Saturday, March 31

Tiangong-1: Chombo cha angani China kuanguka duniani kikiwaka moto

Radar image of TiangongHaki miliki ya pichaFRAUNHOFER
Chombo cha anga za juu cha China kwa jina Tiangong-1 ambacho kimekuwa kikitumiwa kama maabara kinatarajiwa kuanguka duniani mwishoni mwa wiki.
Kina urefu wa mita 10 na uzani wa zaidi ya tani 8 na ni kikubwa zaidi ya vyombo vyote vilivyoundwa na binadamu ambavyo vimewahi kuanguka kutoka anga za juu.
China inasema imepoteza mawasiliano yote na chombo hicho jambo ambalo linamaanisha kwamba mwendo wake wakati kinadondoka kutoka anga za juu hauwezi kudhibitiwa.
Hata hivyo, wataalamu wanasema uwezekano wa vipande vya Tiangong ambavyo havitakuwa vimeteketea kabisa wakati vikifika ardhini kuanguka kwenye maeneo yenye watu wengi ni mdogo sana.
"Ukizingatia kwamba Tiangong-1 ina uzani wa juu sana, vipande vyao vimekazwa sana, kuliko ilivyo kwa vitu vingine ambavyo hurejea duniani kutoka anga za juu, kumekuwa na juhudi nyingi za kutumia mfumo wa rada kufuatilia mwendo wake na kukadiria ni wapi kitaanguka," anasema Richard Crowther, mhandisi mkuu katika Shirika la Anga za Juu la Uingereza.
"Sehemu kubwa ya chombo hiki inatarajiwa kuungua kikiingia ndani ya anga ya dunia kutokana na kushika kiwango cha juu cha joto. Uwezekano mkubwa ni kwamba vipande ambavyo vitasalia baada ya hapo vitaanguka mahali baharini," aliambia BBC.
Presentational grey line
Graphic
  • Ni vigumu kujua mapema ni wapi kitaanguka na ni wakati gani
  • Kawaida, wataalamu huweza kubaini ni wapi saa moja kabla ya chombo kama hicho kuanguka
  • Sehemu kubwa ya chombo hicho itaungua chombo kitakapoingia kwenye anga ya dunia
  • Njia ya mzingo ya chombo hicho ina maana kwamba vifusi sana vitaanguka katika eneo moja
  • Pengine 20-40% ya chombo hicho itafika ardhini, ambayo ni tani 1.5-3.5 hivi
  • Uwezekano mkubwa ni kwamba vifusi hivi vitaanguka baharini
  • Njia ya kuanguka kwa vifusi hivyo ardhini inaweza kuwa na umbali wa mamia ya kilomiya
  • Tiangong ndicho chombo cha 50 kwa uzani kuanguka duniani kikiwa hakiwezi kudhibitiwa
Presentational grey line
Chombo hiki ambacho kilikuwa kikitumiwa kama kituo cha anga za juu kilirushwa angani mwaka 2011 na kutembelewa na wana anga sita wa China.
Tiangong kilifaa kusitisha shughuli yake ya kuizunguka dunia kwa utaratibu na mpangilio fulani.
Lengo lilikuwa kutumia vifaa vinavyokipa msukumo kukielekeza hadi maeneo ya mbali yasiyo na watu maeneo ya Bahari ya Kusini.
Lakini kabla ya hilo kufanyika, ghafla mfumo wa kukidhibiti ulikumbwa na hitilafu na wataalamu wa China wakapoteza udhibiti.
Kwa sasa, hakuna lolote linaloweza kufanyika kuzuia chombo hicho kisianguke popote.
Mashirika 13 ya anga za juu ya mataifa mbalimbali, yakiongozwa na Shirika la Anga za Juu la Ulaya (ESA), kwa sasa yanafuatilia njia ya Tiangong na kujaribu kuiga tabia yake kadiri kinavyoingia ndani ya anga ya dunia kikiendelea kuizunguka.
Kwa pamoja, mashirika hayo yana kundi linalofahamika kama Kamati ya Mashirika ya Pamoja ya Kuangazia Taka kutoka Anga za Juu, na yanajaribu kukadiria ni wakati gani hasa chombo hicho kinaweza kuanguka na ni wapi.
RoketiHaki miliki ya pichaAFP
Image captionChina ilikituma chombo cha Tiangong-1 angani mnamo 2011
