Saturday, December 2

Pole Carzola sasa ni bora urudi Llanera


Hivi unadhani Santiago Carzola anajisikiaje pale mtoto wake India Ursula akimuuliza baba mbona huendi kazini? Katikati mwa msimu jibu rahisi la Carzola kwa mwanae lilikuwa "mwanangu nitarudi kazini mwezi wa kumi"
Mwaka mzima umepita na Carzola bado hajarudi kazini. Swali gumu zaidi kwa mwanae ni "baba mbona kwenye picha ya pamoja ya Arsenal ya msimu hu haupo? Carzola itabidi amwambie nitarudi kazini mwakani?
Mwaka 1993 dunia ilipata pigo baada ya moja wa washambuliaji hatari kwa wakati huo Marco Van Basten alipomua na kukaa nje kwa miaka miwili kabla ya kutangaza kustaafu soka akiwa na miaka 28 tu.
Van Basten alitikisa dunia akiwa na Ajax na baadaye AC Milan akkiwa amefunga mabao 300, lakini majeruhi yalimlazimisha kuacha soka 1995.
Michael Owen aliteseka na majeruhi maisha yake yote ya soka. Alipofika mwaka 2013 aliona bora awe Dk Leakey wa England ili acheze mpira wa mdomoni kwenye vituo vya Tv baada ya mateso ya misuli kwa kipindi kirefu.
Mwaka 2007 Dr Richard Steadman alimweleza Ji Sung Park kuwa opereshen yake ya goti itamweka benchi mwaka mmoja, haikuwa taarifa nzuri.
Huyu Dk maarufu aliwahi kuwatibu akina Ronaldo, Ruud van Nistelrooy, Michael Owen na Alan Shearer na kuwaeleza wazi kuwa matatizo yao ya misuli yatahitimisha soka lao.
Carzola naye tangu Oktoba mwaka jana hayupo uwanjani. Dr wake ndugu Roman Cugat huenda ndiye mwenye majibu sahihi kwa mtoto wa Carzola ambaye anamuuliza baba kwanini huendi kazini.
Jibu la Cugat kwa mtoto wa Carzola ni moja tu. Amweke wazi kama Steadman alivyofanya kwa akina Delima. Amweleze ukweli kuwa baba hawezi kurudi uwanjani mapema hivyo atarudi Lugo de Llanera in Oviedo (nyumbani kwao).
Michael Owen aliumia mnamo Aprili 12, 2002 akiwa na Liverpool kule Leeds. Mwaka 2007 alikaa nje ya uwanja takriban siku 315. Achana na 2012 ambapo alikaa nje kwa siku 129.
Maisha haya ya Owen kushindwa kuishi kwa amani ndiyo yanamrudisha Carzola Llanera. Wakazi wa Asturias walizoea kumuona Carzola akikatiza misitu ya akina Vidic, Terry na Cahil. Wamemisi kumuona Carzola akimpa Furaha Wenger.
Dr wake Roman Cugat ameshauri Carzola aachane na soka. Huu ni uamuzi mgumu sana kwake. Tokea mwezi wa 10 mwaka jana ilisemekana Carzola atatumia siku 346 akiwa benchi.
Lakini kutokuwepo kwa Carzola kwenge picha ya pamoja ya Arsenal msimu huu basi huenda asiwepo mpaka mwakani. Ana umri wa miaka 32 kwa sasa, unategemea nini?  Ingawa Carzola Bado anaamini kuwa pilipili ni tamu kuliko sukari, ana Imani na misuli yake ila nadhani vyema arudi llanera
Kiasi cha pesa alichokitumia kwenye upasuaji nadhani ni vyema arudi Cimavilla na fukwe za Abba Kaya kule Gijon akapunge upepo na mke wake Ursula. Aliyoyafanya ni makubwa. Asijikute Fransesco Totti.
Carzola amewekeza sehemu nyingi mno. Mwaka 2014 aliwekeza kwenye kampuni ya ardhi na makazi yenye ofisi zake Liverpool na Man United ijulikanayo kama Capital Centric Investments LLP.
Ambapo yeye na Luis Suarez, Mikel Arteta na Jose Henrique waliwekeza zaidi ya Euro milioni 50 na wanategemea kupata faida ya sio chini ya Euro 250 milioni kwa mwaka. Nadhani huu ni wakati wa yeye kusimamia mambo yake mengine ya kibiashara pamoja.

