowatafuta.
Kamanda Lyanga ameonyeshwa kusikitishwa na tabia hiyo wakati wananchi wanajua wanapoishi.
Akizungumza na wananchi leo Ijumaa mara baada ya Mkuu wa Mkoa wa Pwani, Evarist Ndikilo kumaliza kuhutubia na kumtaka azungumze na amesema ilinasikitisha sana kuona wananchi hawatoi ushirikiano.
Amesema polisi ililazimika kutumia nguvu kubwa sana kuwatafuta wahalifu mahali walipokuwa wakiishi huku baadhi ya wananchi wakijua wanapoishi.
"Inasikitisha sana kuona hadi polisi tunatumia nguvu kubwa kuwatafuta wahalifu Shabani Ngunyamlile na na Hassan Njami huku mkijua walikuwa wanaishi katika Kijiji cha Rungungu, lakini mlikuwa  na mioyo migumu sana, sasa kawaoneni chumba cha kuhifadhia maiti Muhimbili, sisi tumewamaliza," amesema.
Amesema polisi na vyombo vingine vyote vya ulinzi na usalama wataendelea kuwakamata watu wote waliojihusisha na utekelezaji wa mauaji hayo popote pale walipo na kuwaonya watu wanaowasingizia wenzao ili waadhibiwe.
Amesema mkono wa dola ni mkubwa na wao wapo wengi kila mahali kama mbwa mwitu hivyo hawatashindwa kukabiliana na hali yoyote ile hapa nchini.

Ajira za muda changamoto kwa wenye ulemavu

Waziri wa Nchi Ofisi ya Rais Menejimenti ya
Waziri wa Nchi Ofisi ya Rais Menejimenti ya Utumishi wa Umma na Utawala Bora, Angellah Kairuki 
Dodoma. Waziri wa Nchi Ofisi ya Rais Menejimenti ya Utumishi wa Umma na Utawala Bora, Angellah Kairuki amesema miongoni mwa changamoto za Mfuko wa Maendeleo ya Jamii (Tasaf) ni watu wenye ulemavu kubebwa kupelekwa katika maeneo ya ajira za muda.
Kairuki amesema hayo leo Ijumaa akijibu swali la nyongeza la Mbunge wa Viti Maalumu (CCM), Ritta Kabati aliyetaka kufahamu kaya masikini za walemavu zinasaidiwaje wakati wa utekelezaji wa miradi ya Tasaf.
"Kule kwetu kuna kaya masikini ambazo pia ni za walemavu hawawezi kutembea kufika maeneo ya ajira. Serikali ina mpango gani wa kuwajengea hata kisima ili wauze maji wakiwa walipo?" amehoji.
Kairuki amesema katika miradi hiyo kuna walemavu wenye umri wa zaidi ya miaka 18 ambao hubebwa kupelekwa maeneo yenye ajira za muda.
Amesema amepokea ushauri wa mbunge na wataangalia nini kifanyike katika awamu nyingine za miradi ya Tasaf.
Katika swali la msingi, Kabati alitaka kufahamu hatua iliyofikiwa katika utekelezaji wa mpango wa Tasaf.
Waziri Kairuki amesema Tasaf awamu ya tatu ilianza kutekelezwa Januari mwaka 2013 katika halmashauri 159 za Tanzania Bara na wilaya zote za Zanzibar.
Amesema kaya masikini 1.01 milioni zenye jumla ya watu takriban 5 milioni zimeandikishwa katika vijiji, mitaa na shehia 9,986.
"Hadi kufikia Agosti, kaya masikini zilishapokea ruzuku ya Sh521.9 bilioni," amesema.
Amesema kaya hizo zimetekeleza miradi ya kutoa ajira kwa walengwa 354,648 kutoka katika halmashauri 42 nchini.