Kutotabirika kwake kuna maana kwamba kwa sasa ni taarifa tu na ubashiri unaofanywa huku kila mtu akisubiri kuona chombo hicho kitaanguka wapi.
"Wataalamu wanaweza kuwa na uhakika wa mwelekeo wa chombo hiki wa saa moja hivi na hilo linaweza kufanyika saa nne tu pekee pamepa. Lakini uhakika huo wa saa moja una maana kwamba itaweza kufahamika pengine karibu mzunguko mzima wa mwisho," mkuu wa kitengo cha kuondoa taka anga za juu wa Esa Holger Krag anasema.
"Lakini hilo linatosha kutahadharisha mataifa kadha, au hata mabara."
Kinachoweza kubainishwa wazi kufikia sasa ni kwamba hakuna vifusi vyovyote vitakavyoanguka nje ya eneo la nyuzi 43 kaskazini na kusini mwa Ikweta.
Hii inajumuisha eneo kubwa la kuanzia bahari ya Mediterranean hadi Tasmania, kwa mfano.
Hilo linatokana na mwinamo wa Tiangong wakati wa kurushwa kwake angani.
China haina uwezo mkubwa wa kufuatilia vyombo vyake vinapozunguka anga za juu na kwa hivyo haikuwa na njia nyingine nzuri ila kurusha chombo hicho kiasi kwamba kingekuwa kikizunguka dunia kupitia Ikweta.
Kituo cha Kimataifa cha Anga za Juu kwa mfano hufika nyuzi 52 kaskazini na kusini.
Presentational grey line
Tiangong maana yake ni 'Kasri la Mbinguni'
Tiangong-1 space lectureHaki miliki ya pichaGETTY IMAGES
Image captionMwanananga Wang Yaping alitoa mhadhara unaokumbukwa sana kwa watoto akiwa moja kwa moja kutoka chombo cha Tiangong-1 kikiwa anga za juu
  • Chombo hiki kirirushwa mwaka 2011 kufanyia majaribio utaratibu wa kutuma vyombo vingine na kuviunganisha vikiwa anga za juu
  • Makundi mawili ya wanaanga yalizuru chombo hicho wakitumia vyombo vidogo kwa jina Shenzhou - mwaka 2012 na 2013
  • Walijumuisha wanaanga wa kwanza wa kike kutoka China Liu Yang na Wang Yaping
  • China inapanga kutuma chombo cha anga za juu cha kudumu katika mwongo mmoja ujao
  • Imeunga roketi inayobeba kuinua vitu vya uzani wa juu sana kwa jina Long March 5 kwa ajili ya kazi hiyo
Presentational grey line
Maeneo ambayo kituo hicho kinatarajiwa kuanguka yanaishi watu 5.2 bilioni hivi, ingawa mengi ya maeneo hayo ni bahari.
Hii ndiyo maana uwezekano mkubwa wa chombo hicho ni kuanguka baharini.
Dkt Krag alisema: "Tunafahamu kutoka kwa matukio sawa ya awali kwamba kati ya 20% na 40% ya chombo kama hicho kwa uzani wake ndiyo hufika ardhini baada ya sehemu kubwa kuteketea.
"Tukitumia kipimo hiki kwa Tiangong, naamini, kimsingi... basi tani 1.5 hadi 3.5 zinaweza kufika ardhini."
Vipande vingi ambavyo sana hukosa kuteketea ni matanki ambayo sana huwa sehemu ya ndani ya chombo.
Na pia huwa yameundwa kwa chuma, titanium au plastiki zilizoimarishwa zaidi na kawaida huwa yanahimili joto kali.
Graphic
Tiangong ni miongoni mwa vyombo vingine vikubwa vilivyowahi kuanguka bila kudhibitiwa, lakini bado kineachwa nyuma na vyombo vingine.
Chombo cha Skylab cha Marekani kilikuwa na uzani wa tani 80 kilipoanguka, ingawa kiliweza kudhibitiwa kwa kiasi fulani, mwaka 1979.
Kilianguka Australia Magharibi ardhini lakini hakuna aliyejeruhiwa.
Chombo cha Nasa cha Columbia nacho kilikuwa na uzani wa tani 100 kilipoanguka mwaka 2003.
Tena, ardhini hakuna aliyegongwa na vifusi vyake ambavyo vilitapakaa majimbo ya Texas na Louisiana.
Mtaalamu Jonathan McDowell kutoka Kituo cha Fizikia ya Anga za Juu cha Harvard-Smithsonian anasema kwa kukadiria, 50 ni chombo cha 50 kwa ukubwa.