Uchaguzi wa marudio watia hofu wasomi kuelekea 2020


 Wasomi na wanasiasa wameeleza hofu yao kuhusu mustakabali wa uchaguzi wa Serikali za Mitaa 2019 na Uchaguzi Mkuu wa mwaka 2020 endapo kasoro zilizojitokeza kwenye uchaguzi mdogo wa madiwani hazitafanyiwa kazi.
Hofu hiyo imejitokeza katika uchambuzi wa wasomi waliozungumza na Mwananchi kwa nyakati tofauti kuhusu matokeo na malalamiko yaliyojitokeza katika uchaguzi huo uliofanyika Jumapili iliyopita na CCM kushinda kwa asilimia 97.
Miongoni mwa malalamiko yaliyojitokeza ni mawakala wa baadhi ya vyama vya upinzani kukamatwa na polisi na wengine kutimuliwa huku wengine na viongozi wao wakishambuliwa na kujeruhiwa.
Hata hivyo wakati upande mmoja wa upinzani ukilia kwa hujuma na kuambulia kata moja, upande mwingine wa chama tawala unachelea kwa ‘ushindi wa kishindo’ wa kata 42 kati ya 43, unaotajwa kuwa salamu za mwaka 2020.
Vurugu zilizotokea
Katika baadhi ya maeneo kulikofanyika uchaguzi huo, hali haikuwa tulivu bali yaliripotiwa matukio ya watu kupigwa, kukatwa mapanga, magari kuvunjwa vioo, wagombea kuzuiwa kutembelea vituo, wanachama kupigana, madai yaliyosababisha Chadema kujitoa katika kata tano za mkoa wa Arusha.
Hata hivyo, licha ya kujitoa katika kata za Ngabobo, Leguruki, Makiba, Maroroni na Mbureni, matokeo yalitangazwa na CCM kuibuka kidedea.
Matukio ya mawakala kuondolewa yaliripotiwa katika kata kadhaa, zikiwamo za Saranga (Dar es Salaam), Makiba (Arumeru) na Nyabubinza (Maswa).
Alipotafutwa kuzungumzia madai hayo jana, Mkurugenzi wa Uchaguzi wa Tume ya Taifa ya Uchaguzi (NEC), Kailima Ramadhan simu iliita bila kupokewa badala yake alituma ujumbe mfupi kuuliza anapigiwa na nani.
Alipotajiwa anayeuliza na swali kuhusu malalamiko yaliyotokea kuhusu uchaguzi huo likiwamo suala la mawakala kutolewa kwenye vyumba vya kupigia kura na wengine kukamatwa, hakujibu hadi gazeti linakwenda mtamboni.
Hata hivyo, Kailima alikaririwa na gazeti moja Novemba 27 akisema uchaguzi umekwenda vizuri kwa asilimia 100.
“Vituo vyote kufikia saa 10.30 jioni hali ilikuwa nzuri na kura zilikuwa zinahesabiwa. Kumekuwapo na kasoro ndogo, kwa mfano kule Mwanza kuna vijana wa Chadema walikuwa wakiwazuia watu kwenda kupiga kura Nyakato. Dar es Salaam kila kitu kimekwenda vizuri, Lushoto kulikuwa na mawakala walitaka waruhusiwe bila kuwa na kiapo cha uwakala, lakini wakazuiwa,” alisema Kailima.
Maoni ya wachambuzi
Katika uchambuzi wake, Mhadhiri wa Chuo Kikuu cha Dar es Salaam (UDSM), Dk James Jesse alisema, “hii haiashirii jambo jema, kama uchaguzi mdogo umeleta shida namna hii, itakuwaje katika uchaguzi mkubwa wa mwaka 2020, hali itakuwa mbaya zaidi,” alisema Dk Jesse.
Alisema swali la kujiuliza ni kwa nini kunakuwa na matukio kama hayo kila wakati wa uchaguzi ilihali nchi ni ya kidemokrasia.
Alisema kibaya zaidi waliokuwa wakikamatwa ni wa upinzani zaidi, huku baadhi yao wakipigwa pia, “suala hili haliashirii mwanga mwema huko twendako. Uchaguzi ni suala la kisheria na kikatiba, kwanini linagubikwa na mambo yasiyofuata misingi hiyo, hakuna maana kukubali vyama vingi huku wagombea wa upande mmoja wakikamatwa,” alisema.
Msomi huyo alisema lazima kuwepo na malalamiko ya uonevu, wajibu wa Serikali ni kuhakikisha inasimamia uwanda mpana wa usawa wa kisiasa badala ya hali ilivyo sasa,” alisema Dk Jesse.
Alisema matukio hayo yakiachwa yaendelee yanaweza kutishia amani kwa sababu yanajenga chuki miongoni mwa wananchi.
“Pamoja na ushindi uliopatikana, sisiti kusema wazi kuna maeneo hawakushinda kihalali na hapakuonyesha hali ya kidemokrasia hata kidogo,” aliongeza Dk Jesse.
Kuhusu kauli ya mkuu wa Mkoa wa Mbeya, Amos Makalla kuomba msamaha kwa sababu ya mkoa wake kukosa kata moja ya Ibhigi, msomi huyo alisema hilo linahitaji majibu kutoka kwake, lakini linaibua maswali.
“Inawezekana walipewa masharti lazima washinde, inawezekana walishindwa kwa uzembe, hawakusimamisha mgombea anayekubalika, hawakufanya kampeni, hawakuiba kura, hawakufanya fitina vya kutosha. Hizi zote ni hisia na mawazo kutokana na kauli ile, hivyo bado ana nafasi ya kufafanua sababu ya kuomba msamaha, kwa sababu kwenye uchaguzi wa kidemokrasia kuna matokeo mawili kushindwa na kushinda, hivyo kama kilichotokea ni demokrasia kwanini aombe msamaha,” alihoji Dk Jesse.
Maoni ya Dk Jesse hayaachani sana na ya Profesa George Shumbusho, mhadhiri wa Chuo Kikuu cha Mzumbe, aliyesema, “nachelea kusema kila kitu moja kwa moja kwa sababu sioni mwanga huko tuendako, kauli ya Makalla nayo inaleta maswali mengi je, aliambiwa lazima ashinde?
“Kama hivyo ndivyo basi itakuwa bahati mbaya sana kwa demokrasia ya nchi, hata hivyo hakupaswa kusema hadharani ili kuepusha maswali kama haya, hata kama lilikuwa ni agizo,” alisema.
Hata hivyo, Profesa Shumbusho alisema ni ngumu kutoa tathmini ya uchaguzi kama hujafanya tafiti, lakini kupitia vyombo vya habari, matukio kadhaa ambayo hayaashirii hali nzuri ya kidemokrasia yaliripotiwa.
“Ninachofahamu kwenye uchaguzi huru na wa haki na wa kidemokrasia, matokeo ni mawili kushinda na kushindwa, inashangaza kusikia wanaoshindwa wanapaswa kuomba msamaha, why (kwanini),’’ alisema Profesa na kuhoji.
Alisema kama kusingekuwa na kamatakamata ya wapinzani na mawakala wao ilikuwa rahisi kusema CCM imeshinda kwa mafanikio.
Alipoulizwa ushauri gani anatoa kwa wapinzani, alisema kama uchaguzi ungekuwa huru wananchi wangemchagua wanayemtaka, hivyo kungekuwa na nafasi ya kuwaambia wapinzani wafanye nini, lakini kwa hali ilivyokuwa hakuna cha kuwaambia.
Kuhusu namna ya kuondokana na hali hiyo, Mhadhiri Mwandamizi wa Chuo Kikuu cha Dar es Salaam (UDSM), Dk Omari Mbura alisema kuna haja ya kuziangalia dosari zilizojitokeza kwa kina.
Alisema pia wananchi na watawala wanapaswa kutambua katika uchaguzi kuna kushindwa na kushinda na wasipende kutamani kushinda wakati wote.
“Sidhani kama kuna aliyeonewa kwa sababu polisi wanafanya kazi kwa mujibu wa sheria na wanafuata sheria, si rahisi kuacha kuwakamata watu wanaofanya fujo kwa sababu ni upinzani au chama tawala. “Wanachotakiwa kuzingatia ni kufanya kazi bila kupata maelekezo ya mtu au kwa ushabiki wa vyama,” alisema Dk Mbura.