Thursday, September 14

Mtoto ‘atekwa’ na kuuawa kisha mwili wake kutupwa mtaroni Kibaha


Morogoro. Mtoto Rehema Juma(5) mkazi wa Mtaa wa Kingolwira Manispaa ya Morogoro ameuawa na mwili wake kutupwa kwenye mtaro Kibaha mkoani Pwani baada ya ‘kutekwa’ na mtu anayedaiwa kuvaa baibui.
Mtoto huyo inadaiwa ‘alitekwa’ wakati akiwa anacheza jirani ya nyumbani kwao.
Taarifa za tukio hilo limeibua taharuki kwa wakazi wa Manispaa ya Morogoro hususani wenye watoto wadogo hasa ukizingatia siku za hivi karibuni kulitokea matukio ya utekaji na mauaji ya watoto jijini Arusha ambapo tukio hili la Morogoro bado halijafahamika kama visasi ama ushirikina.
Bibi aliyekuwa akimlea toto huyo, Maua Muhongole (74) amesema mtoto huyo alitekwa Septemba 12 jioni alipokuwa akicheza na wenzake na kwamba jitihada za kumtafuta zilifanyika hadi kufikia leo ndipo alipokea taarifa za kupatikana kwa mwili wa mtoto huyo maeneo ya Kibaha mkoani Pwani.
"Majira ya saa mbili kasoro usiku wakati chakula kikiandaliwa nilimtuma mjukuu wangu mwingine akamuite mwenzake ambapo alirudi na kunimbia kuwa wenzake wamemwambia hayupo kaondoka na mwanamke aliyevaa baibui kwenda kuchukua pipi dukani muda mrefu uliopita," amesema Maua .
Mtoto Ndichai Idrisa (6) ambaye alimuona Rehema akiondoka alisema aliondoka na mama huyo wakati yeye akiwa kwenye baiskeli akirudi nyumbani na baba yake na alimuita ili arudi nyumbani lakini Rehema hakuongea lolote.
Kaimu Kamanda wa Polisi Mkoa wa Morogoro, Leonce Rwegasira amesema jeshi la polisi linaendelea na uchunguzi zaidi ili kumtafuta mtuhumiwa aliyehusika na wizi wa mtoto huyo kabla ya kuuawa.
Kamanda Rwegasira alikiri kupokea taarifa za kupotea kwa mtoto huyo hata hivyo alisema kuwa tayari ameshatuma askari wake kwenda eneo la tukio kunakohisiwa kuwa mwili wa mtoto ulikutwa kwenye mtaro ili wajiridhishe na kuweza kutoa taarifa.
Amesema tukio la wizi wa mtoto lilitokea Septemba 12 saa mbili usiku na kwamba inadaiwa mwizi wa mtoto huyo alimdanganya  amfuate ili akampatie pesa na kutokomea naye.
Amesema pia mwizi wa mtoto huyo alitumia gari ndogo aina ya taxi yenye rangi nyeupe iliyokuwa imeegeshwa mita 60 kutoka eneo la tukio ambalo lilionekana tangu majira ya mchana na baada ya tukio hilo gari hilo lilitoweka.

Majaliwa atoa tamko usimamizi wa madini

Waziri Mkuu,Kassim Majaliwa na Naibu Waziri wa

Waziri Mkuu,Kassim Majaliwa na Naibu Waziri wa Nishati na Madini, Dk Medard Kalemani(katikati) wakisikiliza maelekezo kutoka kwa Mtaalamu wa Jiolojia, Timo Gawronski,walipotembelea maabara zilizopo kwenye kituo cha madini(AMGC). 
Dar es Salaam. Waziri Mkuu, Kassim Majaliwa ameitaka Wizara ya Nishati na Madini kuandaa mikakati madhubuti ya kusimamia sekta hiyo kwa manufaa ya Taifa.
Amesema hayo alipofunga mkutano wa 37 wa ngazi ya mawaziri wa nishati na madini wa nchi wanachama wa Kituo cha Madini Afrika (AMGC) uliolenga kujadili mchango wa sekta ya madini katika maendeleo ya bara hilo.
Mkutano huo umefanyika leo Alhamisi katika kituo cha AMGC kilichopo jijini hapa, Tanzania ikiwa mwenyekiti.
Waziri mkuu amesema licha ya nchi nyingi za Afrika ikiwemo Tanzania kuwa na utajiri wa madini, sekta hiyo haina tija kwa maendeleo hivyo ameagiza kuandaliwa mikakati madhubuti.
"Bara la Afrika lina utajiri mkubwa wa madini, sehemu kubwa ya madini hayo hayajatumika. Tanzania ina madini mengi kama vile dhahabu, almasi na Tanzanite lakini mchango wake ni asilimia nne pekee," amesema.
Kutokana na hali hiyo, amezitaka nchi wanachama wa AMGC kuandaa mikakati ya pamoja ili madini yawanufaishe wananchi.
"Changamoto iliyopo ni jinsi gani tunaweza kusimamia sekta hizi na kuleta maendeleo kuliko kuacha mashimo na umasikini," amesema.
Naibu Waziri wa Nishati na Madini, Dk Medard Kalemani amesema wamepokea maagizo hayo na kuanzia mwakani watatumia kituo hicho kuchenjua mchanga wa madini na kufanya uyeyushaji.
"Nitoe wito kwa kampuni za madini na wachimbaji wadogo kuanza kuleta madini kwenye kituo hiki kwa ajili ya kuongeza thamani na kufanya uchambuzi," amesema