Lakini je vifusi vya vyombo vyote vya anga za mbali huanguka duniani?

Wakati vifusi vya vyombo vya anga za mabali huanguka mara kwa mara, vingi " huungua na kuishia katikati ya bahari na mbali na wanapoishi watu," anasema Bw Aboutanios.
Kwa kawaida huwa yanakuwepo bado mawasiliani na chombo au setilaiti. Hii inamaanisha kuwa udhibiti wa wataalam kutoka ardhini bado unaweza kukiongoza chombo na kukipeleka mahala ambapo wanataka kiangukie.
Kifusi huwa kinaongozwa kuangukia kwenye kile kinachoitwa ncha ya bahari ambayo haifikiwi na watu - mbali kabisa na ardhi kavu. Ni eneo lililopo Kusini mwa Pacific, baina ya Australia, New Zealand na Amerika Kusini.
Ni eneo lenye ukubwa wa kilomita za duara, 500 eneo hili ni eneo la makaburi ya vyombo vya anga za mbali pamoja na setilaiti, ambako masalia ya vyombo vya anga za mbali vipatavyo 260 yanadhaniwa kuzikwa kwenye sakafu ya bahari.
Watu wakishikilia magazeti yenye picha ya mChina wa kwanza kwenda katika anga za mbali kwenye ukurasa wa mbeleHaki miliki ya pichaGETTY IMAGES
Image captionMchina wa kwanza aliyefanya safari ya anga za mbali 2003 alikuwa shujaa wa taifa

Je Tiangong-ni nini?

Uchina ilichelewa kuanza uvumbuzi wake wa anga za juu.
Mnamo 2001, Uchina ilizindua vyombo vyake vya anga kwa kujaribu kuwatuma wanyama mwaka 2003 kwenye chombo cha anga za mbali kwenye mzingo wa dunia, na hivyo kuifanya nchi hiyo kuwa ni ya tatu kufanya hivyobaada ya Muungano wa Usovieti na Marekani.
Mpango wa vituo vya safari za anga za mbali ulianza kwa kukituma chombo cha Tiangong-1 ama "Kasri la Mbinguni", mwaka 2011.
Kituo hicho kidogo kiliweza kuwahifadhi wataalam wa masuala ya anga za mbali lakini kwa muda mfupi wa siku kadhaa. Mchina wa kwanza mwanamke mtaalamu wa anga za juu Liu Yang alitembelea kituo hicho mwaka 2012.
Kilikamilisha huduma zake mwezi Machi 2016, miaka miwili zaidi ya muda kiliopangiwa.