Hali mbaya ya Ukimwi kwa wenye umri wa miaka 15-24

Mkurugenzi Mkuu wa Ofisi ya Taifa ya Takwimu
Mkurugenzi Mkuu wa Ofisi ya Taifa ya Takwimu (NBS), Dk Albina Chuwa 
Dar es Salaam. Hali ni mbaya kwa vijana kuanzia miaka 15-24 kutokana na kuwa kwenye kundi lenye asilimia kubwa ya maambukizi mapya ya virusi vyaUkimwi nchini.
Pamoja na kwamba hali ni mbaya katika kundi hilo, lakini Tanzania kwa ujumla maambukizi yameshuka kwa asilimia 0.4 na kufikia asilimia 4.7 kutoka asilimia 5.1 ya utafiti uliofanyika 2011/2012.
Matokeo hayo yanatokana na utafiti wa viashiria na matokeo ya Ukimwi Tanzania (THIS) ya mwaka 2016/2017 uliofanywa na Ofisi ya Taifa ya Takwimu ambao umeonyesha kuwa jumla ya Watanzania 1.4 milioni (sawa na asilimia 2.9) wanaishi na virusi vya Ukimwi.
Utafiti huo uliofanyika katika mikoa yote ya Tanzania Bara na Visiwani na kuhusisha kaya 14,811 zinaonyesha kuwa vijana walio kwenye umri huo (15-24) wengi wao wakiwa wasichana wanapata maambukizi mapya.
Takwimu hizo zimeonyesha kuwa kiwango cha maambukizi ya VVU kwa watu wenye umri wa miaka 15-19 ni asilimia 0.7 ambapo asilimia 1.0 ni watoto wa kike na asilimia 0.4 ni watoto wa kiume.
Kwa vijana wenye umri wa miaka 20-24 kiwango hicho kimeongezeka na kuwa asilimia 2.2 wasichana wakiwa ni asilimia 3.4 na wanaume ni asilimia 0.9.
Kiwango kimezidi kuongezeka na kufikia asilimia 4 kwa watu wenye umri wa miaka 25-29 wanawake wakiwa asilimia 5.6 na wanaume ni asilimia 2.3.
Akielezea sehemu ya utafiti huo Mkurugenzi Mkuu wa Ofisi ya Taifa ya Takwimu (NBS), Dk Albina Chuwa alisema ukubwa wa maambukizi ni wastani wa asilimia 4.7 wanawake wakiwa asilimia 6.5 na wanaume asilimia 3.5
Alisema ripoti hiyo inaonyesha maambukizi ya VVU kwa vijana wenye umri kati ya miaka 15-24 ni asilimia 1.4, wasichana wakiwa ni asilimia 2.1 huku wavulana wakiwa asilimia 0.6.
Maambukizi ya VVU kwa watu wazima wenye miaka 15 hadi 64 yako juu kwa wanawake kwa asilimia 6.5 ikilinganishwa na asilimia 3.5 ya wanaume.
Kiwango cha maambukizi kwa watoto walio chini ya miaka 15 ni asilimia 0.4
Takwimu hizo zinaonyesha Mkoa wa Njombe unaongoza kwa kuwa na asilimia 11.4 ya maambukizi ya Ukimwi ukifuatiwa na Iringa yenye asilimia 11.3 huku Lindi ikiwa ni mkoa wenye maambukizi machache zaidi kwa asilimia 0.3.
Kwa upande wa Dar es Salaam, Dk Chuwa alisema kiwango cha maambukizi ya Ukimwi katika ripoti hiyo mpya ni asilimia 4.7.
Kwa mujibu wa ripoti hiyo kasi ya maambukizi ni kubwa zaidi kwa wanaoishi mijini kwa asilimia 6 ikilinganisha na asilimia 4.2 ya watu wanaoishi vijijini.
Kufuatia hali hiyo Makamu wa Rais, Samia Suluhu Hassan amewaasa wanajamii kubadili mienendo wa maisha yao na kutambua kuwa Ukimwi ni tishio hivyo ni muhimu kuchukua tahadhari kujiepusha na ugonjwa huo.
Akizungumza wakati wa kilele cha maadhimisho ya Siku ya Ukimwi duniani ambayo kitaifa yalifanyika katika Uwanja wa Mnazi Mmoja jana, Samia aliwataka wasichana kutokubali kurubuniwa kwa sababu ya njaa ya siku moja.
Mama Samia alisema, “naomba wasichana wabadilike Ukimwi ukikutesa hautakutesa peke yako bali Taifa zima, takwimu hizi zinaonyesha hali si nzuri kwa kundi hili ambalo ndilo nguvu kazi ya Taifa, mjitahidi muwe na mienendo inayoeleweka.”
Samia aliwageukia pia wanaume waharibifu na kuwasihi kuzingatia maadili na kuwaacha watoto wa kike wasome na kuja kulisaidia Taifa baadaye.
“Tunaona maambukizi kwa vijana hasa wa kike yanaongezeka, tunaweza kujiuliza wanapata wapi jibu ni kwamba wanapata kwa wanaume. Kuna wanaume watu wazima kabisa ambao wamezunguka huko na hatimaye wanatua kwa watoto na kuwapelekea maradhi yao, huo ni uuaji,” alisema.
Kwa vijana wenye umri kati ya miaka 15-19, maambukizi yapo chini kwa asilimia 0.7 na yako juu kwa wanawake wenye miaka 45-49 kwa asilimia 12.0.
Upande wa wanaume maambukizi hayo ni makubwa kwa wenye umri kati ya miaka 40 hadi 44 kwa asilimia 8.4 ikilinganishwa na miaka 55 hadi 59.
Takwimu hizo zilimsukuma Waziri wa Sera, Bunge, Kazi, Vijana na Walemavu, Jenista Mhagama kumuagiza Mkurugenzi Mtendaji wa Tume ya Kudhibiti Ukimwi (Tacaids), Dk Leonard Maboko kuanzisha kampeni maalumu kwa ajili ya wanaume kuwahamasisha kupima na kuanza kutumia dawa za kufubaza makali ya Ukimwi.
Naye Naibu Waziri wa Afya, Dk Faustine Ndugulile alisema Serikali inaendelea kuchukua hatua mbalimbali kukabiliana na janga hilo ikiwa ni pamoja na kutoa dawa kwa watu wote waliopimwa na kugundulika wana VVU.
Alisema wizara kwa kushirikiana na wadau inaendelea kutoa elimu kuhusu matumizi sahihi na endelevu ya kondomu na kuzisambaza bila malipo kupitia vituo vya huduma za afya.
Alisema, “katika kuendelea kudhibiti maambukizi kwa makundi maalumu, wizara inafanya majaribio ya namna ya kutumia ARV kujikinga na VVU kwa walio katika hatari zaidi ya kuambukizwa, ingawa hii sio mbadala wa njia nyingine za kujikinga.”
“Mafanikio katika mapambano dhidi ya Ukimwi yanaakisi mafanikio ya nchi katika kutekeleza lengo namba tatu la maendeleo endelevu hivyo tutahakikisha tunaendelea kutekeleza maendeleo hayo ili ifikapo 2020 malengo ya 909090 Tatu yanafikiwa na kuchangia malengo ya kutokomeza Ukimwi duniani ifikapo 2030,” alisema Dk Ndugulile.

Mtaka asema taarifa za kukamatwa ni uzushi


Dar es Salaam. Mkuu wa Mkoa wa Simiyu, Athony Mtaka amekanusha taarifa zinazoenea kwenye mitandao ya kijamii kuwa amekamatwa na Takukuru.
Taarifa hizo zinaeleza kuwa Mtaka amekamatwa na Takukuru kwa kugawa fedha za UVCCM kwenye uchaguzi.
Kutokana na taarifa hizo Mtaka amesema, “Kuna taarifa zinasambazwa kwamba nimekamatwa na Takukuru nikigawa fedha za UVCCM ni uzushi na uongo wa kupuuzwa.”

MBUNGE WA ARUMERU MASHARIKI MHESHIMIWA JOSHUA NASSARI AVAMIWA

Mbunge wa Arumeru Mashariki, Joshua Nassari akiwa na Mbunge wa Arusha mjini, Godbless Lema wameenda kwenye kituo cha polisi Usa River kutoa taarifa ya tukio la uvamizi uliofanyika nyumbani Nassari usiku wa kuamkia leo Jumamosi.
Tukio hilo limetokea Kijiji cha Nkwanekori wilayani  Arumeru mkoa wa Arusha.
Katika ukurasa wake wa Twitter Nassari ameandika, “Nimevamiwa nyumbani kwangu maeneo ya USA RIVER usiku huu na watu wenye silaha, na kufyatua risasi ambazo zimeua mbwa waliokuwepo nje ya nyumba. Nimefanikiwa kukimbia na mke wangu na kuripoti kituo cha Polisi. Nimekuwa nikitishiwa kuuawa kila siku, sina amani ndani ya nchi yangu.”
Baadhi ya majirani na viongozi wa Chadema wamefika nyumbani kwake kumjulia hali na baadaye kumsindikiza kituo cha polisi Usa River.
Mmoja wa majirani ambaye hakupenda kutajwa jina lake amesema alisikia milio ya risasi zaidi ya 12 na baadaye kimya kutawala.