Mbunge wa CCM aeleza alivyohusika ndege iliyomsafirisha Lissu


Dodoma. Mbunge wa Mpendae (CCM) Salim Hassan Turky ameeleza alichokifanya katika suala la ndege iliyomsafirisha Mbunge wa Singida Mashariki (Chadema), Tundu Lissu ni kuingia dhamana na si kulipa malipo taslimu ya dola 9,000 za Marekani.
Turky alimesema hayo leo Alhamisi mara baada ya kauli ya Spika wa Bunge, Job Ndugai kuwa alilipia gharama za ndege hiyo.
Amesema kuwa nyaraka inayosambaa katika mitandao ya jamii inayosemekana kutumwa na Mbunge wa Iringa Mjini (Chadema) Peter Msigwa sio tiketi ni invoice.
Amesema anapenda kuiweka Tanzania katika hali ya usalama na ukweli na kwamba maneno mengine si vizuri.
“Tusifanye tukio la Tundu Lissu kuwa la siasa. Mimi binafsi tukio zima la mbunge mwenzangu limenisikitisha sana limenisononesha sana. Nikiwa kama kamishna wa Bunge lakini pia ni binadamu kuna kuzaliwa na kufa,”amesema.
“Kwa hiyo tukio hilo lilipotokea tuliitwa na makamishna wote na Spika wetu wakiwemo Mbowe (Kiongozi wa Kambi Rasmi ya Upinzani) Msigwa na timu yake. Kwanza ndege ilikuwepo pale Airport ambayo ilikuwa imeshaagizwa na Bunge iko stand by kumpeleka moja kwa moja Muhimbili.”
Amesema walichoamua ni kuwa aende moja kwa moja Nairobi nchini Kenya lakini ndege hiyo haikuwa na kibali cha kwenda nchini humo na kwamba ili uweze kwenda nchini humo unalazimika kuwa na marubani wawili.
Hata hivyo, amesema Spika Ndugai alihangaika kupata kibali cha ndege iliyokuwepo uwanjani ili iweze kumpeleka mgonjwa Nairobi.
“Wakati mambo yote tayari rubani wa ndege akasema kuna kitu kinaitwa landing Instrument ambayo ile ndege haina kwa hiyo haitaweza kuruka,” amesema.
Amesema kutokana na majibu hayo waliingiwa na sitofahamu watafanya nini lakini yeye aliingia katika uzoefu wake aliopewa na Mungu kwa kutafuta ndege kwa ndugu zake ambao wanafanya nao biashara sana.
“Nikawaambia ndege ipo wakatoa nauli zao za ghali ghali kwa sababu tunajuana wakakubali kutusaidia kwa dola 9,200 pamoja na ambulance (gari la wagonjwa) mimi ndio niliyoita kwa kubaliana na Mbowe na Msigwa kwamba Turky haya mambo yasimamie baadaye…na ndicho
kilichofanyika,” amesema.
Amesema ilikuwa siku ya pili walipe fedha hizo lakini haikuwezekana na kwamba jambo hilo limezungumziwa bungeni na Spika kuwa yeye ametoa fedha hizo na kwamba Chadema watalipa.
Amesema kauli hiyo haina tatizo kwa sabababu kama Chadema isingelipa hadi jana ingebidi atoe fedha zake kulipa deni hiyo la ndege.
“Kwa sababu wale mabwana watakuwa wamepitiliza bahati leo mchana nimempigia mwenye ndege saa 6.30 ndio akaniambia kuwa wamelipa,”amesema.
Alipoulizwa kwa maana hiyo yeye aliingia udhamini wa malikauli, Turky
amesema malikauli hiyo kwake inakubalika si kwa mtu mwingine.
Amesema malikauli iliyokuwa inahitajika pale ni kwamba kama Chadema wasipolipa basi papatikane mtu wa kulipa.
“Hapana sikulipa cash(fedha taslimu) na bahati mbaya siku ile
isingeweza kuruka kama zisingepatikana dola 9000 kwa maana lazima ulipe ndio ndege iruke na hapa Dodoma hakuna mtu aliyekuwa na hata dola 1000 kwa hivyo ilikuwa kidogo hali ngumu lakini tunamshukuru Mungu nia njema hufungua milango yake,”amesema.
Alipoulizwa kama ana hisa katika kampuni hiyo, Turky amesema hana hisa na kwamba ndege hizo amekuwa akizutumia mara nyingi .