Tembo anayetoa 'moshi' mdomoni India

The elephant is seen blowing out ash in a forest in southern IndiaHaki miliki ya pichaVINAY KUMAR, WILDLIFE CONSERVATION SOCIETY OF INDI
Image captionTembo ameonekana akitoa majivu kwenye msitu kwenye msitu kusini mwa India
Huko nchini India, imeonyeshwa video ya tembo anayetoa majivu yanayogeuka kuwa moto,hali ambayo imewashangaza wataalamu wengi wa wanyama wa pori duniani.
Vinay Kumar ni mwanasayansi wa hifadhi ya wanyama pori katika jamii ya watu wa India,alipiga picha ya video ya sekunde 48 wakati yuko katika safari ya kikazi katika msitu wa Nagarhole katika mji wa Karnataka mwezi april mwaka 2016.
Aliwaambia BBC kutoionyesha video hiyo mpaka sasa kwa sababu hakutambua umuhimu wa video hiyo sana.
Wanasayansi wanasema mpaka sasa hawaelewi ni kwa nini tembo huyo alikuwa anatoa majivu.
Hifadhi ya wanyamapori nchini India inasema hii ni video ya kwanza inayoonyesha Makala ya tembo akionyesha tabia ya namna hiyo,jambo ambalo limewaacha na bumbuwazi wanasayansi pamoja na wataalamu wa wanyama pori.
Bwana Kumar amesema yeye na wenzie walitembelea katika msitu huo nyakati za asubuhi ili kuona kama camera zao walizoziweka zimewapiga picha chui.akini wanakuta imempiga picha tembo wa kike aliyekuwa katika umbali wa mita 50 wa kamera.
Tembo huyo alionekana akitoa makaa na kuacha moto chini pindi majivu hayo yanapomtoka.
Kile tulichokiona ni sawa na kuona tembo huo akivuta ,alikuwa anatoa majivu mengi kutoka katika katika mdomo wake na kutoa moshi huo kama alikuwa anavuta.
Mtaalamu wa tembo Varun Goswami,alichunguza video hiyo na anaamini kuwa inawezekana tembo huyo alikuwa anatoa moto wa makaa,kwa sababu alionekana kama anatoa kitu kutoka chini,na kupuliza majivu yaliyokuwa pamoja nayo na kusababisha afanye hivyo
Aidha alisema mkaa unajulikana kuwa una athari ingawa unawea kuwa hauna virutubisho vingi,wanyama pi wanaweza kuvutiwa nao kwa ajili ya tiba.

Arnold Schwarzenegger yuko ''imara'' baada ya kufanyiwa upasuaji wa moyo

Anorld SchwarzeneggerHaki miliki ya pichaGETTY IMAGES
Image captionInasemekana Schwarzenegger anaendelea kupona vema hospitalini
Nyota huyo wa filamu mwenye Mmarekani mwenye asili ya Austria na gavana wa zamani wa California mwenye umri wa miaka , 70, alikuwa akifanyiwa upasuaji wa kuwekewa mrija wadamu katika hospitali ya Cedars-Sinai siku ya Alhamisi.
Mrija huo uliwekwa kwa ajili ya kukarabati ule uliowekwa mwaka 1997 uliokuwa na kasoro .
Upasuaji wake siku ya Alhamisi ulidumu kwa muda wa saa kadhaa , kulingana na taarifa iliyochapishwa kwenye mtandao wa TMZ.
Inasemekana Schwarzenegger anaendelea kupona vema na ameripotiwa kusema: '' Nimerejea'' baada ya kuamka kwenye chumba cha upasuaji.
Msemaji wake , Daniel Ketchell, amesema kuwa Schwarzenegger yuko katika "hali nzuri".
Akijibu maswali ya wanahabari ,kansela wa Austria Sebastian Kurz alimtakia "rafikia yake " kuwa na afya nzuri kupitia ujumbe wake wa twittee, akaongeza: " Ninasubiri kwa hamu kukuona tena ."
Schwarzenegger anafahamika zaidi kama mwanamume jasiri katika filamu kama vile the Terminator na Conan the Barbarian.
Alihudumu mihula miwili kama gavana wa California governor kuanzia mwaka 2003 hadi 2011 kabla ya kurejea tena katika filamu za The Expendables.
Mwezi Mei mwaka jana , Schwarzenegger alitunukiwa na tuzo la heshma la - Chevalier de la Legion d'Honneur - medali ya heshma zaidi inayotoyolewa nchini humo kwa kazi yake ya mazingira.