Katambi apata mrithi

Dar es Salaam. Kamati ya Utendaji ya Baraza la Vijana wa Chadema (Bavicha) limemchagua  Patrick Ole Sosopi kuwa Mwenyekiti wa baraza hilo kuchukua nafasi ya Patrobasi Katambi aliyehamia Chama cha Mapinduzi.
Kamati hiyo pia leo Desemba 2  imetangaza kuziba nafasi ya nafasi ya Makamu Mwenyekiti kwa kumteua John Pambalu, nafasi iliyoachwa wazi na   Sosopi. Viongozi hao wameteuliwa kuongoza baraza hilo kwa muda wa mwaka mmoja.
Akizungumza na waandishi wa habari Katibu Mkuu wa Bavicha, Julius Mwita amesema uamuzi huo ulifanyika jana kufuatia kikao cha dharura cha kamati hiyo ya utendaji.
Amesema  baraza hilo ni mojawapo ya taasisi imara na  itaendeleza mapambano."Tunawahimiza vijana wa Chadema na vijana wote wa Tanzania wasimame kidete kwenye kazi ya kuijengea na kuipigania demokrasia ya nchi yetu katika misingi ya utawala bora na haki za binadamu,"
Kwa upande wake Ole Sosopi amesema katika uongozi wake atahakikisha baraza hilo linarudi kwenye misingi imara na kuongoza mapambano ya kudai demokrasia.
Amesema akiwa mwenyekiti hatavumilia kuendelea kuona uonevu wanaofanyiwa wanachama wa Chadema.
"Bavicha inaenda kuwa taasisi bora na imara zaidi baada ya kuondoka Katambi. Tunakwenda kupambania Demokrasia a, tutawashawishi vijana kuwa wamoja kulitetea taifa bila kujali maslahi ya vyama," amesema Ole Sosopi

Kenya ina majeraha, nani ataiponya?


Novemba 28, katika Jiji la Nairobi, Kenya taswira mbili zilitawala; Upande mmoja ulikuwa umejaa machafuko, milio ya bunduki, mabomu ya machozi, damu, majonzi na maombolezo. Pia, uharibifu wa mali ulikuwa mwingi mno.
Kwa upande mwingine, shangwe na vigelegele vilitawala huku wageni waalikwa na maelfu ya wafuasi wa Jubilee wakisherehekea hafla ya kuapishwa kwa Rais Uhuru Kenyatta katika Uwanja wa Kasarani, Nairobi.
Jua lilipotua siku hiyo watu watatu walikuwa wameuawa miongoni mwao mtoto wa miaka saba katika makabiliano kati ya polisi na wafuasi wa Muungano wa Nasa wanaokataa ushindi wa Kenyatta.
Muungano wa Nasa walikuwa wanajitayarisha kumkaribisha kiongozi wao, Raila Odinga kuwaongoza kwenye mkutano wa hadhara wa kuomboleza watu zaidi ya 57 waliopoteza maisha yao mikononi mwa polisi katika visa mbalimbali vya kisiasa kati ya Agosti 8 na Novemba 26.
Agosti 8 ndiyo tarehe ulipofanyika uchaguzi ambao ulikumbwa na kasoro nyingi na baadaye kubatilishwa na Mahakama ya Juu ya Kenya, wakati Novemba 26 ndipo ulifanyika uchaguzi wa marudio wa Rais na Uhuru kuibuka mshindi baada ya Odinga kuususia.
Baadhi ya watu waliuawa wakati Uhuru akiapishwa. Miongoni mwa waliouawa kwa kupigwa risasi ni mtoto Geoffrey Mutinda.
Wafuasi wengine upinzani wanadaiwa kuuawa katika kati ya polisi na wafuasi wa Nasa waliokuwa wanamlaki Raila aliporejea kutoka ziara ya siku 10 ughaibuni.
Wengine waliuawa katika mitaa ya mabanda na kuleta msisimko mkubwa wa vuguvugu la upinzani kuzidisha wito wao wa kutaka kuanza kile wanachokiita ukombozi wa tatu wa Kenya. Wafuasi na viongozi wa Nasa wanasema hawahisi kuwa ni Wakenya kwa jinsi wanavyohangaishwa na polisi na Serikali ya Jubilee.
Wanasema kuwa Katiba inakubali Wakenya wote kukutana mahala popote bora tu wamemwarifu mkuu wa polisi katika eneo wanapokutana, lakini licha ya Nasa kufuata sheria kwa kuwaarifu polisi kuhusu mikutano yao, hakuna siku wamekubaliwa kukutana.
Wiki jana, Raila aliongoza mchango wa kusaidia familia ya waliofiwa. Kiongozi huyo alipotoa machozi alipokumbuka maisha ya waliopotea kwa sababu ya siasa. Polisi wameendelea kuwa kizingiti kikubwa kwa juhudi za kuwaleta Wakenya pamoja na kudumisha amani na utangamano.
Popote wanapotumwa lazima wamwage damu. Mbaya zaidi ni kwamba hata watoto wameathiriwa kwa kuwa polisi hawachagui mtu mzima wala mtoto wanaporusha risasi. Visa hivi ni sawa na kunajisi Katiba.
Wengi wanasema polisi waliouwa na kujeruhi sharti wachukuliwe hatua za kisheria. Hatuwezi kuendelea kuishi na hofu katika nchi yetu ilhali tulipata uhuru 1963.
Baadhi ya Wakenya wamechoshwa na virumai za kila mara na wengine wao wanashangaa kwa nini walipigania huru kumfukuza mkoloni mweupe ilhali bado kuna watu weusi ambao ni wakatili kupita kisasi. Viongozi hawajali maisha—kile wanachokienzi ni uongozi. Lakini swali ni je, kukitokea vita vya kukata na shoka, viongozi hao watawaongoza nani? Wahenga walisema, vita havina macho na asiyeziba ufa atajenga ukuta.
Serikali ikiendelea kupuuza vifo hivi na hasara ya kila siku zinazosababishwa na malumbano, siku moja, na haitakuwa mbali, nchi inaweza kukumbwa na visa ambavyo vitakuwa vigumu kuvikomesha.
Kila mtu akijipiga kifua bila kujali matokeo ya matendo yake mwishowe itakuwa kulia na kusaga meno.
Wafuasi na viongozi wa Nasa wanasema hawahisi kuwa ni Wakenya kwa jinsi wanavyohangaishwa na polisi na Serikali ya Jubilee. Wanadai kuwa Katiba inakubali Wakenya wa tabaka zote kukutana mahala popote.