Urusi yawatimua wanadiplomasia 60 wa Marekani

Lavrov anasema Urusi itachukua hatua kwa nchi zote zilizowafukuza wanadiplomasia wake
Image captionLavrov anasema Urusi itachukua hatua kwa nchi zote zilizowafukuza wanadiplomasia wake
Urusi imewafukuza wanadiplomasia 60 wa Marekani, na kufunga ubalozi uliopo St Petersburg ikiwa ni majibu kwa kitendo cha Marekani kuwafukuza wanadiplomasia wa Urusi juu ya shutuma ya Uingereza kuhusu kuhusika kwa Urusi katika shambulio la jasusi wa zamani wa Urusi Sergei Kripal na binti yake huko Uingereza.
Hatua hiyo ilitangazwa na waziri wa mambo ya nje wa Urusi Sergei Lavrov.
Zaidi ya nchi ishirini zimewafukuza wanadiplomasia wa urusi nchini mwao katika kuunga mkono Uingereza.
Miongoni mwa nchi hizo ni Marekani ambapo mapema wiki hii iliwatimua wanadiplomasia 60 wa urusi kuondoka Marekani.
Boris Johnson anasema hatua hiyo ya Urusi ni sawa na kutaka kuwasha moto zaidi
Image captionBoris Johnson anasema hatua hiyo ya Urusi ni sawa na kutaka kuwasha moto zaidi
Katika kujibu hilo Urusi imewatimua wanadiplomasia 58 kutoka Moscow na wawili kutoka mji wa Yekaterinburg, chombo cha habari cha Interfax kiliripoti.
Lavrov alisema kuwa nchi nyingine zilizowafukuza Warusi wasubiri majibu kwa vitendo.
Ameongeza kuwa Ubalozi wa Marekani umepewa taarifa juu ya hatua hiyo kama majibu kwa Marekani kwa kuwatimua wanadiplomasia wake na kusimamisha ubalozi ulioko St. Petersburg.
Baada ya hatua hiyo msemaji wa Marekani amesema kuwa Urusi haina nia ya kuwa na uhusiano mzuri na nchi nyingine, na hivyo Marekani ina haki ya kuchukua hatua nyingine dhidi ya Urusi.
''Urusi imeamua kujitenga Zaidi yenyewe, tunaangalia maamuzi ya kuchukua'' Heather Nauert aliwaambia waandishi wa habari.
Kripal (kulia) bado yupo katika hali mbaya hospitalini
Image captionKripal (kulia) bado yupo katika hali mbaya hospitalini
Urusi imekataa kuhusika kwa namna yoyote na jaribio la mauaji kwa jasusi wake wa zamanie.
Kripal bado yupo katika hali mbaya hospitalini lakini Binti yake anaendela vizuri na ameondoka katika hali ya hatari.
Kutokana na kuhusishwa kwa Urusi na tukio hilo mapema Uingereza ilisema kuwa hawatatuma mawaziri wake pamoja na familia ya Malkia kushiriki kombe la dunia.
Itakumbukwa kuwa mwaka 1986 Rais wa Marekani Ronald Reagan aliwatimua wanadiplomasia 80 wa Urusi.
Na mwaka 2016 uongozi wa Barack Obama uliwafukuza wanadiplomasia 35 kutokana na kudukua chama cha Democratic.

Trump kuitoza Rwanda ushuru wa nguo zake zinaoagizwa na Marekani, Tanzania na Kenya zanusurika