Kama ilivyofanyika kwa mikutano mingine ya hapo awali ya Nasa, Raila na viongozi wakuu wa upinzani walitimuliwa walipofika uwanja wa Jacaranda, Nairobi kuongoza maombolezo. Lakini, kwanza kiongozi huyo alitangaza uamuzi wa utata kuwa ataapishwa Desemba 12. Lakini je, ataapishwaje ilhali Katiba ina utaratibu wa jinsi Rais anafaa kuapishwa?
Wiki jana, kiongozi mwenza wa Nasa, Musalia Mudavadi alipohutubia wanahabari aligusia suala hilo la kuapishwa kwa Raila lakini muda mfupi baadaye, Raila alisema hakubaliani na matamshi hayo kwa sababu ni kinyume cha sheria.
Baadaye Raila na viongozi hao waliwakwepa maafisa wa polisi waliokuwa wanawafuata na kufika katika mtaa wa Mabanda wa Kibra ambako hali iliyojitokeza ni kwamba Kenya bado inaumia na suluhu ya tiba inahitajika haraka iwezekanavyo.
Rais wa Uganda, Yoweri Museveni aliongeza mafuta kwenye moto aliposema watu hawali siasa. Museveni angenyamaza na kuwaacha Wakenya watafute suluhisho la matatizo yao. Kiongozi huyo wa Uganda hana haki ya kuwashauri Wakenya ambao hawajasahau kwamba alishindwa kuipatia Kenya mradi wa ujenzi wa bomba la mafuta kutoka Kenya hadi Uganda badala yake ukaenda Tanzania. Wanaona sasa anawapaka mafuta kwa mgongo wa chupa.
Museveni alikuwa anahutubia halaiki ya watu waliosafirishwa na Jubilee kutoka maeneo yaliyompigia kura Uhuru, kwenye uwanja Kasarani, Nairobi.
Yeye mwenyewe hula, huota na hulala akifikiria siasa. Tafadhali Museveni atuache na shida zetu kwa sababu wewe si mfano mzuri wa kuigwa na wengine.
Ulimwengu wote unajua kuwa amemhangaisha kiongozi wa upinzani Uganda, Dk Kizza Besigye kwa miaka mingi, lakini hiyo si stori yetu leo.
Siasa mbaya, maisha mabaya. Kenya huenda ikaendelea kuzama zaidi kwenye hili, lakini kusema ukweli, ushauri huu wa Museveni ni potofu kwa sababu twamjua; amekuwa akila siasa tangu 1986 alipochukua hatamu za uongozi baada ya kumtimua Milton Obote. Nitatofautiana na kiongozi huo wa Uganda kwa sababu Wakenya hawawezi kutambua ushauri wake.
Rais Uhuru aliapa kuwa atahakikisha Wakenya wote wanatimiza ndoto zao. Pia, aliahidi kuwa atafanya kila aliwezalo kuhakikisha kuwa amewaleta Wakenya wote pamoja. Watu watatu walifariki dunia kwenye visa vya polisi kukabiliana na wafuasi wa Nasa waliokuwa wamefika katika uwanja wa Jacaranda yapata kilomita 12 mashariki mwa jiji la Nairobi.
Si ajabu wafuasi wa Nasa waliona cha mtema kuni. Nasa ilikaidi amri ya polisi kwamba mkutano wao wa maombolezo uahirishwe hadi siku nyingine kwa sababu Rais Uhuru alikuwa anaapishwa.
Tayari, kitumbua kimeingia mchanga kwa sababu upinzani na serikali ya Jubilee hawapatani kwa lolote lile wanalogusia. Kila mmoja anataka kuonekana ana ujasiri kuliko mwenzake, lakini ameshika mpini Raila ameshika makali.
Bado upinzani umeapa kuwa kamwe hawatamtambua Rais Uhuru kama kiongozi wao. Wanasisitiza wataweka shinikizo hadi uchaguzi mwingine ufanywe ndani ya siku 90. Raila amesisitiza kuwa yeye haogopi lolote na ataapishwa Desemba 12.
Siku hii ni sikukuu kwa Kenya kwa sababu ni siku ambayo nchi inaadhimisha siku ya kujinyakulia madaraka kutoka kwa mikono ya wabeberu.
Raila amechagua siku hii kuashiria ukombozi wa Kenya ambao umekuwa pambio kwa Nasa tangu Agosti 8 ambapo ushindi wa Uhuru ulipingwa na majaji kuamua kwamba uchaguzi haukufanyika kwa njia inayofaa.
Hii itakuwa vigumu mno kwa sababu Rais Uhuru ameshakula kiapo cha muhula wa pili na wa mwisho. Je, Nasa itatetea vipi lengo lao la kutaka uchaguzi mwingine ufanywe? Rais Uhuru alipokuwa akiapishwa, Nasa ilikuwa inapanga jinsi ya kuvuruga utawala wake. Hii haitakuwa rahisi kwa Nasa na Wakenya zaidi watakufa kabla siku zao kufika.
Je, Wakenya wasio na hatia watauawa hadi lini? Mbona damu imwagwe usiku na mchana ilhali Katiba ya Kenya inawapa wananchi uhuru kuandamana ilimradi tu wawajulishe polisi wanapotaka kuwa na mkutano.
Wafuasi wa Nasa ndio sasa wanamwamuria Raila kutekeleza wanachotaka. Hii inadhihirika wakati Raila aliposema hataki kuapishwa na baadaye kutangazwa kuwa ataapishwa kuwa rais wa Kenya kulingana na matokeo ya kura ya Agosti 8 ambayo hata hivyo Kenyatta ndiye alitangazwa mshindi.
Wafuasi wa Raila wana kiu cha kufika nchi mpya yenye maziwa na asali. Kiongozi wao Raila amewaahidi watafika nchi hiyo inagawa kuna matatizo mengi safarini. Ni matumaini yao kwamba watafika nchi hiyo kwa vyovyote vile.
Uhuru anasema atakuwa Rais wa Wakenya wote bila kujali misingi ya kabila wala chama. Lakini, vitendo vilivyoonekana hata kabla sherehe ya kuapishwa kwake kumalizika ni tofauti kabisa.
Mazungumzo ya kubuniwa kwa nyadhifa zaidi za kisiasa, yamepingwa mara kwa mara na upinzani lakini baadhi ya makanisa yanasema lazima kuwe na hali kama hii ili nchi isonge mbele. Muungano huo wa upinzani unasema hauwezi kukubali kugawana mamlaka kwa sababu ni washindi wa kura “iliyoibwa na Jubilee.”
Rais anawasihi viongozi wa Nasa waungane na kufanya kazi lakini wito wake ni kama mhubiri kuhubiria watu waliookoka. Ni kazi bure.

Katika kuhama vyama lipo eneo la kukupa tabasamu


Julai 29, 2005, Rais wa Tatu wa Tanzania, Benjamin Mkapa alihutubia kwa mara ya mwisho Bunge la Jamhuri ya Muungano wa Tanzania akiwa Rais, ikiwa ni hotuba ya kuaga na kulivunja Bunge la Nane, baada ya kuliongoza taifa kwa miaka 10, tangu mwaka 1995-2005.
Katikati ya hotuba yake, Mkapa alisimulia kisa kimoja cha wazazi wa makamo na mtoto wao ambaye alishakuwa kijana mkubwa wa kiume, lakini akawa haeleweki anataka kufanya kazi ya aina gani, kwa hiyo ikabidi wamjaribu kwa mtihani ambao wao waliamini ungewapa majibu.
Mtihani gani ambao wazazi walimpa mtoto wao? Mkapa alisimulia: “Wazazi walichukua vitu vitatu, noti ya Sh10,000, Biblia na chupa ya pombe aina ya whisky, wakaviweka mlangoni ili kijana wao akifungua mlango tu avione. Baada ya hapo wazazi wakajificha waone itakuwaje.”
Wakiwa wamejificha, baba wa yule kijana alimwambia mkewe: “Kijana wetu akichukua fedha, atakuwa mfanyabiashara, akichukua Biblia bila shaka atakuwa padri na Mungu apishie mbali akichukua chupa ya whisky atakuwa mlevi.”
Kweli, haukupita muda mrefu, kijana akawa amerudi nyumbani kutoka matembezini. Akafungua mlango na kukuta vile vitu vitatu. Wazazi wakawa wanachungulia kupitia tundu la ufunguo. Wakawa na shauku kubwa kuona kijana wao atachagua nini.
Wazazi wakiendelea kuchungulia, walimshuhudia kijana wao akichukua noti ya Sh10,000. Akaiangalia vizuri halafu akaielekeza kwenye mwanga kujiridhisha kama ni halali, kisha akaitia mfukoni. Wakadhani angeishia hapo ili kukamilisha tafsiri ya kuwa mfanyabiashara.
Mshangao ukafuata baada ya kuweka noti mfukoni, hakuishia hapo, yule kijana alichukua na Biblia, akaifungua na kutazama kurasa kadhaa, halafu nayo akaitia mfukoni. Wazazi wakapigwa na butwaa kwa uchaguzi ule wa mtoto wao lakini hawakuchanganyikiwa.
Wazazi walitaka kuuona mwisho wa kijana wao, wakaendelea kuchungulia kwa umakini mkubwa. Wakamuona anashika na ile chupa ya whisky na kuifungua, akaonja ili kujiridhisha ubora wake, kisha nayo akaitia mfukoni. Akaenda chumbani kwake na vitu vyote vitatu.
Mkapa alisimulia kuwa kwa kitendo cha yule kijana kuchukua vitu vyote vitatu, wazazi wake walibaki wameduwaa. Kisha baba wa yule kijana alijipiga kofi kwenye paji la uso na kumwambia mkewe: “Sasa nimejua, mtoto wetu bila shaka atakuwa mwanasiasa.”
Tafsiri ya kisa hicho mpaka hitimisho lake ni kuwa mwanasiasa ama huwa haeleweki anataka nini, kwani anabeba kila sifa au anaweza kutosha maeneo yote, mfanyabiashara yeye, vilevile mtumishi wa Mungu lakini wakati huohuo akawa mlevi.
Hata hivyo, Rais Mkapa alionya kuwa hiyo si sifa ambayo angependa wanasiasa wakashifiwe nayo. Kwani naye ni mwanasiasa. Kwamba haitakiwi siasa zimpe sifa mbaya mwenye kushughulika nayo. Hata hivyo, visa vya wanasiasa mara nyingi huvunja mbavu na kukupa tabasamu.
Mifano yenye tabasamu
Kuelekea Uchaguzi Mkuu 2015, aliyekuwa Waziri wa Mambo ya Ndani katika Awamu ya Nne, Lawrence Masha alihama CCM na kujiunga na Chadema. Masha alihama katika wimbi la waliomfuata Waziri Mkuu wa zamani, Edward Lowassa aliyehamia Chadema.
Lowassa ambaye ni kada wa muda mrefu wa CCM, sababu ya kuhama kwake inatambulika kuwa ilikuwa kusaka nafasi ya kugombea urais, baada ya kutoswa kwenye chama chake, huku akiwa amejipanga kwa maandalizi makubwa na uwekezaji wa kiwango cha juu kupita yeyote yule.
Matarajio ya Lowassa kushinda yalikuwa makubwa hata baada ya kuhama CCM, ndiyo ikawa sababu kukawa na wimbi la wanaCCM ambao waliamua kujiunga na Chadema, mmoja wapo akiwa ni Masha ambaye alipoteza ubunge tangu 2010.
Tabasamu na Masha; hivi karibuni alirejea CCM baada ya kudumu na uanachama wa Chadema kwa miaka miwili. Sababu za kuhama alieleza kuwa hakuna mipango ya kuchukua dola. Hiyo sababu aliyotoa si tatizo, kwani kila mwanasiasa huwa na kipimo chake cha kubaki au kuhama chama.
Mfano wa tabasamu ni kwamba Aprili 4, mwaka huu, Chadema waliwasilisha bungeni kwa upendeleo majina mawili kwa ajili ya nafasi mbili za ubunge wa Afrika Mashariki. Majina hayo moja ni la Masha na lingine la Mbunge wa zamani wa Nyamagana, Ezekia Wenje.
Kutokana na nafasi za Chadema kuwa mbili na majina kuwasilishwa mawili, ilibidi zipigwe kura za Ndiyo au Hapana. CCM kikiwa ndicho chama chenye idadi kubwa ya wabunge, kiliwakataa Masha na Wenje kwa kuwapigia kura nyingi za Hapana, hivyo kukosa ubunge.
Kanuni zilikuwa wazi kwamba katika wabunge tisa wa Tanzania, lazima Chadema kiwe na viti viwili, CUF kimoja, CCM sita, na kwa sababu wagombea wawili wa Chadema walikuwa wamekataliwa, ilibidi chama hicho kipendekeze majina mengine ya kupigiwa kura.
Katika kukwepa usumbufu wa mwanzo, Chadema mara ya pili kiliwasilisha majina sita ya Masha, Wenje, Salum Mwalimu, Profesa Abdallah Safari, Josephine Lemoyan na Pamela Maasay. Uchaguzi wa pili ulifanyika Mei 10, mwaka huu, Josephine na Pamela wakachaguliwa.
Kimsingi, Masha alikataliwa na CCM kuwa mbunge wa Afrika Mashariki, wakati Chadema walijaribu kumpendelea aipate nafasi hiyo, ila ameamua kujiunga na chama ambacho kilimkataa na kumnyima fursa ya kuitumikia nchi, ameachana na chama kilichompendelea.
Hilo ndilo eneo la kukufanya uduwae kuhusu wanasiasa. Hata hivyo, unaweza kuweka maneno yangu kichwani kuwa mwanachama ambaye hana kinachomzuia kuhama, kwa maana ya cheo au masilahi mengine ambayo huyakusudia, kumzuia kuondoka huwa kazi ngumu mno.
Mfano wa pili; Masha alipohamia Chadema mwaka 2015 alikutana na misukosuko ya polisi mara mbili. Agosti 2015 alitupwa mahabusu kituo cha Oysterbay, Dar es Salaam, akidaiwa kuwatolea lugha mbaya polisi, alipokwenda kuwawekea dhamana vijana wa Chadema waliokamatwa.
Tukio la pili ni Oktoba 20, 2015 alipokamatwa Mpanda, Rukwa, akituhumiwa kufanya kampeni kwenye kambi za wakimbizi. Masha akatupwa rumande. Utetezi wa Masha ni kuwa alikuwa akionewa kwa sababu amehamia upinzani. Alilaumu kwamba Serikali inatumia vibaya nguvu zake za dola dhidi ya wapinzani.
Hata hivyo, Masha baada ya kuhama, hivi karibuni alipokuwa anahutubia mkutano wa kampeni za udiwani, Mbweni, Dar es Salaam, alimtaka Waziri wa Mambo ya Ndani, Mwigulu Nchemba kuwalinda wanachama wa CCM, kwani alipokuwa waziri pia yeye aliwalinda CCM.
Ni Masha huyohuyo aliyelalamika mwaka 2015 kuwa CCM inatumia vibaya polisi ndiyo maana wapinzani wanakamatwa kiholela. Akiwa CCM anaona sawa kutamba CCM walindwe na polisi kwani naye aliwalinda alipokuwa waziri.
Tuisogelee mifano zaidi
Mbunge wa zamani wa Kigoma Kusini (NCCR-Mageuzi), David Kafulila ambaye baada ya kushindwa ubunge 2015, alihamia Chadema Desemba mwaka jana, hivi karibuni amehamia CCM. Kabla ya kuwa NCCR-Mageuzi Kafulila alikuwa Chadema.
Aliposhindwa ubunge mwaka 2015, alifungua kesi mahakamani kudai aliibiwa kura na CCM. Tafsiri baada ya kuhamia CCM ni kuwa sasa anaungana na wale ambao alilalamika na kuwashtaki mahakamani kwa kumpora ubunge wake.
Kuelekea Uchaguzi Mkuu 2015, Kafulila alisema kuwa asingejiunga na ACT-Wazalendo kwa sababu maudhui ya chama hicho ni kugawa kura za upinzani kwa kutumiwa na CCM, maneno ambayo yalibeba tafsiri ya kumponda Kiongozi wa ACT-Wazalendo, Zitto Kabwe.
Miaka miwili baada ya Kafulila kutoa maneno hayo, amekuwa mwanachama wa CCM, huku Zitto na chama chake ambacho kiliitwa tawi la CCM, kikiwa kimewasha taa ya mapambano kisiasa, kikichuana vilivyo na CCM kwenye kampeni za uchaguzi mdogo wa udiwani.
Mabadiliko hayo ya rangi ya wanasiasa yasikuchanganye, bali yakujengee tabasamu. Kwamba Kafulila alimdhihaki Mbunge wa zamani wa Kasulu Mjini (NCCR-Mageuzi), Moses Machali, aliyegombea ubunge kwa tiketi ya ACT-Wazalendo mwaka 2015, kisha kuhamia CCM mwaka jana, mwaka huu ameungana naye CCM.
Mfano wa Rais Mkapa kuhusu wazazi wa makamo na kijana wao ukupe tabasamu zaidi na kukuondolea maswali ya mvurugiko wa wanasiasa kulamba matapishi yao, bali shusha pumzi kuwa Katibu Mkuu wa zamani wa Chadema, Dk Willibrod Slaa ameteuliwa balozi na Rais John Magufuli.
Dk Slaa ataapishwa na Rais Magufuli ambaye miaka iliyopita alimbebea bango kwa kukosa uadilifu wa mali za umma kwa kuuza kiholela nyumba za Serikali.
Ni sawa tu aliyekuwa Mbunge wa Singida Kaskazini (CCM), Lazaro Nyalandu ambaye alipokuwa Waziri wa Maliasili na Utalii, alishambuliwa kweli na wabunge wa Chadema kwa ufisadi sekta ya utalii na ugawaji wa vitalu vya uwindaji lakini leo Nyalandu ni Chadema, na ni kamanda wao. Tabasamu.