Rais Donald Trump
Image captionRais Trump amesema kuwa kupiga marufuku mitumba Rwanda imevunja makubaliano ya kibisahara na Marekani chini ya AGOA
Rais wa Marekani Donald Trump amesema kuwa ataahirisha mpango wa kuiondolea Rwanda ushuru wa nguo zake zinazonunuliwa na Marekani kutoka Rwanda.
Bw Trump hata hivyo amesema Tanzania, Uganda na Kenya hazitachukuliwa hatua
Uamuzi huo wa Trump wa kuiwekea Rwanda ushuru wa nguo zake katika soko la Marekani umetokana na Rwanda kuweka vikwazo kwa nguo na viatu vya mitumba vinavyotoka Marekani.
Rais Trump amesema kuwa kupiga marufuku mitumba Rwanda imevunja makubaliano ya kibiashara na Marekani chini ya AGOA.
Soko la mitumba nchini Uganda
Image captionSoko la nguo za mitumba na wanunuzi nchini Uganda. Biashara hii imeshamiri katoka nchi za Africa Mashariki
Wafanyabiashara wa nguo za mitumba nchini Marekani wanadai kuwa mpango wa mataifa ya Rwanda, Tanzania na Uganda wa kupiga marufuku nguo na viatu vya mitumba unaathiri sekta yao.
Muungano wa wafanyabiashara wa bidhaa zilizotumiwa (SMART), maarufu kama mitumba unakadiria kuwa kazi 40,000 za Wamarekani zinazohusiana na ukusanyaji, utengenezaji na uuzaji wa nguo za mitumba zitaathirika iwapo nchi za Afrika Mashariki za Rwanda, Tanzania na Uganda zitatekeleza mpango wake wa kupiga marufuku nguo na viatu vya mitumba kama zilivyokubaliana.
Chini ya mkataba wa ushirikiano wa kibiashara baina ya Afrika na Marekani (AGOA) baadhi ya nchi za Afrika Rwanda ikiwemo ziliondolewa ushuru wa baadhi ya bidhaa zake zinazouzwa Marekani.
"Hata hivyo Marekani inaendelea kutoa faida za AGOA kwa mataifa ya Tanzania na Uganda kwa sababu nchi hizo zimechukua hatua ya kuondoa kodi ya nguo na viatu vya mitumba na kuamua kutopiga marufuku bidhaa hizo," alisema mwwakilishi wa ofisi ya biashara ya Marekani.
Biashara ya mitumba
Image captionBiashara ya mitumba imekuwa chanzo cha kipato kwa wafanyabiashara wengi Afrika Mashariki
"Ninaipongeza Tanzania na Uganda kwa kuchukua hatua za kupatia suluhu hofu za Marekani," afisa wa masuala ya biashara katika ofisi rais nchini Marekani C. J. Mahoney katika taarifa yake.
"Tumekuwa na tutaendelea kushirikiana na Rwanda kutatua tatizo hili."
Kenya pia imetajwa kama taifa ambalo linachukua hatua.
Katika barua yake kwa Baraza la Congress, Trump amesema muda wa Rwanda kuuza bidhaa zake bila ushuru nchini Marekani utamalizika katika 60 kama Rwanda haitarekebisha maamuzi ya hatua ilizochukua.
Mpango wa AGOA hutoa huziwezesha nchi zilizo chini ya jangwa la sahara kuingiza Marekani bidhaa zake ambazo zimetimiza masharti fulani yaliyokubaliwa, ikiwemo kuondoa vikwazo kwa biashara za Marekani na uwekezaji miongoni mwa mengine.

Ushirikiano wa Rwanda na Marekani kibiashara:

Mkataba wa ushirikiano wa kibiashara baina ya Marekani na Rwanda (BIT) chini ya mkataba wa AGOA ulisainiwa Januari 2012, lakini yakazinduliwa rasmi 2007.
Rwanda ni mshirika wa 165 wa biashara wa Marekani kwa ukubwa wa bidhaa zinazouzwa baina ya nchi mbili kulingana na takwimu za 2016.
Bidhaa zinazouzwa na Marekani kwa Rwanda zilifikia milioni $75; na zilizoingizwa Marekani kutoka Rwanda zilikuwa za jumla ya dola milioni $26 milioni.
Mauzo makuu ya Rwanda kwa Marekani ni yale yatokanayo na kilimo kama Kahawa, Chai, karanga, matunda na mboga za kusindikwa pamoja na nguo.
Kwa upande wake Marekani huiuzia Rwanda : ndege za safari, mashine za kielektroniki, zana za tiba na dawa.
Baadhi ya Mataifa ya Afrika Mashariki yaliazimia kupiga marufuku uagizwaji wa nguo za mitumba ili kuboresha sekta ya viwanda vya nguo katika nchi zao.
Hata hivyo wakosoaji wa marufuku hiyo wanadai bado sekta ya viwanda vya nguo katika nchi hizo haijaimarika kiasi cha kuzalisha nguo za kutosha kwa wakazi wa nchi hizo na kuweza kuuza bidhaa hiyo nchi za nje.
Wanadai pia kuwa kupigwa marufuku kwa bidhaa za mitumba kutachangia ukosefu mkubwa wa ajira kwa wafanyabiashara wanaotegemea uuzaji wa nguo hizo kwa ajili ya kipato chao.