Kivumbi uchaguzi mdogo


Dar es Salaam. Tume ya Taifa ya Uchaguzi (NEC) imetangaza ratiba ya uchaguzi mdogo katika majimbo ya Singida Kaskazini, Longido na Songea Mjini na kata sita za Tanzania Bara ambao utafanyika Januari 13 mwakani.
Akitoa taarifa kwa umma jijini Dar es Salaam leo Jumamosi, Makamu Mwenyekiti wa NEC, Jaji mkuu mstaafu wa Zanzibar, Hamid Mahmoud Hamid amesema tume imetangaza uchaguzi huo baada ya kupokea barua kutoka kwa Spika ya kwamba nafasi ziko wazi.
Jimbo la Singida Kaskazini liko kutokana na kujivua  uanachama wa CCM aliyekuwa mbunge wa jimbo hilo, Lazaro Nyalandu, Songea Mjini baada ya kifo cha Leonidas Gama na Longido baada ya Mahakama kufuta matokeo ya uchaguzi yaliyokuwa yamempa ushindi Onesmo Ole Nangole.
Akizungumzia uchaguzi wa kata sita amesema waziri mwenye na serikali za mitaa kwa kuzingatia masharti ya kifungu cha 13(1) cha Sheria ya Uchaguzi ya Serikali za Mitaa, Sura ya 292, aliitaarifu Tume kuwepo nafasi wazi za madiwani katika kata hizo Tanzania Bara
Alizitaja kata zinazohusika katika uchaguzi huo kuwa ni Kimandolu(Arusha), Kihesa (Iringa), Bukumbi (Uyui), Kurui (Kisarawe), Keza (Ngara) na Kwagunda (Korogwe).
 Amesema utoaji fomu za uteuzi katika majimbo hayo na kata hizo sita utakuwa ni kati ya Desemba 12 hadi 18, 2017 wakati katika jimbo la Songea Mjini utoaji fumo utakuwa kati ya Desemba 14 hadi 20 mwaka huu.
Alifafanua kuwa kwa upande wa kampeni za uchaguzi huo katika majimbo ya Singida Kaskazini na Longido na kata zote sita zitaanza Desemba 19 na kumalizika Januari 12. 
Katika jimbo la Songea Mjini, amesema kuwa kampeni za zitaanza tarehe 21 Desemba, 2017 na kumalizika tarehe 12 Januari, 2018 wakati siku ya uchaguzi katika majimbo yote matatu na kata zote sita itakuwa tarehe 13 Januari, 2017.
Jaji Hamid alivikumbusha vyama vya siasa na wadau wote wa uchaguzi wazingatie sheria, kanuni, taratibu, miongozo na maelekezo yote wakati wa kipindi cha uchaguzi mdogo wa majimbo hayo na kata sita.

Takwimu za PEPFAR zaonyesha ukimwi umedhibitiwa

Ambassador Michael Raynor
Leo ni siku ya Ukimwi Duniani. Kila mwaka, Dunia huadhimisha siku ya Ukimwi Disemba 1 ikiwa ni wakati wa kukumbuka wale waliokufa kutokana na maradhi hayo.
Wachambuzi wa masuala ya kiafya wanasema kuwa pia ni wakati ambao hutumika kuonyesha juhudi na azma ya mataifa kuwasaidia wale wanaoishi na virusi vya HIV, kufanya kazi kwa pamoja kuzuia kuenea kwake na hatimaye kumaliza maambukizo.
Matamko kutoka nchi mbalimbali yanasema siku ya Ukimwi Duniani pia ni wakati wa kusheherekea na kuwashukuru watafiti, wahudumu, familia, marafiki na jamii ambao wanafanya kazi kwa pamoja kutokomeza changamoto kubwa.
Kwa upande wake Serikali ya Marekani imesema kupitia Mpango wa Dharura wa Rais wa Marekani wa Kukabiliana na Ukimwi (PEPFAR) siyo kwamba imeokoa na kuboresha maisha ya mamilioni ya watu, lakini pia imetengeneza mpango wa dunia katika kukabiliana na HIV/AIDS.
Balozi wa Marekani nchini Ethiopia Michael Raynor amesema Takwimu za hivi karibuni za PEPFAR zinaonyesha kuwa dunia inapiga hatua katika kudhibiti maradhi ya HIV/AIDS.
Hili linaonekana katika nchi ambazo bado zinaelemewa na mzigo mkubwa wa kukabiliana na maradhi haya—kitu ambacho kilikuwa kinaonekana ni vigumu kudhibiti siyo muda mrefu uliopita. Lakini pamoja na mafanikio hayo huu siyo wakati wa kujibweteka.
Balozi huyo amesema kuwa Waziri wa Mambo ya Nje wa Marekani Rex Tillerson wakati wa Mkutano Mkuu wa Umoja wa Mataifa 2017, alizindua Mkakati wa PEPFAR mpya kwa ajili ya kusukuma udhibiti wa HIV/AIDS (2017-2020).
“Mkakati huo unaonyesha ushujaa na nia na msimamo wetu thabiti juu yale tunayotaka kuyafikia. Inathibitisha kuwa serikali ya Marekani, kupitia PEPFAR, itaendelea kusaidia juhudi za kudhibiti maambukizi ya ukimwi katika nchi zaidi ya 50."
Pia ni kuhakikisha wanapata huduma za tiba ya Ukimwi kwa wanajamii wote wakiwemo makundi yaliyo hatarini kutokana na maambukizo, amesema Michael Raynor.
Ameongeza kuwa huko Ethiopia, PEPFAR imewekeza takriban Dola bilioni 2 kusaidia kukabiliana na HIV/AIDS.
“Hivi leo juhudi zetu zimewezesha kuwapatia dawa za kurefusha maisha ya waathirika wa ukimwi kwa Waethopia 433,909, wakiwemo watoto," amesema.
Taarifa ya PEPFAR inaonyesha kuwa taasisi hiyo imeweza kuwezesha wanawake wajawazito takriban milioni moja nchini Ethiopia kupima ukimwi na kupata ushauri nasaha na pia imehakikisha kuwa zaidi ya watoto mayatima 280,000 na watoto wanaoishi katika mazingira hatarishi na wale wanaowalea wanapata uangalizi na msaada wa huduma muhimu wanazohitaji.