Viongozi wa Chadema kusalia rumande baada ya dhamana

Mwenyekiti wa chama cha upinzani Chadema, Freeman Mbowe katika mahakama ya KisutuHaki miliki ya pichaCHADEMA MEDIA
Image captionMwenyekiti wa chama cha upinzani Chadema, Freeman Mbowe katika mahakama ya Kisutu
Mahakama ya hakimu mkazi Kisutu imewapatia dhamana viongozi sita wa chama kikuu cha upinzani nchini Tanzania, Chadema, lakini hata hivyo watasalia rumande hadi kesi wiki ijayo tarehe 3 Aprili ambapo wataletwa mahakamani kukamilisha masharti ya dhamana.
Wanasiasa hao hawakuletwa mahakamani katika uamuzi wa dhamana yao huku afisa wa magereza akiiambia mahakama ni kutokana na gari lililotakiwa kuwasafirisha kuja mahakamani hapo kuwa bovu
Baadhi ya masharti ya dhamana ni kila mtuhumiwa kuwa na wadhamini wawili pamoja na ya shilingi milioni 20, sawa na takribani dola 9000 za kimarekani.
Waziri Mkuu mstaafu Edward Lowassa ni miongoni mwa wanachama na viongozi wa juu wa Chadema waliofika kufuatilia mwenendo wa kesi inayowakabili Mbowe na viongozi wengine wa chama.
Wafuasi wa chama hicho pia walijitokeza wakiwa nje ya mahakama ya Kisutu jijini Dar es Salaam wakisubiri uamuzi wa mahakama juu ya rufaa .
Freeman MboweHaki miliki ya pichaCHADEMAMEDIA / TWITTER
Image captionKiongozi wa Chadema Freeman Mbowe (kulia) ni mmoja waliosomewa mashtaka
Viongozi hao walikamatwa Jumanne wiki hii na kufikishwa mahakamani ambapo wanakabiliwa na makosa manane ikiwa pamoa na uchochezi na kukusanyika katika mkutano wa hadhara pasipo na kibali.
Awali wakili wa serikali Faraja Nchimbi alisema kosa lao la kwanza ni kuandaa mikusanyiko ama maandamano yasiyo na uhalali.
Miongoni mwa mashtaka waliyosomewa ni pamoja na maandamano yaliyosababisha kifo cha mwanafunzi wa chuo cha NIT Akwilina Akwiline.
Wanashtakiwa pia kuendelea kufanya mkusanyiko usio halali wilayani Kinondoni shtaka linalowakabili washtakiwa wote.
Washtakiwa wote walikana mashtaka yote dhidi yao ambapo Wakili Nchimbi alidai upelelezi wa kesi hiyo umekamilika na aliomba tarehe kwa ajili ya kuwasomea maelezo ya awali.
Awali kupitia afisa habari wa Tumaini Makene, Chama hicho kililaani vikali kukamatwa kwa viongozi wao na kusema ''Zimekua ni sarakasi dhidi ya upinzani...njama hizi dhidi viongozi wetu hatutaweza kuzinyamazia, tutaendelea kuzilaani na tunaangalia uwezekano wa kuchukua hatua za kisheria''.
Kesi gani zinazowaandama wanasiasa wa upinzani hasa Chadema?
Kwa mujibu wa baadhi ya vyanzo, kuna wabunge 13 wa chama hicho wanaokabiliwa na kesi katika mahakama mbalimbali.Chama kikuu cha upinzani Chadema ndicho kinachoonekana kuwa na idadi kubwa ya wanasiasa wake wanaozongwa na kesi mbali mbali.
Mbunge wa Singida, kupitia chama cha chadema Tundu Lissu ambaye kwa sasa yuko nchini Ubelgiji kwa matibabu,anakabiliwa na kesi sita. Kesi zote zinahusiana na uchochezi.
Lissu anasemekana kuwa ndiye mwanasiasa aliyekamatwa mara nyingi zaidi ya wengine. Miongoni mwa kesi zake zilizoibua mjadala mkubwa ndani na nje ya nchi ni ile aliyoshutumiwa kutoa matamko ya uchochezi na kumuita Rais John Magufuli 'dikteta uchwara'.
Joseph Mbilinyi, maarufu kwa jina la kazi zake za usanii Sugu, ambaye ni mbunge wa Mbeya mjini, sasa yuko gerezani kwa kipindi cha miezi mitano baada ya mahakama kumkuta na hatia ya kutumia lugha za matusi dhidi ya Rais Magufuli.
Kwa upande wake Halima Mdee, mbunge wa jimbo la Kawe jijini Dar es salaam, yeye anazo kesi nne zote zikiwa za uchochezi ikiwemo ile aliyotuhumiwa kutumia lugha mbaya kumpinga Rais Magufuli baada ya kutangazwa kwa marufuku ya kuwaruhusu wanafunzi wa kike kurudi shuleni mara wapatapo ujauzito.
Mbunge wa Arusha Godbless Lema yeye anakabiliwa na kesi nne pia huku zote zikiwa za uchochezi. Siku za nyuma Lema aliwahi kukaa mahabusu kwa muda wa miezi minne kwa kosa la uchochezi. Hivi sasa Lema amekuwa akihudhuria mahakamani mara kwa mara.
Mwenyekiti wa Chadema taifa na kiongozi wa kambi rasmi ya upinzani bungeni Freeman Mbowe yeye ana kesi 3 ikiwemo kesi ya wiki hii. Kwa sasa anahitajika kuhudhuria polisi kila siku.
John Mnyika mbunge wa jimbo la ubungo jijini Dar es salaam kwa upande wake anahitajika kuhudhuria polisi kila wiki tangu jaribio la kufanyika kwa maandamano ya chama hicho mwezi uliopita. Huyu kesi yake yeye bado haijawekwa wazi
Mbunge wa Mara, Esther Bulaya, aliwahi kushikiliwa na polisi kwa kosa la kutaka kuandaa mkutano wa hadhara nje ya jimbo lake, jambo ambalo polisi walidai kuwa lilikuwa ni uvunjifu wa sheria.