Ujumbe wa al-Qaeda unaonyesha mpasuko baina vikundi vya jihadi




Mpiganaji wa al-Qaeda nchini Syria
Kikundi cha kigaidi cha al-Qaida kimetoa ujumbe mpya wa sauti ya kiongozi asiyetabirika ambaye analikosoa kundi la wapiganaji Jihadi wa Syria lijulikanalo kama Liberation of the Levant Organisation.
Kundi hilo pia linajulikana kwa jina jingine maarufu Hayat Tahrir al-Sham (HTS), na kiongozi wa al- Qaeda anawalaumu kwa kuwashambulia wapiginaji jihadi waandamizi wenye mafungamano na al-Qaeda huko Syria.
Katika sauti ya video hiyo ya dakika 35 “Ayman al-Zawahiri anasema na tupigane nao kwa msimamo moja, wakati akipinga uamuzi wa HTS kusitisha mafungamano rasmi na al-Qaeda 2016 na kutoweka ahadi yao ya mafungamano ya pamoja kama ni sehemu ya kikundi cha kigaidi ndani ya Syria. Sauti ya Amerika,VOA, haikuweza kuthibitisha ukweli wa video hiyo.
“Kwa nini upendo huu umepotea kati yetu na umerithiwa na migogoro, ukatili wa mioyo, njama za kuvunja kiapo chetu cha ushirikiano, na kuwadharau ndugu zetu na kutaka kuwaondoa nchini, kuwazuilia na hata kuwateka?
Al-Zawahiri amesema hayo alipokuwa anawahutubia viongozi wa HTS katika ujumbe wake, uliokuwa umeandikwa katika vyombo vya habari vya al-Qaeda vinavyofanyapropaganda vya al-Sahab Foundation Jumanne.
HTS ambayo mwanzoni ilikuwa inajiita al-Nusra Front, ilijibadilisha mwaka jana na baadae kuungana na vikundi kadhaa vidogo vya upinzani na kuunda umoja wao.
Ripoti iliyoandaliwa na Taasisi ya utafiti wa kivita wiki iliyopita imedai kuwa kikundi hicho imetumia fursa ya hatua ya jumuiya ya kimataifa kukishinda kikundi cha Islamic State kama ni nafasi ya kuongeza kwa kiwango kikubwa himaya yake upande wa Kusini mwa Syria, ikiimarisha udhibiti wa maeneo mengi ya kaskazini mashariki ya jimbo la Idlib.
Al-Zawahiri amesema yeye hakuidhinisha kujitoa kwa kikundi cha HTS kutoka katika mtandao wa al-Qaida. Anaelezea kuwa ni “kosa kubwa sana” walilofanya viongozi wa HTS kufanya ushirikiano wao naye kuwa siri kwa ajili ya kuepuka mashambulizi ya majeshi yanayoongozwa na Marekani.
Mnamo August, Michael Ratney, afisa wa ngazi ya juu wa Wizara ya Mambo ya Nje ya Marekani ambaye anashughulikia sera ya Syria, amesema kikundi cha Nusra na viongozi wake watakuwa ni walengwa wa Washington hata kama watajibadilisha na kutumia majina mapya kwa ajili ya kuepuka mashambulizi ya majeshi ya Marekani na nchi nyingine yanayopambana kuutokomeza ugaidi katika eneo hilo.

Zimbabwe: Mnangagwa atangaza baraza jipya la mawaziri

Rais wa Zimbabwe Emmerson Mnangagwa ametangaza baraza lake jipya la mawaziri. Maafisa wakuu wa jeshi na makada wa chama tawala cha ZANU PF ndio wamepewa nafasi katika baraza hilo lenye mawaziri 22.

Simbabwe Emmerson Mnangagwa in Harare, 2014 (picture-alliance/AP Photo/T. Mukwazhi)
Wakosoaji  nchini Zimbabwe wanasema fungate fupi baada ya harusi imemalizika na ukweli wa mambo sasa unadhihirika, kilichotarajiwa ni kwamba Rais Emmerson Mnangagwa angelichanganya baraza lake, lakini kuna ishara chache mno za mabadiliko. Akizungumza na waandishi habari muda mfupi kabla baraza jipya la mawaziri kutangazwa, kiongozi mkuu wa upinzani Morgan Tsvangirai alisema Mnangagwa alikuwa na nafasi ya kuonyesha kuwa yeye ni tofauti na Mugabe lakini hapakuwepo na majadiliano yoyote baina yao na uongozi huo mpya.
Ishara haba za mabadiliko
Tsvangirai anasema hakuna mabadiliko hadi sasa na jambo ambalo linatia wasiwasi ni jinsi rais mpya alivyoanza. Tsvangirai amesema kuna wasiwasi juu ya msingi anaojaribu kuuweka rais huyo mpya wa Zimbabwe katika kuyashughulikia mambo na kutoa mpango madhubuti wa kufufua uchumi.
Morgan Tsvangirai kiongozi mkuu wa upinzani wa Zimbabwe (Getty Images)
Kiongozi mkuu wa upinzani wa Zimbabwe Morgan Tsvangirai
Mnangagwa amemchagua meja jenerali Sibusiso Moyo, kamanda wa jeshi ambaye wiki mbili zilizopita alitangaza kwenye televisheni hatua ya wanajeshi ya kuingilia kati baada ya nchi hiyo kukabiliwa na mkwamo wa kisiasa hatua ambayo hatimaye wiki iliyopita ilisababisha kuufikisha mwisho utawala wa kiongozi maarufu wa zamani wa nchini Zimbabwe Robert Mugabe. Rais huyo mpya pia amempa nafasi ya uwaziri wa ardhi na kilimo jemadari Perrance Shiri aliyehudumu kwa muda mrefu kwenye kikosi cha jeshi la anga la Zimbabwe.
Chinamasa arejea katika wizara ya fedha
Kulingana na taarifa zilizotolewa rais Mnangagwa hata hivyo amewabakisha mawaziri wachache kutoka kwenye baraza la zamani la aliyekuwa rais wa nchi hiyo Robert Mugabe miongoni mwao ikiwa ni Patrick Chinamasa ambaye amerudishwa kuhudumu kama waziri wa fedha, wizara aliyokuwa anaishikilia kabla ya kuondolewa wakati Mugabe alipofanya mabadiliko katika baraza la mawaziri manamo mwezi Oktoba.
Meja jenerali Sibusiso Moyo wa jeshi la Zimbabwe (Reuters/ZBC)
Meja jenerali Sibusiso Moyo
Chris Mutsvangwa kiongozi wa mashujaa katika harakati za ukombozi wa Zimbabwe za mwaka 1980 na aliyeongoza katika juhudi za kumlazimisha Mugabe aachie madaraka ndiye waziri mpya wa habari. Hata hivyo rais Mnangagwa hakuwajumuisha wapinzani katika baraza hilo la Mawaziri.
Wakili mmoja ambaye pia ni mkosoaji Alex Magaisa aliweka kwenye mtandao wake wa Tweeter picha ya rais wa zamani wa Zimbabwe Robert Mugabe na mkewe Grace wakiwa wanacheka pamoja na ujumbe wa maneno uliosema "pale walipoliona baraza la mawaziri”.
Biti: Kipindi cha fungate kimekwisha
Naye aliyekuwa zamani waziri wa fedha Tendai Biti ameandika ujumbe kwenye Tweeter uliosema kipindi cha fungate kimekwisha hata kabla hakijaanza na kumalizia kwa kusema "Ni aibu! Ni sawa na kupoteza nafasi adimu”.
Mnangagwa, mwenye umri wa miaka 75, aliapishwa Ijumaa iliyopita baada ya matukio makubwa katika nchi hiyoya kusini mwa Afrika pale jeshi lilipoidhibiti nchi ya Zimbabwe na kusema walitaka kuwakamata wahalifu katika serikali waliokuwa wanamzunguka Mugabe mwenye umri wa miaka 93.