Saturday, March 17

Makonda awaagiza wananchi kutupa taka kwa wenyeviti Serikali za Mitaa


Dar es Salaam. Mkuu wa Mkoa wa Dar es Salaam, Paul Makonda, amewataka wananchi wa mkoa huo ambao maeneo yao yamekaa na takataka muda mrefu bila kuzolewa kwenda kuzitupa nyumbani kwa wenyeviti wa Serikali za Mitaa.
Ameyasema hayo leo Machi 17, kwenye hafla ya uzinduzi wa mpango wa Halmashauri ya Jiji la Dar es Salaam wa kuendeleza utalii wa jiji hilo.
Makonda amesema haiwezekani tunakuja na mpango wa utalii lakini jiji bado linaonekana chafu na kutaka kila kiongozi kuwajibika katika kulisimamia hilo.
“Nawaambieni wananchi kuanzia leo kama mna uhakika mmelipa tozo ya kuzolea taka na taka hizo hazijazolewa kwa muda mrefu, zipelekeni nyumbani kwa Mwenyekiti wa Serikali ya Mitaa yenu halafu yeye atajua wapi pa kuzipeleka,” amesema Makonda.
Amesema katika mpango huo anategemea kuona mambo manne yakifanyika ikiwamo suala zima la usafi, utalii, stendi za mabasi za kisasa na masoko ya kisasa ambayo yatawawezesha wafanyabiashara kufanya shughuli zao mahali pazuri.
Kwa upande wake Waziri wa Tamisemi, Suleiman Jaffo, ambaye alikuwa mgeni rasmi katika hafla hiyo, ameupongeza uongozi wa mkoa wa Dar es Salaam kwa kuja na mpango huo na kuahidi kwamba ofisi yake itatoa ushirikano kuona jambo hilo linafanikiwa.